କେନ୍ଦୁଝର,୧୫ା୫(ଡି.ଏନ୍.ଏ.): କେନ୍ଦୁଝର ସଦର ବ୍ଲକ୍ ରାଇସୁଆଁ-ସାହାଡାପୁର ଗୁରୁତ୍ୱପୂର୍ଣ୍ଣ ରାସ୍ତା ଅବସ୍ଥା ଶୋଚନୀୟ ହୋଇପଡ଼ିିଛି। ମରାମତି ଅଭାବରୁ ପିଚୁ ଉଠି ମେଟାଲ ଦେଖାଯାଉଛି। ଫଳରେ ଦୈନିକ ଛୋଟବଡ଼ ଦୁର୍ଘଟଣା ଘଟୁଛି। ରାସ୍ତା ଉପରେ ନିର୍ଭରଶୀଳ ଶହଶହ ଲୋକ ଗମନାଗମନରେ ଅସୁବିଧା ଭୋଗୁଛନ୍ତି। ଜିଲା ପ୍ରଶାସନ ଗୁରୁତ୍ୱପୁର୍ଣ୍ଣ ଗ୍ରାମାଞ୍ଚଳ ରାସ୍ତାଟିକୁ ତୁରନ୍ତ ମରାମତି କରିବାକୁ ସ୍ଥାନୀୟ ବାସିନ୍ଦା ସନ୍ତୋଷ ବେହେରା, ଜିତେନ୍ଦ୍ର ଷଡ଼ଙ୍ଗି ପ୍ରମୁଖ ଦାବି କରିଛନ୍ତି।
ଯେ, ଜାତୀୟ ରାଜପଥ ୨୦ର ରାଇସୁଅଁାଠାରୁ ସାହାଡ଼ାପୁରକୁ ଯାଇଥିବା ଗ୍ରାମ୍ୟ ଉନ୍ନୟନ ବିଭାଗର ରାସ୍ତାଟି ପୂର୍ବରୁ ବାଉରିପଦା ପର୍ଯ୍ୟନ୍ତ କାମ ହୋଇଥିଲା। କିନ୍ତୁ ନିମ୍ନମାନର କାମ ଓ ବିଭାଗୀୟ ଅବହେଳା କାରଣରୁ ରାସ୍ତାରୁ ପିଚୁ ଉଠିଗଲାଣି। ସ୍ଥାନେସ୍ଥାନେ ମେଟାଲ ଉଠି ବଡ଼ବଡ଼ ଖାଲ ସୃଷ୍ଟି ହୋଇଛି। ଅନ୍ୟପକ୍ଷରେ ଏହି ରାସ୍ତାର ବାଉରୀପଦା ଛକଠାରୁ ସାହାଡ଼ାପୁର ପର୍ଯ୍ୟନ୍ତ ଅବସ୍ଥା ସବୁଠାରୁ ଅଧିକ ଖରାପ ହୋଇପଡ଼ିଛି। ମେଟାଲ ଗୁଡ଼ିକ ବାହାରି ଏଣେତେଣେ ବିଛୁଡ଼ି ହୋଇ ପଡ଼ିଥିବାରୁ ଗମନାଗମନରେ ଅନେକ ଅସୁବିଧା ହେଉଛି। ରାସ୍ତାରେ ପ୍ରତ୍ୟେକ ଦିନ ଗୋବର୍ଦ୍ଧନ, ବାଉରିପଦା, କାଉଁରୀକଳା, ରାଇସୁଆଁ ଓ ଗୋପିନାଥପୁର ପ୍ରଭୃତି ୫ ପଞ୍ଚାୟତର ଲୋକେ ନିର୍ଭର କରିଥାଆନ୍ତି। ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଥିବାରୁ ଦୈନିକ ଦୁର୍ଘଟଣା ଘଟୁଥିବା ସ୍ଥାନୀୟବାସିନ୍ଦା କହିଛନ୍ତି। ବିଶେଷକରି ସାହାଡ଼ାପୁର, ଜଡ଼ିପଦା, ଶଙ୍କିରୀ, ହାଣ୍ଡିଭଙ୍ଗା, କଣାପଶି, କାଉଁରୀକଳା, ମନୋହରପୁର, କାଠକରଞ୍ଜିଆ, ପୋଟଳ, ସେଣ୍ଡକାପ, କାଉଁରୀକଳା ଅଞ୍ଚଳର ଚାଷୀ ପ୍ରତ୍ୟେକଦିନ କେନ୍ଦୁଝର ମୁଖ୍ୟାଳୟକୁ ଯାତାୟାତ କରିଥାନ୍ତି। ରାସ୍ତାରେ ଉକ୍ତ ୫ ପଞ୍ଚାୟତ ବ୍ୟତିତ ରାଇକଳା, ହାଣ୍ଡିଭଙ୍ଗା, ପଳାଶପଙ୍ଗା ପଞ୍ଚାୟତର କେତେକ ଗ୍ରାମର ଲୋକେ କେନ୍ଦୁଝର ସହର, ସଦର ଥାନା, ଡାକ୍ତରଖାନା, କଲେଜ ଯିବା ଆସିବା କରିବାରେ ବ୍ୟବହାର କରିଥାନ୍ତି। ବିଶେଷ କରି ଚାଷୀମାନଙ୍କ ପାଇଁ ରାଇସୁଆଁ ସାହାଡ଼ାପୁର ରାସ୍ତା ଗୁରୁତ୍ୱପୂର୍ଣ୍ଣ ଅଟେ। ରାସ୍ତା ଅବସ୍ଥା ଖରାପ ଯୋଗୁ ୫ରୁ ଊର୍ଦ୍ଧ୍ୱ ପଞ୍ଚାୟତବାସୀ ଯାତାୟାତରେ ସମସ୍ୟା ଭୋଗୁଛନ୍ତି। ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ସୁଭ ପ୍ରକାଶ ରଥ କହିଛନ୍ତି, ଉକ୍ତ ରାସ୍ତା ନିମନ୍ତେ ଟେଣ୍ଡର ହୋଇଛି। ଆସନ୍ତା ୧୦ ଦିନ ମଧ୍ୟରେ ରାସ୍ତାର ପିଚୁ କାମ ଆରମ୍ଭ କରାଯିବ।
