ଚଣ୍ଡିଖୋଲ,(ଡି.ଏନ୍.ଏ.)/ ଭୁବନେଶ୍ୱର, (ବ୍ୟୁରୋ) ୩ା୧: ହରିଦାସପୁର-ପାରାଦୀପ ରେଳପଥ ନିର୍ମାଣ କାର୍ଯ୍ୟ ୨୦୨୦ ମାର୍ଚ୍ଚରୁ ଶେଷ କରାଯାଇ ପୂର୍ବତଟ ରେଳପଥକୁ ହସ୍ତାନ୍ତର କରାଯାଇଛି। ଏହାପରେ ବିଭାଗ ପକ୍ଷରୁ ଟ୍ରାକ୍ ଯାଞ୍ଚ କରାଯାଇ ୨୦୨୦ ଜୁଲାଇ ୩୦ରୁ ଏହି ରେଳପଥରେ ରେଳଯାତ୍ରା ଆରମ୍ଭ ହୋଇଛି। ତେବେ ସେହିଦିନଠାରୁ ଆଜିଯାଏ ମାଲବାହୀ ଟ୍ରେନ୍ ଚାଲିଥିଲେ ମଧ୍ୟ ଯାତ୍ରୀବାହୀ ଟ୍ରେନ୍ ଚାଲି ପାରିଲା ନାହିଁ। ସେତେବେଳେ ରେଲଓ୍ବେ ପକ୍ଷରୁ ଦର୍ଶାଯାଇଥିଲାଯେ, କୋଭିଡ୍ କଟକଣା ଯୋଗୁ ଯାତ୍ରୀ ବାହୀ ଟ୍ରେନ ଚାଲିପାରିବ ନାହିଁ । କୋଭିଡ୍ କଟକଣା ପରେ ୨୦୨୦ ଡିସେମ୍ବରରେ ଯାତ୍ରୀବାହୀ ଟ୍ରେନ୍ ଚାଲିବ। ଯାତ୍ରୀବାହୀ ଟ୍ରେନ୍ ଚାଲିବା ନେଇ ଯାଜପୁର, କେନ୍ଦ୍ରାପଡ଼ା ଓ ଜଗତ୍ସିଂହପୁର ଜିଲା ଲୋକେ ଆନ୍ଦୋଳନକୁ ଓହ୍ଲାଇଥିଲେ। ତେବେ ୬ ମାସ ପରେ ରେଳ ଚାଲିବା ପ୍ରତିଶ୍ରୁତି ମିଳିବା ପରେ ମାଲବାହୀ ଟ୍ରେନ୍ ଯାତାୟାତ କରିଥିଲା। ଏହା ମଧ୍ୟରେ ଦେଢ଼ ବର୍ଷ ବିତିଗଲାଣି। ତଥାପି ଯାତ୍ରୀବାହୀ ଟ୍ରେନ୍ ଚାଲିପାରିଲା ନାହିଁ ।
ସୂଚନାଥାଉକି, ଦୀର୍ଘ ୮୨ କିମି ଲମ୍ବ ବିଶିଷ୍ଟ ଏହି ରେଳପଥ ୩ଟି ଜିଲା ଦେଇ ଅତିକ୍ରମ କରିଛି। ପାରାଦୀପ ବନ୍ଦରକୁ ମାଲ ପରିବହନ ଓ ବିଶ୍ୱପ୍ରସିଦ୍ଧ ବୌଦ୍ଧକ୍ଷେତ୍ର ଲଳିତଗିରି-ଉଦୟଗିରି-ରତ୍ନଗିରିକୁ ଦେଶ ବିଦେଶର ପର୍ଯ୍ୟଟକ ଆସିବା ପାଇଁ ଏହି ରେଳ ପଥ ନିର୍ମାଣ କରାଯାଇଥିବା ସେତେବେଳେ ସୂଚନା ଦିଆଯାଇଥିଲା। ୧୯୯୭ରେ ଏହି ରେଳ ପ୍ରକଳ୍ପ ନିର୍ମାଣ ପାଇଁ କେନ୍ଦ୍ର କ୍ୟାବିନେଟର ମଞ୍ଜୁର ମିଳିଥିଲା। ସେ ସମୟରେ ହୀରକ ତ୍ରିଭୁଜକୁ ବୌଦ୍ଧଧର୍ମାବଲମ୍ବୀ ଓ ପର୍ଯ୍ୟଟକ ଆସିବାକୁ ଏହି ରେଳପ୍ରକଳ୍ପର ଆବଶ୍ୟକତା ଥିଲା ବୋଲି କୁହାଯାଇଥିଲା। ସେଥିପାଇଁ ଲଳିତଗିରି, ରତ୍ନଗିରି ଓ ଉଦୟଗିରି ପାଇଁ ୨ଟି ଷ୍ଟେଶନ ନିର୍ମାଣ କରାଯାଇଛି। ଏହାସହ କେନ୍ଦ୍ରାପଡ଼ା ଜିଲାରେ ପୂର୍ବରୁ ଆଦୌ ରେଳପଥ ନ ଥିବାବେଳେ ପ୍ରଥମକରି ହରିଦାସପୁର-ପାରାଦୀପ ରେଳ ପ୍ରକଳ୍ପ କେନ୍ଦ୍ରାପଡ଼ା ଜିଲାକୁ ସଂଯୋଗ କରିବ ବୋଲି ରିପୋର୍ଟରେ ଦର୍ଶାଯାଇଥିଲା। ୨୦୨୧ ରେଳ ବଜେଟରେ ଏହି ରେଳ ପ୍ରକଳ୍ପର ଭିତ୍ତିଭୂମି ବିକାଶ ପାଇଁ ୧୦୦ କୋଟି ଟଙ୍କାର ବ୍ୟୟବରାଦ କରାଯାଇଥିଲା। ତଥାପି ଆଜିଯାଏ ଯାତ୍ରୀବାହୀ ଟ୍ରେନ ଚଳାଚଳ କରି ପାରିଲା ନାହିଁ। ଫଳରେ ଏହାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ଯଦି ଆସନ୍ତା ତିନି ମାସ ମଧ୍ୟରେ ଯାତ୍ରୀ ବାହୀ ଟ୍ରେନ୍ ଚଳାଚଳ ଆରମ୍ଭ କରା ନ ଯାଏ ତେବେ ଆନ୍ଦୋଳନ ତୀବ୍ରତର କରାଯିବ ବୋଲି ଆଞ୍ଚଳିକ ନାଗରିକ ମଞ୍ଚ ପକ୍ଷରୁ କୁହାଯାଇଛି। ଅନ୍ୟପକ୍ଷରେ ପାରାଦୀପ-ହରିଦାସପୁର ପାସେଞ୍ଜର ଟ୍ରେନ ଚଳାଚଳ ପାଇଁ ସମାଜବାଦୀ ପାର୍ଟି ପକ୍ଷରୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ନିକଟରେ ଟୁଇଟ ଯୋଗେ ଦାବି କରାଯାଇଛି। ସମାଜବାଦୀ ପାର୍ଟି ରାଜ୍ୟ ସଭାପତି ରବି ବେହେରା ଏନେଇ ସୂଚନା ଦେଇଛନ୍ତି। ବେହେରା କହିଛନ୍ତି, ଆସନ୍ତା ୭ତାରିଖରେ ରେଳମନ୍ତ୍ରୀ ନୀଳଗିରି-ବାଲେଶ୍ୱର ରେଳଲାଇନ ଉଦ୍ଘାଟନ ପାଇଁ ଓଡ଼ିଶା ଆସୁଛନ୍ତି। ଏହି ଦିନ ସେ ପାରାଦୀପଠାରୁ ହରିଦାସପୁର ପର୍ଯ୍ୟନ୍ତ ନୂତନ ପାସେଞ୍ଜର ଟ୍ରେନ୍ ଚଳାଚଳ ନେଇ ଘୋଷଣା କରିବାକୁ ପାର୍ଟି ପକ୍ଷରୁ ଦାବି କରାଯାଇଛି। ଏ ସମ୍ପର୍କରେ ପୂର୍ବତଟ ରେଳପଥର ଲୋକସମ୍ପର୍କ ଅଧିକାରୀ ନିରାକାର ଦାସ କହିଛନ୍ତି, ଏହି ରେଳପଥରେ କେତେକ ଷ୍ଟେଶନର ଭିତ୍ତିଭୂମି ବିକାଶ କରାଯାଉଛି। ସେହି କାମ ସରିଲା ପରେ ଯାତ୍ରୀବାହୀ ଟ୍ରେନ୍ ଚଳାଚଳ ଆରମ୍ଭ ହେବ।
