ଗୋପ,୧୭।୧୨ (ଡି.ଏନ୍.ଏ.):ରାସ୍ତାରେ ପଡ଼ିଥିବା ଏକ ଟଙ୍କା ଭର୍ତ୍ତି ମନିପର୍ସ ପାଇବା ପରେ ଗୋପ ବ୍ଲକ ଷୋଳପୁର ଗ୍ରାମର ଗୀତାଞ୍ଜଳି ସ୍ବାଇଁ ହଜିଥିବା ପୁରୀ ଚନ୍ଦନପୁର ଅଞ୍ଚଳର ବିଜୟ କୁମାର ଗୋଚ୍ଛାୟତଙ୍କୁ ଫେରାଇଛନ୍ତି। ସୂଚନା ଥାଉ କି, ମଙ୍ଗଳବାର ପୂର୍ବାହ୍ନରେ ଚନ୍ଦନପୁରର ବିଜୟ କୌଣସି କାମରେ ଚାରିଛକ ଯାଉଥିଲେ। ତାଙ୍କୁ ଭୋକ ହେବାରେ ଗୋପ ବିଦ୍ୟୁତ ଅଫିସ ନିକଟରେ ଏକ ଜଳଖିଆ ଦୋକାନରେ ଖାଇଥିଲେ। ଖାଇ ସାରି ମନିପର୍ସରୁ ଟଙ୍କା ଦେଇ ଫେରିବାବେଳେ ଅଜାଣତରେ ମନିପର୍ସଟି ପଡ଼ିଯାଇଥିଲା। ସେହି ରାସ୍ତା ଦେଇ ଷୋଳପୁର ଗ୍ରାମର ୫୦ ବର୍ଷୀୟା ବୃଦ୍ଧା ଗୀତାଞ୍ଜଳି ଏହି ଟଙ୍କା ଥିବା ମନିପର୍ସଟି ପାଇଥିଲେ। ପରେ ବୃଦ୍ଧା ଏହି ଟଙ୍କା ପାଇବା ସମ୍ପର୍କରେ ପଚାରିବାରେ ସେଠାରେ ଉପସ୍ଥିତ ସାଧାରଣ ଲୋକେ ମନିପର୍ସ ଖୋଲି ଦେଖିବାରେ ଚନ୍ଦନପୁର ଅଞ୍ଚଳର ଠିକଣା ଥିବା ସହ ଟେଲିଫୋନ ନମ୍ବର ପାଇଥିଲେ। ସେହି ଟେଲିଫୋନ ନମ୍ବରରେ ଫୋନ କରାଯିବାରୁ ଟଙ୍କା ହଜିଥିବା ବିଜୟ ଗୋପ ବିଦ୍ୟୁତ ଅଫିସ ନିକଟରେ ଥିବା କହିଥିଲେ। ପରେ ହୋଟେଲ ନିକଟକୁ ଆସିବାରୁ ବୃଦ୍ଧା ଜଣଙ୍କ ପାଇଥିବା ମନିପର୍ସ ଟିକୁ ଫେରାଇ ଥିଲେ। ଏହି ମନିଫର୍ସରେ ୩୦ ହଜାର ଟଙ୍କା ସହ କେତେକ ଦରକାରୀ କାଗଜପତ୍ର ଥିଲା। ଯୁବକ ଜଣଙ୍କ ଖୁସିରେ ମିଠା ଖାଇବା ଲାଗି ବୃଦ୍ଧାଙ୍କୁ ୫ ଶହ ଟଙ୍କା ଦେଇଥିଲେ।
