ଜଗତ୍ସିଂହପୁର ଅଫିସ, ୨୪ା୬: ରାଜ୍ୟର ୨୦ଟି ଜିଲାରେ ମଲ୍ଟି ସ୍ପେଶାଲିଟି ହସ୍ପିଟାଲ ହେବ ବୋଲି ପାଖାପାଖି ୪ ବର୍ଷ ପୂର୍ବରୁ ରାଜ୍ୟ ସରକାର ଘୋଷଣା କରିଥିଲେ। ଏହି ତାଲିକାରୁ ଜଗତ୍ସିଂହପୁର ଜିଲା ବାଦ୍ ପଡ଼ିଥିଲା। ସେଥିପାଇଁ ସେତେବେଳେ ଜିଲାବାସୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଏପରି କି କାହିଁକି ଜଗତ୍ସିଂହପୁର ବାଦ୍ ପଡିଲା ସେନେଇ ରାଜନୀତି ମଧ୍ୟ ହୋଇଥିଲା। ଶେଷରେ ତତ୍କାଳୀନ ସ୍ବାସ୍ଥ୍ୟ ମନ୍ତ୍ରୀ ପ୍ରତାପ ଜେନା ଜଗତ୍ସିଂହପୁରରେ ମଲ୍ଟି ସ୍ପେଶାଲିଟି ହସ୍ପିଟାଲ ହେବ ବୋଲି ପ୍ରତିଶ୍ରୁତି ଦେଇଥିଲେ। ମାତ୍ର ଇତିମଧ୍ୟରେ ୪ ବର୍ଷ ଅତିକ୍ରାନ୍ତ ହୋଇଥିଲେ ସୁଦ୍ଧା ମନ୍ତ୍ରୀଙ୍କ ପ୍ରତିଶ୍ରୁତି ଧୂଆଁବାଣ ହୋଇଛି। ଏନେଇ ଜନସାଧାରଣଙ୍କ ଅସନ୍ତୋଷ ତୀବ୍ର ହେବାରେ ଲାଗିଛି।
୨୦୧୮ ଜୁନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ବିଭିନ୍ନ ଜିଲାର ୨୦ଟି ସ୍ଥାନରେ ପବ୍ଲିକ ପ୍ରାଇଭେଟ୍ ପାର୍ଟନରଶିପ୍ (ପିପିପି) ମୋଡ୍ରେ ମଲ୍ଡିଂ ସ୍ପେଶିଆଲିଟି ହସ୍ପିଟାଲ କରାଯିବ ବୋଲି ଘୋଷଣା କରିଥିଲେ। ସେଗୁଡିକ ହେଲା ପୁରୀ, ଜୟପୁର, ଅନୁଗୋଳ, ବଡବିଲ, ବାରିପଦା, ଭଦ୍ରକ, ବଲାଙ୍ଗୀର, ଝାରସୁଗୁଡ଼ା, କଳାହାଣ୍ଡି, ଫୁଲବାଣୀ, ଢେଙ୍କାନାଳ, ବୌଦ୍ଧ, ନୂଆପଡ଼ା, ମାଲକାନଗିର, ନବରଙ୍ଗପୁର, ସୁବର୍ଣ୍ଣପୁର, ରାୟଗଡ଼ା, ପାରଳାଖେମୁଣ୍ଡି, ରାଇରଙ୍ଗପୁର ଏବଂ କେନ୍ଦ୍ରାପଡ଼ା। ଏସବୁ ମଲ୍ଟି ସ୍ପେଶାଲିଟି ହସ୍ପିଟାଲରେ ୨,୭୦୦ ଶଯ୍ୟା ସୃଷ୍ଟି ହେବା ସହ ଏଥିପାଇଁ ୧,୦୦୦ କୋଟି ଟଙ୍କା ବ୍ୟୟ ହେବ । ୧୦,୦୦୦ କର୍ମନିଯୁକ୍ତି ସୃଷ୍ଟି ହେବ। ଏହାଦ୍ୱାରା ରାଜ୍ୟରେ ଅଭାବ ଥିବା ମୋଟ ଶଯ୍ୟା ସଂଖ୍ୟା ମଧ୍ୟରୁ ୫୬% ପୂରଣ ହୋଇପାରିବ। ହୃଦ୍ରୋଗ, ସ୍ନାୟୁ ସହ ମଲ୍ଟି ସ୍ପେଶାଲିଟି ସ୍ବାସ୍ଥ୍ୟ ଯନତ୍ ସୁବିଧା ଉପଲବ୍ଧ ହେବ ବୋଲି କୁହାଯାଇଥିଲା। ଦୁଃଖର କଥା ହେଲା ଏହି ସୁବିଧାରୁ ଜଗତ୍ସିଂହପୁର ଜିଲାକୁ ବାଦ୍ ଦିଆଯାଇଥିଲା। ସରକାରଙ୍କ ଏହି ଘୋଷଣା ଉପରେ ସେତେବେଳେ ଜଗତ୍ସିଂହପୁର ପୌର ପରିଷଦ ସଭାଗୃହରେ ଏକ ଗୁରୁତ୍ୱପୂର୍ଣ୍ଣ ବୈଠକର ଆୟୋଜନ ହୋଇଥିଲା। କିନ୍ତୁ ଏହି ବୈଠକରେ ମଲ୍ଟି ନୁହେଁ, ସୁପର ସ୍ପେଶାଲିଟି ହସ୍ପିଟାଲ ଉପରେ ଗୁରୁତ୍ୱ ଦିଆଯାଇଥିଲା। ଏନେଇ ନାଉଗାଁ ଅଞ୍ଚଳରୁ ଏକ ସଙ୍ଗଠନ ପକ୍ଷରୁ ପଦଯାତ୍ରାର ଆୟୋଜନ କରାଯାଇଥିଲା। ବୈଠକ ନିଷ୍ପତ୍ତିକୁ ଜିଲାର ତତ୍କାଳୀନ ୪ ବିଧାୟକ, ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ, ଜଗତ୍ସିଂହପୁର ଏମ୍ପି ପ୍ରମୁଖ ସମର୍ଥନ କରି ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ। ଏପରି କି ତତ୍କାଳୀନ ବିଭାଗୀୟ ମନ୍ତ୍ରୀ ଜେନାଙ୍କ ଆଗରେ ବିଜେଡି ବିଧାୟକ ଓ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷଙ୍କ ସମେତ ଦଳୀୟ ନେତାମାନେ ଜଗତ୍ସିଂହପୁରକୁ ଏହି ତାଲିକାରେ ଯୋଡାଯାଉ ବୋଲି ଦାବି କରିଥିଲେ। ଜେନା ମଲ୍ଟି ଓ ସୁପର ସ୍ପେଶାଲିଟି ମଧ୍ୟରେ ପ୍ରଭେଦ ନ ବୁଝି ଗଣମାଧ୍ୟମରେ ଜଗତ୍ସିଂହପୁର ଜିଲାକୁ ଏହି ତାଲିକାରେ ଅନ୍ତର୍ଭୁକ୍ତ କରାଯିବ ବୋଲି ଘୋଷଣା କରିଥିଲେ। ସେତେବେଳେ ଧରିତ୍ରୀ ଏହି ପ୍ରସଙ୍ଗକୁ ପ୍ରାଧାନ୍ୟ ଦେଇ ଜଗତ୍ସିଂହପୁରରେ ମଲ୍ଟି ସ୍ପେଶାଲିଟି ହସ୍ପିଟାଲ ହେଉ ବୋଲି ଯୁକ୍ତି ବାଢିଥିଲା। ପରବର୍ତ୍ତୀ ସମୟରେ ତତ୍କାଳୀନ ୪ ବିଧାୟକ, ଏମ୍ପି, ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ଏପରି କି ତତ୍କାଳୀନ ମନ୍ତ୍ରୀ ଜେନା ମଧ୍ୟ ଭୁଲ୍ ଯୁକ୍ତି ଉପରେ ପ୍ରତିଶ୍ରୁତି ଦେଇଥିବା କହି ନିଜ ବାକ୍ୟ ସଂଶୋଧନ କରିଥିଲେ। ଜେନା କହିଥିଲେ ଖୁବଶୀଘ୍ର ଅର୍ଥାତ୍ ଦ୍ୱିତୀୟ ପର୍ଯ୍ୟାୟରେ ଜିଲାରେ ମଲ୍ଟି ସ୍ପେଶିଆଲିଟି ହସ୍ପିଟାଲ ନିର୍ମାଣ ପାଇଁ ପଦକ୍ଷେପ ଗ୍ରହଣ କରାଯିବ। ହେଲେ ଏ ପର୍ଯ୍ୟନ୍ତ କାହିଁକି ବିଜ୍ଞପ୍ତି ପ୍ରକାଶ ପାଇଲା ନାହିଁ । ସ୍ଥାନୀୟ ଅଞ୍ଚଳର କେତେଜଣ ବୁଦ୍ଧିଜୀବୀ ସେମାନଙ୍କ ପ୍ରତିକ୍ରିୟାରେ କହିଛନ୍ତି, ନିର୍ବାଚନ ସମୟ ପାଖେଇ ଆସିଲେ ଏଭଳି ପ୍ରତିଶ୍ରୁତି ମିଳେ। ଏହା ସରକାରଙ୍କ କିପରି ପ୍ରତିବଦ୍ଧତା ତାହା ସହଜେ ଅନୁମେୟ। ଗତ ନିର୍ବାଚନରେ ଜଗତ୍ସିଂହପୁର ଜିଲାରେ ବିଜେଡିକୁ ଶତପ୍ରତିଶତ ସଫଳତା ମିଳିଛି। ଅର୍ଥାତ୍ ଲୋକେ ଏହି ଦଳର ୪ ବିଧାୟକ ଓ ଏମ୍ପି ପ୍ରାର୍ଥୀଙ୍କୁ ବିଜୟୀ କରିଛନ୍ତି। ଏବେ ଏହି ନେତାମାନେ ମୁଖ୍ୟମନ୍ତ୍ରୀ ଓ ସ୍ବାସ୍ଥ୍ୟ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରି ତୁରନ୍ତ ଜଗତ୍ସିଂହପୁରରେ ମଲ୍ଟି ସ୍ପେଶାଲିଟି ହସ୍ପିଟାଲ ନିର୍ମାଣ ପାଇଁ ପଦକ୍ଷେପ ନିଅନ୍ତୁ। ନ ହେଲେ ଲୋକେ ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇବେ ବୋଲି ସେମାନେ କହିଛନ୍ତି।
