ବାରିପଦା ଅଫିସ,୬ା୮- ଅଯୋଧ୍ୟାଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶ୍ରୀରାମ ଚନ୍ଦ୍ରଙ୍କର ମନ୍ଦିର ନିର୍ମାଣ ନିମନ୍ତେ ଭୂମି ପୂଜା କରିଛନ୍ତି। ଏହି ଅବସରରେ ମୟୂରଭଞ୍ଜ ଜିଲା ବାରିପଦାର ଭୁଗୁଡାକଟାଠାରେ ଏକ ରାମ ମନ୍ଦିର ନିର୍ମାଣ ପାଇଁ ବୁଧବାର ସ୍ଥାନ ନିରୂପଣ କରାଯାଇଛି। ଏହି ଅବସରରେ ମୟୂଭରଞ୍ଜ ଏମ୍ପି ବିଶେଶ୍ୱର ଟୁଡୁ, ସାରସକଣା ବିଧାୟକ ବୁଢାନ ମୁର୍ମୁ, ଭାଜପା ଜିଲା ପରିଷଦ ଅଧ୍ୟକ୍ଷା ସୁଜାତା ମୁର୍ମୁ, ଭାଜପା ଜିଲା ସଭାପତି କାନ୍ଦରା ସରେନ, ବୁଦ୍ଧିଜିବୀ ଓ ବହୁ ମାନ୍ୟଗଣ୍ୟ ବ୍ୟକ୍ତି ଏଥିରେ ଉପସ୍ଥିତ ଥିଲେ। ଭୁଗୁଡ଼ାକଟାରେ ଥିବା ବାବା ଆଖଣ୍ଡଳମଣି ମନ୍ଦିର ପରିସରରେ ଟେମ୍ପଲ ଚାରିଟେବୁଲ ଟ୍ରଷ୍ଟ ପକ୍ଷରୁ ଏହା ନିର୍ମାଣ କରାଯିବାକୁ ସଂକଳ୍ପ ନିଆଯାଇଥିବା ବେଳେ ମନ୍ଦିର ନିର୍ମାଣର ସମସ୍ତ ଖର୍ଚ୍ଚ ଟ୍ରଷ୍ଟର ସଦସ୍ୟମାନେ ବହନ କରିବେ। ଟ୍ରଷ୍ଟର ମୁଖ୍ୟ ଲକ୍ଷ୍ମୀଧର ହାବଡାଙ୍କ କହିବାନୁଯାୟୀ ଆସନ୍ତା ଡିସେମ୍ବର ମାସରୁ ଏହି ମନ୍ଦିରର ଭୂମି ପୂଜନ ଓ ନିର୍ମାଣ କାର୍ଯ୍ୟ ଆରମ୍ଭ ହେବ। ମନ୍ଦିର ନିର୍ମାଣ ହେଲେ ଭୁଗୁଡ଼ାକଟା ଅଞ୍ଚଳର ସ୍ବତନ୍ତ୍ର ପରିଚୟ ସୃଷ୍ଟି ହୋଇପାରିବ ବୋଲି ଟ୍ରଷ୍ଟର ସଭାପତି ସୁରେଶ ଚନ୍ଦ୍ର ଭୂଜବଳ ପ୍ରକାଶ କରିଛନ୍ତି। ଅନ୍ୟମାନଙ୍କ ମଧ୍ୟରେ ଟ୍ରଷ୍ଟର ସଦସ୍ୟ ବଟକୃଷ୍ଣ ସାମଲ, ଉପେନ୍ଦ୍ର ପ୍ରଧାନ, ସରୋଜ କୁମାର ପାତ୍ରଙ୍କ ସମେତ ବହୁ ସଦସ୍ୟ ଉପସ୍ଥିତ ରହି ଆଲୋଚନା କରିଥିଲେ।
