ନୂୂଆଦିଲ୍ଲୀ,୨।୩(ପି.ଟି.): ଭାରତରେ ୧୯୫୨ରେ ଲଢ଼ାଯାଇଥିବା ପ୍ରଥମ ଲୋକ ସଭା ନିର୍ବାଚନରୁ ୨୦୧୯ ନିର୍ବାଚନ ମଧ୍ୟରେ ପ୍ରାର୍ଥୀ ସଂଖ୍ୟା ୪ ଗୁଣରୁ ଅଧିକ ବଢ଼ିଛି। ସରକାରୀ ତଥ୍ୟ ଅନୁଯାୟୀ ୧୯୫୨ରେ ୧,୮୭୪ ପ୍ରାର୍ଥୀ ନିର୍ବାଚନ ଲଢ଼ିଥିବାବେଳେ ୨୦୧୯ରେ ପ୍ରତିଯୋଗୀଙ୍କ ସଂଖ୍ୟା ୮,୦୩୯ ରହିଥିଲା। ଏହି ଅବଧି ମଧ୍ୟରେ ନିର୍ବାଚନ ମଣ୍ଡଳୀ ପ୍ରତି ହାରାହାରି ପ୍ରାର୍ଥୀ ସଂଖ୍ୟା ୪.୬୭%ରୁ ୧୪.୮%କୁ ବଢ଼ିଛି।
ଲୋକ ସଭା ନିର୍ବାଚନ ପାଖେଇ ଆସୁଥିବାବେଳେ ଏଥିପାଇଁ ଜୋର୍ଦାର ପ୍ରସ୍ତୁତି ଆରମ୍ଭ ହୋଇଯାଇଛି। ଯଦିଓ ୧୯୫୨ ନିର୍ବାଚନଠାରୁ ପ୍ରତି ଥର ପ୍ରାର୍ଥୀ ସଂଖ୍ୟା ବଢ଼ିଚାଲିଛି, ଏଥର କେତେ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତାକୁ ଓହ୍ଲାଇବେ ତାହା ଜଣାପଡ଼ି ନାହିଁ। ତଥ୍ୟ ଅନୁଯାୟୀ ୧୯୭୭ରେ ଷଷ୍ଠ ଲୋକ ସଭା ନିର୍ବାଚନ ପର୍ଯ୍ୟନ୍ତ ପ୍ରତି ନିର୍ବାଚନ ମଣ୍ଡଳୀରେ ହାରାହାରି ପ୍ରାର୍ଥୀ ସଂଖ୍ୟା ୩ରୁ ୫ ମଧ୍ୟରେ ରହୁଥିଲା। ଗତ ନିର୍ବାଚନରେ ତାହା ୧୪.୮ରେ ପହଞ୍ଚତ୍ଥିଲା। ଅଣଲାଭଦାୟକ ସଂସ୍ଥା ପିଆର୍ଏସ୍ ଲେଜିସ୍ଲେଟିଭ୍ ରିସର୍ଚ୍ଚ ପକ୍ଷରୁ କରାଯାଇଥିବା ବିଶ୍ଳେଷଣରୁ ଜଣାପଡ଼ିଛି, ୨୦୧୯ ସାଧାରଣ ନିର୍ବାଚନରେ ୫୪୨ ସଂସଦୀୟ କ୍ଷେତ୍ରରୁ ୮,୦୩୯ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରିଥିଲେ। ତେଲଙ୍ଗାନାରେ ପ୍ରତି ସଂସଦୀୟ କ୍ଷେତ୍ରରେ ହାରାହାରି ପ୍ରାର୍ଥୀ ସଂଖ୍ୟା ସର୍ବାଧିକ ଥିଲେ। କେବଳ ନିଜାମବାଦ୍ ଆସନ ପାଇଁ ୧୮୫ ଜଣ ପ୍ରତିଦ୍ୱନ୍ଦ୍ୱିତା କରିଥିଲେ। ଏହି ଆସନକୁ ବାଦ୍ ଦେଲେ ତେଲଙ୍ଗାନାର ହାରାହାରି ପ୍ରାର୍ଥୀ ସଂଖ୍ୟା ୧୬.୧ ଥିଲା। ତେଲଙ୍ଗାନା ପରେ ତାମିଲନାଡୁରେ ପ୍ରତି ନିର୍ବାଚନ ମଣ୍ଡଳୀରେ ହାରାହାରି ପ୍ରାର୍ଥୀ ସଂଖ୍ୟା ଦ୍ୱିତୀୟ ସର୍ବାଧିକ ଥିଲା। ପ୍ରାର୍ଥୀଙ୍କ ମଧ୍ୟରୁ ଦୁଇ-ତୃତୀୟାଂଶ ସ୍ବାଧୀନ ଭାବେ ଲଢ଼ିଥିଲେ। ନିଜାମବାଦ୍ ପରେ ଦ୍ୱିତୀୟ ସର୍ବାଧିକ ପ୍ରାର୍ଥୀ କର୍ନାଟକର ବେଲଗାମ୍ ଆସନରୁ ଲଢ଼ିଥିଲେ।
