କୋଣାର୍କ,୧୦।୨(ଡି.ଏନ୍.ଏ.): ଅର୍କକ୍ଷେତ୍ର କୋଣାର୍କସ୍ଥିତ ଏକମାତ୍ର ଜଗନ୍ନାଥ ମନ୍ଦିର ସମ୍ମୁଖ ଏବେ ଜବରଦଖଲକାରୀଙ୍କ କବ୍ଜାରେ ଥିବାରୁ ସେଠାରେ ଦିନକୁ ଦିନ ଅସାମାଜିକ କାର୍ଯ୍ୟ ବୃଦ୍ଧି ପାଇବାରେ ଲାଗିଛି। ଫଳରେ ଜଗନ୍ନାଥ ମନ୍ଦିରକୁ ଆସୁଥିବା ଶ୍ରଦ୍ଧାଳୁମାନେ ନିଜକୁ ସୁରକ୍ଷିତ ମନେ କରୁନାହାନ୍ତି। ଏଥିସହ ଜଗନ୍ନାଥ ସଂସ୍କୃତି ସଙ୍କଟରେ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।
ପ୍ରକାଶ ଯେ, କୋଣାର୍କ ସୂର୍ଯ୍ୟ ମନ୍ଦିର ସମ୍ମୁଖ ରାସ୍ତାରେ ଜଗନ୍ନାଥ ଟ୍ରଷ୍ଟବୋର୍ଡ ରାଜାରାମ ମଠ ଅବସ୍ଥିତ। ସେଠାରେ ବହୁ କାଳରୁ ପ୍ରଭୁ ଜଗନ୍ନାଥଙ୍କର ପୂଜା ଅର୍ଚ୍ଚନା କରାଯାଉଛି। ବାର ମାସରେ ତେରପର୍ବ ସାଙ୍ଗକୁ ମହାପ୍ରଭୁଙ୍କର ରଥଯାତ୍ରା ମଧ୍ୟ ଅନୁଷ୍ଠିତ ହେଇଥାଏ। ଉକ୍ତ ମନ୍ଦିରକୁ କୋଣାର୍କ ବିଜ୍ଞାପିତ ଅଞ୍ଚଳବାସୀଙ୍କ ବ୍ୟତୀତ କୋଣାର୍କକୁ ଆସୁଥିବା ପର୍ଯ୍ୟଟକ ଆସିଥାନ୍ତି। ହେଲେ ଏବେ କେତେକ ଉଠା ଦୋକାନୀ ମନ୍ଦିରର ସମ୍ମୁଖ ରାସ୍ତା ଅବରୋଧ କରି ମାଡ଼ି ବସିଛନ୍ତି। ଏଥିସହ ସେଠାରେ ନିଶା କାରବାର ଓ ସେବନ କରିବା ସହ ଭଜନ ମଣ୍ଡପରେ ଆମିଷ ଭକ୍ଷଣ କରୁଛନ୍ତି। ସେଠାରେ ନିଶାସକ୍ତଙ୍କ ଦିନକୁ ଦିନ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇବାରେ ଲାଗିଛି। ପୂର୍ବରୁ ସେଠାରୁ ଜଣେ ମାନସିକ ବିକୃତ ମହିଳାଙ୍କ ମୃତଦେହ ମିଳିବା, ଚୋରି ନେଇ ଚର୍ଚ୍ଚା ଜୋର ଧରିଥିଲା। ମନ୍ଦିର ହୁଣ୍ଡିରୁ ଲୁଟ୍, ଠାକୁରଙ୍କ ଅଳଙ୍କାର ଚୋରି ଏବଂ ଠାକୁରଙ୍କ ନିତ୍ୟ ବ୍ୟବହାର୍ଯ୍ୟ ଜିନିଷ ପ୍ରତିଦିନ ଚୋରି ଯାଉଥିବା ନଜିର ରହିଛି। ପର୍ଯ୍ୟଟକଙ୍କୁ ନିଶାଡ଼ିମାନେ ଦୁର୍ବ୍ୟବହାର କରିବା ନିତିଦିନିଆ ଘଟଣା ହୋଇଗଲାଣି। ମଳମୂତ୍ର ତ୍ୟାଗ, ଦୋକାନୀଙ୍କ ବର୍ଜ୍ୟବସ୍ତୁ ମନ୍ଦିର ପରିସରରେ ଜମା ହେଉଥିବା ନେଇ ଜଗନ୍ନାଥ ପ୍ରେମୀଙ୍କୁ ନିରାଶ କରିଛି। ସଞ୍ଜ ହେଲେ ମହିଳା ପର୍ଯ୍ୟଟକ ମନ୍ଦିରକୁ ଆସିବାକୁ ସୁରକ୍ଷିତ ମଣୁନାହାନ୍ତି। ଜବରଦଖଲ ହଟାଇବା ଲାଗି ଟ୍ରଷ୍ଟ ବୋର୍ଡ ପକ୍ଷରୁ ବାରମ୍ବାର ସ୍ଥାନୀୟ ପ୍ରଶାସନକୁ ଜଣାଯାଇଥିଲେ ମଧ୍ୟ କିଛି ସୁଫଳ ମିଳୁ ନାହିଁ। ଜବରଦଖଲକାରୀ ଟ୍ରଷ୍ଟ ବୋର୍ଡକୁ ପଇସା ଦେଇ ଦୋକାନ ଦେଉଥିବା ମିଛ କହି ପ୍ରଶାସନକୁ ଭୁଅଁା ବୁଲାଉଥିବା ଜଣାପଡ଼ିଛି। ପୁରୀ ଜିଲାପାଳ, ଜଗନ୍ନାଥ ସଂସ୍କୃତି ପରିଷଦ ଓଡ଼ିଶା ଏଥିପ୍ରତି ଦୃଷ୍ଟି ଦେଇ ଜବରଦଖଲ ହଟାଇବା ପାଇଁ ଟ୍ରଷ୍ଟ ବୋର୍ଡ ମାନେଜିଂ ଟ୍ରଷ୍ଟି ଅମରେଶ୍ୱର ନାୟକ ଦାବି କରିଛନ୍ତି।
