ନୂଆପଡ଼ା ଅଫିସ୍,୧୧।୧୨: ନୂଆପଡ଼ା ଜିଲାରେ ମଣ୍ଡି ଖୋଲିବାର ୧୦ଦିନ ବିତି ଯାଇଥିଲେ ମଧ୍ୟ ଧାନ ଉଠାଯାଇ ନାହିଁ। ନୂଆପଡ଼ା ସଦର ବ୍ଲକ ସାରାବଙ୍ଗ ପ୍ରାଥମିକ କୃଷି ସମବାୟ ସମିତି ଅଧିନସ୍ଥ ମୋହରାଡିହି ମଣ୍ଡିରେ ୮୫ଜଣ ଚାଷୀଙ୍କ ୧୦ହଜାରରୁ ଊର୍ଦ୍ଧ୍ୱ ବସ୍ତା ଧାନ ମଣ୍ଡିରେ ପଡି ରହିଛି। ଆଜକୁ ପ୍ରାୟ ୧୦ ଦିନରୁ ଊର୍ଦ୍ଧ୍ୱ ହେବ କାହାର ଦେଖା ନାହିଁ। ମିଲର୍ସ କିମ୍ବା ବିଭାଗୀୟ ଅଧିକାରୀ ଆସୁ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ମୋହରାଡିହିକୁ ଯିବା ପାଇଁ ରାସ୍ତା ନାହିଁ। ଗତ ବର୍ଷାଋତୁରେ ଲଘୁଚାପଜନିତ ଲଗାଣ ବର୍ଷାରେ ସାରାବଙ୍ଗ ପୋଲ ସମ୍ପୂର୍ଣ୍ଣ ଭାଙ୍ଗି ଯାଇଛି। ତାହା ବିପଦସଙ୍କୁଳ ଥିବାରୁ ପ୍ରଶାସନ ପକ୍ଷରୁ ରାସ୍ତାକୁ ସିଲ୍ କରି ଦିଆଯାଇଛି। ମୋହରାଡିହିକୁ ଗାଡି ଯିବା ପାଇଁ ରାସ୍ତା ନାହିଁ। ଫଳରେ ଧାନ ଉଠିବାରେ ସମସ୍ୟା ହୋଇଛି। ପ୍ରଶାସନ ଜାଣି ମଧ୍ୟ କାହିଁକି ମଣ୍ଡି କରିଛି ବୋଲି ପ୍ରଶ୍ନ ଉଠୁଛି। ଅନ୍ୟ ସ୍ଥାନରେ ମଣ୍ଡି କରିବା କଥା। ତାହା ନ କରି ଜାଣିଶୁଣି ଚାଷୀଙ୍କୁ ପ୍ରଶାସନ ହଇରାଣ କରୁଛି। ଶୀତକାକରରେ ମଣ୍ଡିରେ ଧାନ ରଖି ଦିନରାତି ଜଗି ବସିଛନ୍ତି ଚାଷୀ। କେବଳ ମୋହରାଡିହି ମଣ୍ଡି ନୁହେଁ, ଜିଲାର ୭୨ଟି ମଣ୍ଡିରେ ହଜାର ହଜାର ବସ୍ତା ଧାନ ପଡ଼ିରହିଛି। ସ୍ଥାନେ ସ୍ଥାନେ ସ୍ବଳ୍ପ ବୃଷ୍ଟିପାତ ହେବା ସହ ଆକାଶରେ ମେଘାଛନ୍ନ ଦେଖି ଚାଷୀ ଚିନ୍ତାରେ ବସିଛନ୍ତି। ପ୍ରଶାସନ ପକ୍ଷରୁ ଚଟାଣ ନିର୍ମାଣ କରାଯାଇ ନ ଥିବାରୁ ଧାନକୁ ସୁରକ୍ଷିତ ଭାବରେ ରଖିପାରୁ ନାହାନ୍ତି। ଧାନକୁ ବର୍ଷାରୁ ରକ୍ଷା କରିବା ପାଇଁ ତ୍ରିପାଲ କିମ୍ବା ପଲିଥିନ ବ୍ୟବସ୍ଥା ନ ଥିବାରୁ ବର୍ଷା ପାଣିରେ ଭିଜି ଧାନ ଗଜା ହେବାର ସମ୍ଭାବନା ରହିଛି। ନୂଆପଡା ଜିଲାର ଚାଷୀଙ୍କ ସମସ୍ୟା କେବେ ଅନ୍ତ ହେଉ ନାହିଁ। ଠିକ୍ ଧାନ ଅମଳ ହେଲାବେଳକୁ ଅଭାବି ବିକ୍ରୀର ଶିକାର ହେଉଛନ୍ତି। ନିଜ ଉପାର୍ଜିତ ଅମଳ ଧାନକୁ ମଧ୍ୟ ଚାଷୀ ସୂଚାରୁ ରୂପେ ବିକ୍ରୟ କରିପାରୁ ନାହାନ୍ତି। ଚାଷୀ ଉଚିତ ମୂଲ୍ୟ ପାଇବା ସହ ସୁବିଧାରେ ଧାନ ବିକ୍ରୟ କରିପାରିବେ ବୋଲି ସରକାର ମଣ୍ଡିର ବ୍ୟବସ୍ଥା କରିଥିଲେ ହେଁ ଚାଷୀ ଶୋଷଣର ଶିକାର ହେଉଛନ୍ତି। ବିନା କଟନୀ ଛଟନୀରେ ଧାନ ଉଠାଯାଉନାହିଁ। ମଣ୍ଡିରେ ମିଲର୍ସଙ୍କ ରାଜ ଚାଳିଛି। ପ୍ରଶାସନ ପକ୍ଷରୁ କୌଣସି ଆଖିଦୃଶିଆ ପଦକ୍ଷେପ ଗ୍ରହଣ କରାଯାଉନାହିଁ। ଫଳରେ ଚାଷୀ ମହଲରେ ଅସନ୍ତୋଷ ପ୍ରକାଶ ପାଉଛି। ଏ ସମ୍ପର୍କରେ ଜିଲା ଯୋଗାଣ ଅଧିକାରୀ ଜି.ପ୍ରଭାକର ପାତ୍ରଙ୍କୁ ପଚାରିବାରୁ ଦୁଇ ଦିନ ମଧ୍ୟରେ ସବୁ ମଣ୍ଡିର ଧାନ ଉଠିଯିବ। ମୋହରାଡିହି ପାଇଁ ରାସ୍ତା ନାହିଁ। ତାହାର ବିକଳ୍ପ ବ୍ୟବସ୍ଥା କରୁଛୁ ବୋଲି ପ୍ରକାଶ କରିଥିଲେ।
