ବୁଦାପେଷ୍ଟ, ୧୦ା୧ (ଏପି)-ବିଶ୍ୱରେ ଜୀବିତ ଥିବା ସବୁଠାରୁ ବୟସ୍କା ଅଲିମ୍ପିକ ଚାମ୍ପିୟନ ହେଲେ ଆଗ୍ନିସ କେଲେଟି। ଏବେ ସେ ୧୦୦ ବର୍ଷରେ ପଦାର୍ପଣ କରିଛନ୍ତି। କେଲେଟି ଜିମ୍ନାଷ୍ଟିକ୍ସରେ ୧୦ ଅଲିମ୍ପିକ ପଦକ ଜିତିଛନ୍ତି। ତନ୍ମଧ୍ୟରେ ୫ ସ୍ବର୍ଣ୍ଣ ରହିଛି। ଶନିବାର ସେ ତାଙ୍କ ଜନ୍ମସ୍ଥାନ ବୁଦାପେଷ୍ଟରେ ତାଙ୍କ ୧୦୦ତମ ଜନ୍ମଦିନ ପାଳିଛନ୍ତି। ସେ କହିଛନ୍ତି ତାଙ୍କ ଜୀବନର ଉପଲବ୍ଧି, ରୋମାଞ୍ଚ ଓ ଦୁଃଖଦ ଘଟଣା ଏକ ଝଲକରେ ଅତିକ୍ରମ କରିଗଲା ଭଳି ମନେହେଉଛି। ବର୍ତ୍ତମାନ ୧୦୦ ବର୍ଷରେ ପଦାର୍ପଣ କରିଥିଲେ ମଧ୍ୟ ତାଙ୍କୁ ୬୦ବର୍ଷୀୟା ଭଳି ସେ ଅନୁଭବ କରୁଥିବା କେଲେଟି ତାଙ୍କ ଜନ୍ମଦିନ ଅବସରରେ ପ୍ରକାଶ କରିଛନ୍ତି।
ତାଙ୍କ ଜୀବନୀକୁ ନେଇ “ଦି କୁଇନ୍ ଅଫ୍ ଜିମ୍ନାଷ୍ଟିକ୍ସ: ହଣ୍ଡ୍ରେଡ୍ ଇୟର୍ସ ଅଫ୍ ଆଗ୍ନିସ କେଲେଟି” ଶୀର୍ଷକ ଏକ ପୁସ୍ତକ ରଚନା ହୋଇଛି। କେଲେଟି ୧୯୨୧ରେ ଜନ୍ମ ଗ୍ରହଣ କରିଥିଲେ। ପ୍ରଥମେ ଦ୍ୱିତୀୟ ବିଶ୍ୱଯୁଦ୍ଧ ଏବଂ ପରେ ୧୯୪୦ ଓ ୧୯୪୪ରେ ଅଲିମ୍ପିକ୍ସ ବାତିଲ ଯୋଗୁ ତାଙ୍କ ଉଜ୍ଜ୍ୱଳ କ୍ୟାରିୟର ବାଧାପ୍ରାପ୍ତ ହୋଇଥିଲା। ୧୯୪୧ରେ ତାଙ୍କୁ ଜିମ୍ନାଷ୍ଟିକ୍ସ ଟିମ୍ ଛାଡ଼ିବାକୁ ହୋଇଥିଲା। କାରଣ ସେତେବେଳେ ହିଟ୍ଲରଙ୍କ ନାଜି ସେନା ଇହୁଦୀମାନଙ୍କୁ ଖୋଜି ଖୋଜି ହତ୍ୟା କରୁଥିଲେ। ଏପରିକି ନାଜି ଡେଥ୍ କ୍ୟାମ୍ପଗୁଡ଼ିକରେ ୫୦ଲକ୍ଷରୁ ଊର୍ଦ୍ଧ୍ୱ ହଙ୍ଗେରିଆନ ଇହୁଦୀଙ୍କୁ ହତ୍ୟା କରାଯାଇଥିଲା। ଯୁଦ୍ଧ ସମୟରେ ସ୍ବୀଡିଶ କୂଟନୀତିଜ୍ଞ ରାଓଲ ଓ୍ବାଲେନବର୍ଗଙ୍କ ସହାୟତା ଯୋଗୁ ତାଙ୍କ ମା’ ଓ ଭଉଣୀ ବଞ୍ଚତ୍ ଯାଇଥିଲେ। ହେଲେ ତାଙ୍କ ପିତା ଓ ଅନ୍ୟ ବନ୍ଧୁବାନ୍ଧବଙ୍କର ପତ୍ତା ମିଳି ନ ଥିଲା। ସେ ନିଜର ପରିଚୟ ଗୋପନ ରଖି ଜଣେ ପରିଚାରିକା ଭାବେ ଜୀବନ ନିର୍ବାହ କରିଥିଲେ। କେଲେଟି କହିଛନ୍ତି, ସେ ଏହି ପରିଣତ ବୟସରେ ମଧ୍ୟ ଜୀବନକୁ ଭଲ ପାଆନ୍ତି। ବର୍ତ୍ତମାନ ସେ ସୁସ୍ଥ ଜୀବନଯାପନ କରୁଛନ୍ତି।
