ଢେଙ୍କାନାଳ ଅଫିସ, ୧।୨ ଢେଙ୍କାନାଳ ଜିଲାରେ ଖରିଫ୍ ଧାନକିଣାକୁ ନେଇ ସମସ୍ୟା ବଢ଼ିବାରେ ଲାଗିଛି। ଧାନ କିଣା ସରି ନ ଥିବା ବେଳେ ୧ ତାରିଖରୁ ଟୋକନ ଅବଧି ସରିଯିବାକୁ ବସିଛି। ଏ ନେଇ ମୋବାଇଲ୍କୁ ମେସେଜ୍ ଆସିବା ପରେ ଏହାକୁ ନେଇ ଚିନ୍ତାରେ ପଡ଼ିଛନ୍ତି ସଦର ବ୍ଲକ ତାଳବରକୋଟ ଅଞ୍ଚଳର ଚାଷୀ।
ଢେଙ୍କାନାଳ ଜିଲାରେ ଗତ ଡିସେମ୍ବର ୨୯ରୁ ମଣ୍ଡି ଆରମ୍ଭ ହୋଇଛି। ତେବେ ଏହାର ବହୁ ବିଳମ୍ବରେ ତାଳବରକୋଟରେ ଜାନୁୟାରୀ ୧୩ରେ ମଣ୍ଡି ଶୁଭାରମ୍ଭ ହୋଇଥିଲା। କମ୍ ସମୟ ମଧ୍ୟରେ ୧୦୦୦ କୁଇଣ୍ଟାଲ ପରିବର୍ତ୍ତେ ୪୦୦ରୁ ୬୦୦ କୁଇଣ୍ଟାଲ ଧାନ କିଣାଯାଇଥିଲା। ଏବେ ଟୋକନ ଲାପ୍ସ ହୋଇଯିବାକୁ ବସିଥିବାବେଳେ ବଳକା ଧାନ କିପରି ବିକ୍ରି କରିବେ ସେ ନେଇ ଚାଷୀକୁଳ ମଧ୍ୟରେ ଭାଳେଣି ପଡ଼ିଛି। ଚାଷୀ ନୃସିଂହ ଚରଣ ଜେନାଙ୍କ ୫୬.୪୦ କୁଇଣ୍ଟାଲ, କାସିମ୍ ଖଁାଙ୍କ ୭୪.୫୦ କୁଇଣ୍ଟାଲ, ଶେଖ ଫର୍କର ଅହମ୍ମଦଙ୍କ ୪୦ କୁଇଣ୍ଟାଲ ଧାନ ବକେୟା ରହିଛି। ସେହିପରି ବହୁ ଚାଷୀଙ୍କ ଧାନ ଖରିଦ ହୋଇପାରିନାହିଁ। ଧାନ ବିକ୍ରି କରିବାକୁ ଅପେକ୍ଷା କରିଥିବା ଟୋକନଧାରୀ ଚାଷୀମାନେ ସମସ୍ୟା ସମ୍ପର୍କରେ ଜିଲା ଯୋଗାଣ ଅଧିକାରୀ ଏବଂ ଗତ ୨୯ ତାରିଖରେ ଅତିରିକ୍ତ ଜିଲାପାଳଙ୍କ ଦୃଷ୍ଟିଆକର୍ଷଣ କରିଥିଲେ। ହେଲେ ଏ ଦିଗରେ ଅଦ୍ୟାବଧି କୌଣସି ପଦକ୍ଷେପ ନିଆଯାଇନାହିଁ। ମଣ୍ଡି ବନ୍ଦ ହୋଇ ଗଲେ ଚାଷୀମାନେ ଧାନ କିପରି ଓ କେଉଁସ୍ଥାନରେ ବିକ୍ରି କରିବେ ସେ ନେଇ ଅଧିକାରୀମାନେ ପାଟି ଖୋଲୁନାହାନ୍ତି। ଫଳରେ ଏଭଳି ଅବ୍ୟବସ୍ଥିତ ଧାନ କିଣାକୁ ନେଇ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଏ ଦିଗରେ ତ୍ୱରିତ ପଦକ୍ଷେପ ନେବାକୁ ତାଳବରକୋଟ ଗ୍ରାମର ସମ୍ପୃକ୍ତ ଚାଷୀଙ୍କ ସମେତ ବାଙ୍କନିଧି ସାହୁ, ବ୍ରହ୍ମାନନ୍ଦ ଜେନା, ମହେଶ୍ୱର ଜେନା ପ୍ରମୁଖ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି।
ଏ ସଂକ୍ରାନ୍ତରେ ଜିଲା ଯୋଗାଣ ବିଭାଗ ଅଧିକାରୀ ନିରଦ ରଞ୍ଜନ ଦାସ କୁହନ୍ତି, ଟୋକନକୁ ନେଇ ସମସ୍ୟା ଉପଜୁଛି। ସମସ୍ୟାର ସମାଧାନ କରାଯିବା ଲାଗି ପଦକ୍ଷେପ ନିଆଯାଉଛି।
