ଖୋର୍ଦ୍ଧା ଅଫିସ,୭ା୧୦:ସହାୟତା କରିବା ପାଇଁ ଅର୍ଥର ଆବଶ୍ୟକତା ନ ଥାଏ। ଆବଶ୍ୟକ ଥାଏ ଉଦାର ହୃଦୟ ଓ ମନ। ଏଭଳି ଦୃଶ୍ୟ ଦେଖିବାକୁ ମିଳିଛି ଖୋର୍ଦ୍ଧା ଜିଲା ବୋଲଗଡ଼ ବ୍ଲକ କଳାଙ୍ଗ ପଞ୍ଚାୟତର ନାଉପଦା ଗ୍ରାମରେ। ଗ୍ରାମର ବାସନ୍ତୀ ବରାଡ଼(୩୫)ଙ୍କ ପାଇଁ ୧୦୮ ଆମ୍ବୁଲାନ୍ସ କର୍ମଚାରୀମାନେ ଦେବଦୂତ ସାଜିଥିଲେ। ରବିବାର ଗୁରୁତର ଅବସ୍ଥାରେ ତାଙ୍କୁ ଆମ୍ବୁଲାନ୍ସ କର୍ମଚାରୀମାନେ ପ୍ରାୟ ୨ କିଲୋମିଟର ଷ୍ଟ୍ରେଚରରେ ଆଣି ଚିକିତ୍ସା କରାଇବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ସୂଚନା ଅନୁଯାୟୀ, ନାଉପଦା ଗ୍ରାମର ବାସନ୍ତୀ ଗୁରୁତର ଅବସ୍ଥାରେ ନିକଟ ପାହାଡ଼ ଉପରେ ପଡିଥିବା ଖବରପାଇ ଭୁବନେଶ୍ୱରରେ ରହୁଥିବା ତାଙ୍କ ପୁଅ ୧୦୮କୁ କଲ୍ କରି ଜଣାଇଥିଲେ। ଖବରପାଇ ୧୦୮ ଆମ୍ବୁଲାନ୍ସ ଡ୍ରାଇଭର ସନ୍ନ୍ୟାସୀ ମଲିକ, ଫାର୍ମାସିଷ୍ଟ କମଳଲୋଚନ ନାୟକ ଏବଂ ହେଲପର ଅନ୍ତର୍ଯ୍ୟାମୀ ବେହେରା ପ୍ରମୁଖ ଘଟଣାସ୍ଥଳରେ ପହଞ୍ଚିଥିଲେ। ତେବେ ବଣଜଙ୍ଗଲ ଘେରା ପାହାଡ଼ ଅଞ୍ଚଳକୁ ଯିବା ଲାଗି ରାସ୍ତା ନ ଥିବାରୁ ପ୍ରାୟ ୨କିମି ଦୂରରେ ଆମ୍ବୁଲାନ୍ସ ଅଟକି ଯାଇଥିଲା। ରୋଗୀଙ୍କୁ କିପରି ଆଣିବେ, ସେ ନେଇ ସେମାନଙ୍କ ମଧ୍ୟରେ ଭାଲେଣି ପଡିଥିଲା। ସେମାନେ ବିଳମ୍ବ ନ କରି ଆମ୍ବୁଲାନ୍ସରୁ ଷ୍ଟ୍ରେଚର ଧରି ଜଙ୍ଗଲ ରାସ୍ତା ଦେଇ ଚାଲି ଘଟଣାସ୍ଥଳରେ ପହଞ୍ଚିଥିଲେ। ପରିବାର ଲୋକଙ୍କ ସହାୟତାରେ ଗୁରୁତର ବାସନ୍ତୀଙ୍କୁ ଷ୍ଟ୍ରେଚରରେ ଧରି ତଳକୁ ଆସିିଥିଲେ। ଆମ୍ବୁଲାନ୍ସରେ ପ୍ରଥମେ ସ୍ଥାନୀୟ ମେଡିକାଲ ପରେ ଖୋର୍ଦ୍ଧା ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ।
