ପାକିସ୍ତାନର ପୂର୍ବତନ ବୋଲର ଦାନିଶ କାନେରିଆ ନିଜ ମନ୍ତବ୍ୟକୁ ନେଇ ସୋସିଆଲ ମିଡିଆରେ ଚର୍ଚ୍ଚାରେ ଥାନ୍ତି। ପାକିସ୍ତାନ କ୍ରିକେଟ ବୋର୍ଡର ଜଣେ ସମାଲୋଚକ କାନେରିଆ ଆଜିକାଲି ତାଙ୍କ ୟୁଟ୍ୟୁବ ଚ୍ୟାନେଲରେ ଖୋଲାଖୋଲି ନିଜ ମତ ଦେଉଛନ୍ତି। ଏହା ବ୍ୟତୀତ ହିନ୍ଦୁ ଧର୍ମରେ ଜନ୍ମିତ କାନେରିଆ ସୋସିଆଲ ମିଡିଆରେ ତାଙ୍କର ଧାର୍ମିକ ବିଶ୍ୱାସ ବିଷୟରେ ସ୍ବର ଉତ୍ତୋଳନ କରିଛନ୍ତି। ଖ୍ରୀଷ୍ଟମାସ ଅବସରରେ କାନେରିଆ ତାଙ୍କ ମା ଏବଂ ଦୁର୍ଗା ମାଙ୍କ ସହ ଏକ ଫଟୋ ଶେୟାର କରିଥିଲେ। ସେ ମା’ ଦୁର୍ଗାଙ୍କ ଫଟୋ ଶେୟାର କରି ଲେଖିଛନ୍ତି, ଏହି ମୁଣ୍ଡ କେବଳ ତୁମ ଆଗରେ ପ୍ରଣାମ କରିବ, ମା’। କାନେରିଆ ୧୯୮୦ ଡିସେମ୍ବର ୧୬ରେ କରାଚିର ସିନ୍ଧରେ ଜନ୍ମଗ୍ରହଣ କରିଥିଲେ, କିନ୍ତୁ ଗୁଜୁରାଟ ସହିତ ତାଙ୍କର ମଧ୍ୟ ସମ୍ପର୍କ ଅଛି। ତାଙ୍କ ପରିବାର ସୁରଟରୁ ପାକିସ୍ତାନ ଯାଇଥିଲେ। ପୂର୍ବତନ ଟେଷ୍ଟ ଉଇକେଟ କିପର ଅନିଲ ଦଲପତଙ୍କ ପରେ ପାକିସ୍ତାନରୁ କ୍ରିକେଟ ଖେଳିଥିବା ଦ୍ୱିତୀୟ ହିନ୍ଦୁ କ୍ରିକେଟର ହେଉଛନ୍ତି କାନେରିଆ। ନିକଟରେ ସେ ଟୁଇଟରରେ ଗୀତା ଜୟନ୍ତୀରେ ଶୁଭକାମନା ଜଣାଇଛନ୍ତି। ସେ ଏହା ମଧ୍ୟ ଲେଖିଛନ୍ତି ଯେ ଗୁଜୁରାଟୀ ହୋଇଥିବାରୁ ସେ ଗର୍ବିତ। ପ୍ରଶଂସକଙ୍କୁ ଟୁଇଟ କରି କାନେରିଆ ସାହାଯ୍ୟ ପାଇଁ ନିବେଦନ କରିଛନ୍ତି। ସେ ଲେଖିଛନ୍ତି, ମୋର ରୋଜଗାର କେବଳ ୟୁବ୍ୟୁବରୁ ଆସୁଛି, ଯଦି ଆପଣ ସମସ୍ତେ ସମର୍ଥନ କରନ୍ତି, ମୁଁ କିଛି ରୋଜଗାର କରିପାରିବି। ପାକିସ୍ତାନ ପାଇଁ ୬୧ଟି ଟେଷ୍ଟରେ ୨୬୧ ଉଇକେଟ ନେଇଛନ୍ତି। ଏହା ବ୍ୟତୀତ ୧୮ଟି ଏକଦିବସୀୟ ଖେଳି ୧୫ଟି ଉଇକେଟ ନେଇଛନ୍ତି।
