ନୂଆଦିଲ୍ଲୀ,୯।୩
ଗତ ୭ ବର୍ଷରେ ରନ୍ଧନ ଗ୍ୟାସ ବା ଏଲ୍ପିଜି ଦର ୨ ଗୁଣ ବୃଦ୍ଧି ପାଇଛି। ସେହିଭଳି ପେଟ୍ରୋଲ ଏବଂ ଡିଜେଲରୁ ଟିକସ ସଂଗ୍ରହ ୪୫୯% ବଢିଥିବା କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସୋମବାର ସୂଚନା ଦେଇଛନ୍ତି। ଲୋକସଭାକୁ ଏକ ଲିଖିତ ଉତ୍ତରରେ ସେ କହିଛନ୍ତି, ୨୦୧୪ ମାର୍ଚ୍ଚ ପହିଲାରେ ୧୪.୨ କେଜି ଗ୍ୟାସ୍ ସିଲିଣ୍ଡରର ଦର ୪୧୦.୫ ଟଙ୍କା ଥିଲା। ଚଳିତ ମାସରେ ସମାନ ସିଲିଣ୍ଡରର ମୂଲ୍ୟ ୮୧୯ ଟଙ୍କା ରହିଛି। ରନ୍ଧନ ଗ୍ୟାସ ଏବଂ ପିଡିଏସ୍ କିରୋସିନ ଉପରେ ସବସିଡି ହଟାଇବା ଲାଗି କିଛି ମାତ୍ରାରେ ମୂଲ୍ୟ ବୃଦ୍ଧି କରାଯାଉଛି। ସେ ପୁଣି କହିଛନ୍ତି, ଗତ କିଛି ମାସ ଧରି ଏଲ୍ପିଜି ଦର ବଢିଛି। ୨୦୨୦ ଡିସେମ୍ବରରେ ସିଲିଣ୍ଡର ପିଛା ଏହା ୫୯୪ ଟଙ୍କା ରହିଥିଲା। ବର୍ତ୍ତମାନ ଦର ୮୧୯ ଟଙ୍କା ରହିଛି।
ସେହିଭଳି ସାଧାରଣ ବଣ୍ଟନ ବ୍ୟବସ୍ଥାରେ ଉପଲବ୍ଧ ହେଉଥିବା କିରୋସିନ ମାର୍ଚ୍ଚ ୨୦୧୪ରେ ୧୪.୯୬ ଟଙ୍କାରେ ବିକ୍ରି ହେଉଥିଲା। ଏହା ଚଳିତ ମାସ ସୁଦ୍ଧା ୩୫.୩୫ ଟଙ୍କା ଛୁଇଁଛି। ସୂଚନାଯୋଗ୍ୟ, ଦେଶ ମଧ୍ୟରେ ପେଟ୍ରୋଲ ଏବଂ ଡିଜେଲ ଦର ସର୍ବକାଳୀନ ରେକର୍ଡ ସ୍ତରରେ ରହିଛି। କେନ୍ଦ୍ର ଏବଂ ରାଜ୍ୟ ସ୍ତରରେ ଲାଗୁ ହେଉଥିବା ବର୍ଦ୍ଧିତ ଉତ୍ପାଦ ଟିକସ ଏବଂ ଭାଟ ଯୋଗୁ ଇନ୍ଧନ ଦର ଆକାଶ ଛୁଆଁ ହୋଇଛି। ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦର ମୂଲ୍ୟ, ଏକ୍ସଚେଞ୍ଜ ରେଟ, ଟିକସ, ପରିବହନ ଭଡା ଏବଂ ଅନ୍ୟ ଆନୁଷଙ୍ଗିକ ଖର୍ଚ୍ଚକୁ ବିଚାରକୁ ନେଇ ତେଲ କମ୍ପାନୀ ଦର ନିର୍ଦ୍ଧାରଣ କରୁଥିବା ପ୍ରଧାନ ମତ ପ୍ରକାଶ କରିଛନ୍ତି। ସେହିଭଳି ତେଲ ଟିକସ କଥା ବିଚାରକୁ ନେଲେ ୨୦୧୩ରେ ଏହି ବାବଦ ଟିକସ ୫୨,୫୩୭ କୋଟି ଟଙ୍କା ରହିଥିଲା। ୨୦୧୯-୨୦ରେ ପେଟ୍ରୋଲ ଏବଂ ଡିଜେଲ ଉପରୁ ସରକାର ୨.୧୩ ଲକ୍ଷ କୋଟି ଟଙ୍କାର ଟିକସ ଆଦାୟ କରୁଛନ୍ତି।
