ଭଞ୍ଜନଗର,୨୨।୨(ବାବୁଲା ପ୍ରଧାନ): ଫେବୃଆରୀ ମାସରୁ ରାଜ୍ୟରେ ବର୍ତ୍ତମାନ ଗ୍ରୀଷ୍ମ ପ୍ରବାହ ଆରମ୍ଭ ହେଲାଣି । ଏହାକୁ ଦେଖିଲେ ଆଗକୁ ସ୍ଥିତି ଆହୁରି ଭୟଙ୍କର ହେବା ନେଇ ଆଶା କରାଯାଉଛି । ତାପମାତ୍ରା ଯେତେ ଅଧିକ ବଢିବ ସେହି ଅନୁପାତରେ ଜଳକଷ୍ଟ ମଧ୍ୟ ବଢିବ। ତେଣୁ ଜଳକଷ୍ଟ ଏବଂ ଗ୍ରୀଷ୍ମ ପ୍ରବାହ କୁ ମୁକାବିଲା କରିବା ପାଇଁ ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ପ୍ରଶାସନ ପକ୍ଷରୁ ବର୍ତ୍ତମାନ ଠାରୁ ପ୍ରସ୍ତୁତି ଆରମ୍ଭ ହୋଇଯାଇଛି । ଶନିବାର ଏନେଇ ଉପ ଜିଲାପାଳ ଉମା ଶଙ୍କର ବେହେରାଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଯାଇଛି ।
ଗ୍ରୀଷ୍ମ ପ୍ରବାହକୁ ନଜରରେ ରଖି ଉପଖଣ୍ଡର ବିଭିନ୍ନ ସ୍ଥାନରେ ଯୁଦ୍ଧକାଳୀନ ଭିତ୍ତିରେ ପାନୀୟଜଳ ସମସ୍ୟାର ସମାଧାନ ପାଇଁ ଉପ ଜିଲାପାଳ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଖରାପ ହୋଇ ପଡ଼ିରହିଥିବା ନଳକୂପର ତୁରନ୍ତ ମରାମତି, ସମସ୍ତ ବ୍ଲକକୁ ଆବଶ୍ୟକତା ଅନୁସାରେ ଚଳିତମାସ ଶେଷସୁଦ୍ଧା ପାନୀୟ ଜଳବଣ୍ଟନ, ମୋବାଇଲ୍ ଭ୍ୟାନ୍ ଯୋଗାଣ ଓ ଅନ୍ୟାନ୍ୟ ଜଳକ୍ଲିଷ୍ଟ ଅଞ୍ଚଳରେ ପାନୀୟଜଳ ସମସ୍ୟା ସମାଧାନ ଦିଗରେ ପଦକ୍ଷେପ ନେବାକୁ ମଧ୍ୟ କହିଥିଲେ । ଟ୍ୟୁବୱେଲ୍ଗୁଡ଼ିକୁ ଠିକ୍ କରିବା, ଅଭିଯୋଗ ରେଜିଷ୍ଟର ଠିକ୍ ରଖିବା ଏବଂ ଅଭିଯୋଗ ଆସିଥିବା ଖରାପ ଟ୍ୟୁବୱେଲ୍ଗୁଡ଼ିକୁ ୨୪ ଘଣ୍ଟା ଭିତରେ ତୁରନ୍ତ ମରାମତି କରିବା ପାଇଁ ଉପଜିଲାପାଳ ବିଭାଗୀୟ ଅଧିକାରୀ ଙ୍କୁ ନିର୍ଦ୍ଦେଶ ଦେଇଛନ୍ତି । ଏଥିରେ ଯଦି କୌଣସି ଅବହେଳା ହୁଏ ତେବେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ ।
ଏଥିସହ ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ଅଧୀନରେ ଗଞ୍ଜାମ ଜିଲା ଜଗନ୍ନାଥ ପ୍ରସାଦ ବ୍ଲକ ରୁଢାପଦର ନିକଟରେ ଚାଲିଥିବା ରାଜ୍ୟର ସବୁଠୁ ବଡ ମେଗା ପାନୀୟ ଜଳ ଯୋଗାଣ ପ୍ରକଳ୍ପ କାର୍ଯ୍ୟର ଅଗ୍ରଗତି ନେଇ ସମୀକ୍ଷା ମଧ୍ୟ କରିଥିଲେ। ପ୍ରକଳ୍ପ କାମ କିଭଳି ତ୍ବରାନ୍ବିତ ହେବ ସେନେଇ ବିଭିନ୍ନ ବିଭାଗ ବିଭାଗ ମଧ୍ୟରେ ସମନ୍ବୟ ରକ୍ଷା କରି ଶିଘ୍ର କାମ ଶେଷ କରିବାକୁ ଉପଜିଲ୍ଲାପାଳ ବିଭାଗୀୟ ଅଧିକାରୀ ଓ ଠିକା ସ଼ଂସ୍ଥାକୁ ନିର୍ଦ୍ଦେଶ ଦେଇଥିଲେ। ବୈଠକରେ ଉପଜିଲାପାଳଙ୍କ ସମେତ ସହାୟକ ଜିଲାପାଳ ରଚିତା ମହାପାତ୍ର, ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗର ଅଧିକ୍ଷଣ ଯନ୍ତ୍ରୀ ମୁନା କାଲୁଣ୍ଡିଆ ଓ ଠିକା ସଂସ୍ଥାର କର୍ମଚାରୀଙ୍କ ସମେତ ଉପଖଣ୍ଡର ଅଧିକାରୀ ମାନେ ତଥା ବିଭିନ୍ନ ବ୍ଲକରୁ ଆସିଥିବା ଗ୍ରାମ୍ୟ ଜଳ ଯୋଗାଣ ବିଭାଗର ପଦାଧିକାରୀ ପ୍ରମୁଖ ଉପସ୍ଥିତ ଥିଲେ ।
