ସୋରଡ଼ା,୨୩ା୨(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବ୍ଲକର ଏକଲପୁର ପଞ୍ଚାୟତର ୪୦ରୁ ଊର୍ଦ୍ଧ୍ୱ ଚାଷୀ ଗୁରୁବାର ଧାନ କିଣାଯାଉ ନ ଥିବା ଅଭିଯୋଗରେ ତହସିଲଦାର ପ୍ରଫୁଲ୍ଲ ଚନ୍ଦ୍ର ଡାକୁଆଙ୍କୁ ୧୬ ଜଣିଆ ଦସ୍ତଖତ ସମ୍ବଳିତ ଅଭିଯୋଗପତ୍ର ପ୍ରଦାନ କରିଛନ୍ତି। ଏଥିସହ ମୁଖ୍ୟମନ୍ତ୍ରୀ,ଯୋଗାଣ ବିଭାଗ,ଜିଲାପାଳ ଓ ମୁଖ୍ୟ ଶାସନ ସଚିବଙ୍କୁ ଅଭିଯୋଗ ପତ୍ର ବି ପଠାଇଛନ୍ତି। ଟୋକନ ଥାଇ ମଧ୍ୟ ଧାନ କିଣା ଯାଉ ନ ଥିବା ସେମାନେ କହିଛନ୍ତି। ଚାଷୀ ଦେବରାଜ ନାୟକଙ୍କ କହିବା ଅନୁଯାୟୀ, ସମବାୟ ସମିତି ଧାନ ନେଉ ନାହିଁ ପଚାରିଲେ ଉତ୍ତର ମିଳୁଛି ଟାର୍ଗେଟ ନାହିଁ। ବର୍ତ୍ତମାନ ଆମେ ଧାନକୁ ସାଇତି ରଖି ମଣ୍ଡିରେ ବିକ୍ରି କରିବାକୁ ଅପେକ୍ଷା କରିଛୁ । ଏ ସମ୍ପର୍କରେ ବ୍ଲକ ଯୋଗାଣ ଅଧିକାରୀ ରସାନନ୍ଦ ସାହୁଙ୍କୁ ଯୋଗାଯୋଗ କରିବାରୁ ସେ କହିଛନ୍ତି, ବ୍ଲକର ସବୁ ପଞ୍ଚାୟତରେ ସମାନ ସମସ୍ୟା ଲାଗିରହିଛି। ଟୋକନର ଅବଧି ୩୦ ଦିନ ଥିଲା ବେଳେ ଉକ୍ତ ସମୟ ମଧ୍ୟରେ ଟାର୍ଗେଟ ଆସି ପାରୁନି। ଯାହା ଟାର୍ଗେଟ ଥିଲା କିଣା ସାରିଛି। ଆହୁରି ଅନେକ ଚାଷୀ ଧାନ ବିକ୍ରି ଅପେକ୍ଷାରେ ଥିବା ଯୋଗୁ ଜିଲା ଯୋଗାଣ ବିଭାଗକୁ ତହସିଲଦାର ନିଜେ ଟାର୍ଗେଟ ବଢାଇବାକୁ ସୂଚନା ଦେଇଛୁ ବୋଲି କହିଛନ୍ତି। ଗୋପାଳପୁର ଶାସନ ପଞ୍ଚାୟତର ୫୦୦୦ କୁଇଣ୍ଟାଲ ଓ ଗୋଛା ପଞ୍ଚାୟତର ୧୫୦୦ କୁଇଣ୍ଟାଲ ଟାର୍ଗେଟ ଅନ୍ୟ ପଞ୍ଚାୟତକୁ ଦିଆହେଇଯାଇଛି। ଫଳରେ ସେମାନେ ଏବେ ଉକ୍ତ ଟାର୍ଗେଟ ମାଗୁଥିବାରୁ ସେମାନଙ୍କୁ ଦିଆଯାଇପାରୁନି। ମୁଖ୍ୟତଃ ଯୋଗାଣ କମିଶନ ଟାର୍ଗେଟ ବଢ଼ାଇଲେ ବ୍ଲକର ଏହି ସମସ୍ୟା ସମାଧାନ ହେବ ବୋଲି କହିଛନ୍ତି।
