ଚଣ୍ଡିଖୋଲ/ବାଲିଚନ୍ଦ୍ରପୁର,୮।୨(ଡି.ଏନ.ଏ.): ପ୍ରସିଦ୍ଧ ଓଳାସୁଣୀ ଗୁମ୍ଫା ମେଳା ରବିବାର ଆରମ୍ଭ ହୋଇଛି। ପବିତ୍ର ମାଘ କୃଷ୍ଣ ଏକାଦଶୀ ତିଥିରେ ଆରମ୍ଭ ହେଇଥିବା ଏହି ମେଳା ଚଳିତ ବର୍ଷ କରୋନା କଟକଣା ଯୋଗୁ ଭକ୍ତ ଶୂନ୍ୟ ରହିଛି। ମେଳା ପଡିଆରେ କୌଣସି ଦୋକାନ ବଜାର ବସିନାହିଁ। ଯାଜପୁର ଜିଲା ପ୍ରଶାସନ ପକ୍ଷରୁ ୧୪୪ ଧାରା ଜାରି ହେବା ପରେ ଏପରି ପରିସ୍ଥିତି ସୃଷ୍ଟି ହୋଇଛି। ମହାପୁରୁଷ ସନ୍ଥ ଅରକ୍ଷିତ ଦାସଙ୍କ ୧୮୪ ତମ ବ୍ରହ୍ମଲୀନ ଦିବସରୁ ଏହି ମେଳା ଆରମ୍ଭ ହୋଇ ୧୦ ଦିନ ଚାଲିବା କଥା। ଚଳିତ ବର୍ଷ କେବଳ ପରମ୍ପରା ଓ ନୀତିକାନ୍ତି ଅନୁଯାୟୀ ମହାପୁରୁଷଙ୍କ ସମାଧି ମନ୍ଦିରରେ ପୂଜାର୍ଚ୍ଚନା ଓ ଅନ୍ୟ ସବୁ କାର୍ଯ୍ୟକ୍ରମ କରାଯାଉଛି। ମାଘକୃଷ୍ଣ ଏକାଦଶୀ ତିଥିରେ ମହାପୁରୁଷଙ୍କ ସମାଧୀ ମନ୍ଦିର ଦର୍ଶନ କଲେ ଶ୍ରୀକ୍ଷେତ୍ର ଦର୍ଶନର ଫଳ ମିଳେ ବୋଲି ଶ୍ରଦ୍ଧାଳୁଙ୍କ ବିଶ୍ୱାସ ରହିଛି। ଏକାଦଶୀ ଦିନ ପ୍ରତ୍ୟୁଷରୁ ବହୁ ମାନସିକଧାରୀ ଘରେ ମହାପୁରୁଷଙ୍କ ପ୍ରିୟ ଭୋଗ ପୋଡ ପିଠା ପ୍ରସ୍ତୁତ କରି ଲାଗି କରିବାକୁ ଆସିଥାନ୍ତି। ଚଳିତ ବର୍ଷ ସେଥିରେ ରୋକ୍ ଲାଗିଛି। ରବିବାର ଭୋରୁ ପରମ୍ପରା ଅନୁଯାୟୀ ମହାପୁରୁଷଙ୍କ ସମାଧି ମନ୍ଦିରରେ ଅଭିଷେକ, ବଡସିଂହାର ବେଶ ଓ ମହାଆଳତି ପରେ ପ୍ରଥମ ଭୋଗ ପୋଡ ପିଠା ଓ କ୍ଷୀର ଗଇଁଠା ଲାଗି କରାଯାଇଥିଲା। କେବଳ ମହାପୁରୁଷଙ୍କ ଆଶ୍ରିତ କେତେଜଣ ଶ୍ରଦ୍ଧାଳୁଙ୍କୁ ଏହି ପୀଠରେ ଦେଖିବାକୁ ମିଳିଥିଲା। ବାଲିଚନ୍ଦ୍ରପୁର ପୋଲିସ ପକ୍ଷରୁ ଏକ ପ୍ଲାଟୁନ ଫୋର୍ସ ମୁତୟନ କରାଯାଇଥିଲା।
