ଯାଜପୁର ଅଫିସ,୨୩।୪: କରୋନା ସଂକ୍ରମଣର ମହାବିପତ୍ତି ସମୟରେ ଦେଶବ୍ୟାପୀ ଅକ୍ସିଜେନ୍ର ଘୋର ଅଭାବ ଦେଖାଦେଇଛି । ନାସିକ କୋଭିଡ୍ ହସ୍ପିଟାଲରେ ବୁଧବାର ଅକ୍ସିଜେନ ଅଭାବରୁ ୨୨ ରୋଗୀଙ୍କ ମୃତ୍ୟୁ ହୋଇଛି। ଏଭଳିସ୍ଥିତିରେ ଅଧିକାଂଶ ଡାକ୍ତରଖାନାରେ ଗଚ୍ଛିତ ଅକ୍ସିଜେନ ସରିବାକୁ ବସିଛି। ପରିସ୍ଥିତି ଅଣାୟତ୍ତ ହେବା ପୂର୍ବରୁ ସରକାର ଅକ୍ସିଜେନ ସୃଷ୍ଟି ପାଇଁ କି ପ୍ରକାର ପଦକ୍ଷେପ ନେଉଛନ୍ତି ତାହା ସାଧାରଣରେ ଆଲୋଚନାର ବିଷୟ ହୋଇଛି। ଯଦିଓ ଓଡ଼ିଶାରେ ସମ୍ପ୍ରତି ଅକ୍ସିଜେନର ଅଭାବ ପରିଲକ୍ଷିତ ହୋଇ ନାହିଁ, ତେବେ ଆଗାମୀ ଦିନ ପାଇଁ ବନ୍ଦ ପଡିଥିବା ଅକ୍ସିଜେନ ପ୍ଲାଣ୍ଟ କାର୍ଯ୍ୟକ୍ଷମ କରାଗଲେ ନାସିକ ଭଳି ପରିସ୍ଥିତିକୁ ଏଡ଼ାଯାଇ ପାରିବ ବୋଲି ଦାବି ଉଠିଛି।
ଯାଜପୁର ଜିଲା କଳିଙ୍ଗନଗର ନୀଳାଚଳ ଇସ୍ପାତ ନିଗମ ଲିଃ(ଏନ୍ଆଇଏନ୍ଏଲ୍)କୁ ଏଠାରେ ଉଦାହରଣ ଭାବେ ନିଆଯାଇପାରେ। ରାଜ୍ୟରେ ଏକାଧିକ ଷ୍ଟିଲ୍ ପ୍ଲାଣ୍ଟ ଗଢି ଉଠିଛି। ପ୍ରତି ଷ୍ଟିଲ୍ ପ୍ଲାଣ୍ଟରେ ଅକ୍ସିଜେନ୍ର ପ୍ରମୁଖ ଭୂମିକା ରହୁଥିବାରୁ ସେମାନେ ଅକ୍ସିଜେନ ପ୍ଲାଣ୍ଟ ସ୍ବତନ୍ତ୍ର ଭାବେ ନିର୍ମାଣ କରିଥାନ୍ତି। ଏହିକ୍ରମରେ ଯାଜପୁର ଜିଲାର କଳିଙ୍ଗନଗରରେ ପ୍ରତିଷ୍ଠିତ ଏକମାତ୍ର ରାଷ୍ଟ୍ରାୟତ୍ତ ଉଦ୍ୟୋଗ ଏନ୍ଆଇଏନ୍ଏଲ୍ ସମେତ ଟାଟା ଷ୍ଟିଲ୍ ଓ ଜିନ୍ଦଲ ଷ୍ଟେନଲେସ ଷ୍ଟିଲ୍ ପ୍ରମୁଖ କାରଖାନାରେ ଅକ୍ସିଜେନ ପ୍ରସ୍ତୁତ କରିବାକୁ ପ୍ଲାଣ୍ଟ ବସାଯାଇଛି। ତେବେ ଦୀର୍ଘ ୧ ବର୍ଷରୁ ଉର୍ଦ୍ଧ୍ୱ ସମୟ ହେଲା ନୀଳାଚଳ କାରଖାନା ବନ୍ଦ ପଡିଥିବାରୁ ଅକ୍ସିଜେନ ସେଠାରୁ ଆଉ ମିଳି ପାରୁନାହିଁ। ରାଷ୍ଟ୍ରାୟତ୍ତ ଉଦ୍ୟୋଗ ଏନ୍ଆଇଏନ୍ଏଲ୍ରେ ୨୦୧୨ରେ ଏକ ଅକ୍ସିଜେନ ପ୍ଲାଣ୍ଟ କାର୍ଯ୍ୟକ୍ଷମ ହୋଇଥିଲା। ଦୈନିକ ୪୧୮ ଟନ କ୍ଷମତା ବିଶିଷ୍ଟ ଏହି ପ୍ଲାଣ୍ଟରୁ ୫ ପ୍ରତିଶତ ଅକ୍ସିଜେନ ହସ୍ପିଟାଲମାନଙ୍କୁ ବିକ୍ରି କରିବାକୁ ଚୁକ୍ତି ରହିଥିଲା। ତଦନୁସାରେ ସ୍ବତନ୍ତ୍ର ବୈଷୟିକ ଯନ୍ତ୍ରପାତି ସ୍ଥାପନ ହୋଇଥିଲା। ବାକି ଅକ୍ସିଜେନ କାରଖାନା କାମରେ ଲାଗୁଥିଲା। ଏହି ପ୍ଲାଣ୍ଟ ପାଇଁ ୩୦୦ରୁ ଊର୍ଦ୍ଧ୍ୱ କୋଟି ଟଙ୍କା ଖର୍ଚ୍ଚ ହୋଇଥିଲା। ତେବେ ୨୦୨୦ ମାର୍ଚ୍ଚ ୩୦ରୁ ଏହି କାରଖାନା ବନ୍ଦ ରହିଥିବାରୁ ଅକ୍ସିଜେନ ପ୍ଲାଣ୍ଟ ମଧ୍ୟ ବନ୍ଦ ରହିଛି। ଏହି ବର୍ଷକ ମଧ୍ୟରେ ନୀଳାଚଳରେ କାର୍ଯ୍ୟରତ ଅଧିକାରୀ ଓ କର୍ମଚାରୀମାନେ ପୁନଃ କାରଖାନା ଚଳାଇବାକୁ ଦାବି, ଆନ୍ଦୋଳନ କରି ଆସୁଛନ୍ତି। ତେବେ ଅକ୍ସିଜେନ କାରଖାନା ବନ୍ଦ ରହିଥିବାରୁ ହସ୍ପିଟାଲମାନଙ୍କୁ ନୀଳାଚଳର ଉପତ୍ାଦନ କ୍ଷମତାର ୫ ପ୍ରତିଶତ ଅକ୍ସିଜେନ ଆଉ ମିଳୁ ନାହିଁ। ଏଭଳିସ୍ଥିତିରେ ନୀଳାଚଳ କାରଖାନାର ଅକ୍ସିଜେନ ପ୍ଲାଣ୍ଟ କାର୍ଯ୍ୟକ୍ଷମ କରାଗଲେ ବର୍ତ୍ତମାନର ଜଟିଳ ପରିସ୍ଥିତିରେ ଯାଜପୁର ଜିଲାର କିଛିଟା ଅକ୍ସିଜେନ ଅଭାବ ପୂରଣ ହୋଇପାରନ୍ତା ବୋଲି ବିଭିନ୍ନସ୍ତରରେ ମତ ପ୍ରକାଶ ପାଇଛି ।