ଗତ ନିର୍ବାଚନରେ ଭାଜପା ଏବଂ କଂଗ୍ରେସ ଯଥାକ୍ରମେ ୪୩୫ ଏବଂ ୪୨୦ ଆସନରେ ପ୍ରାର୍ଥୀ ଦେଇଥିବାବେଳେ ୩୭୩ ଆସନରେ ଉଭୟ ଦଳ ମଧ୍ୟରେ ଲଢ଼େଇ ହୋଇଥିଲା। ବହୁଜନ ସମାଜ ପାର୍ଟି (ବିଏସ୍ପି) ତୃତୀୟ ସର୍ବାଧିକ ପ୍ରାର୍ଥୀ ଦେଇଥିଲା। ୭ ଜାତୀୟ ଦଳ ନିର୍ବାଚନ ମଣ୍ଡଳୀ ପିଛା ୨.୬୯ ପ୍ରାର୍ଥୀ ଛିଡ଼ା କରାଇଥିବାବେଳେ ପଶ୍ଚିମବଙ୍ଗରେ ସର୍ବାଧିକ ହାରାହାରି ୪.୬ ପ୍ରାର୍ଥୀ ଲଢ଼ିଥିଲେ। ସେହିପରି ସ୍ବୀକୃତିପ୍ରାପ୍ତ ରାଜ୍ୟ ଦଳ ନିର୍ବାଚନ ମଣ୍ଡଳୀ ପିଛା ହାରାହାରି ୧.୫୩ ପ୍ରାର୍ଥୀ ଦେଇଥିଲେ।
ତଥ୍ୟ ଅନୁଯାୟୀ ୧୯୫୨ରେ ୪୮୯ ଆସନ ପାଇଁ ୧,୮୭୪ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରିଥିଲେ, ଅର୍ଥାତ୍ ପ୍ରତି ନିର୍ବାଚନ ମଣ୍ଡଳୀରେ ହାରାହାରି ୩.୮୩ ପ୍ରାର୍ଥୀ ଥିଲେ। ୧୯୭୧ରେ ମୋଟ ପ୍ରାର୍ଥୀଙ୍କ ସଂଖ୍ୟା ୨,୭୮୪କୁ ବଢ଼ିଥିବାବେଳେ ହାରାହାରି ପ୍ରାର୍ଥୀ ସଂଖ୍ୟା ୫.୩୭ ହୋଇଥିଲା। ୧୯୭୭ରେ ମୋଟ ପ୍ରାର୍ଥୀ ସଂଖ୍ୟା ୨,୪୩୯ (ହାରାହାରି ୪.୫), ୧୯୮୦ରେ ୪,୬୨୯ (ହାରାହାରି ୮.୫୪) ରହିଥିଲେ। ସେହିପରି ୧୯୮୪-୮୫ ଅଷ୍ଟମ ସାଧାରଣ ନିର୍ବାଚନରେ ମୋଟ ପ୍ରାର୍ଥୀ ସଂଖ୍ୟା ୫,୪୯୨ ଥିବାବେଳେ ହାରାହାରି ପ୍ରାର୍ଥୀସଂଖ୍ୟା ୧୦.୧୩ ରହିଥିଲା। ୧୯୮୯ରେ ମୋଟ ପ୍ରାର୍ଥୀ ୬,୧୬୦ (ହାରାହାରି ୧୧.୩୪), ୧୯୯୧-୯୨ରେ ୫୪୩ ଆସନ ପାଇଁ ମୋଟ ପ୍ରାର୍ଥୀ ୮,୬୬୮ (ହାରାହାରି ୧୫.୯୬) ରହିଥିଲେ। ଏକାଦଶ ଲୋକ ସଭା ପାଇଁ ନିର୍ବାଚନ ମଣ୍ଡଳୀ ପ୍ରତି ହାରାହାରି ପ୍ରାର୍ଥୀ ସଂଖ୍ୟା ୨୫.୬୯କୁ ବଢ଼ିଥିଲା। ସେଥର ମୋଟ ୧୩,୯୫୨ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଥିଲେ। ୧୯୯୮ରେ ମୋଟ ପ୍ରାର୍ଥୀ ୪,୭୫୦ ଥିବାବେଳେ ହାରାହାରି ପ୍ରାର୍ଥୀ ଥିଲେ ୮.୭୫। ୧୯୯୯ରେ ପ୍ରାର୍ଥୀ ସଂଖ୍ୟା ଥିଲା ୪,୬୪୮। ୨୦୦୪ରେ ୫,୪୩୫ ପ୍ରାର୍ଥୀ ଲଢ଼ିଥିବାବେଳେ ୨୦୦୯ରେ ୮,୦୭୦ ଜଣ ଏବଂ ୨୦୧୪ରେ ୮,୨୫୧ ପ୍ରାର୍ଥୀ ନିର୍ବାଚନକୁ ଓହ୍ଲାଇଥିଲେ।
