ନାଉଗାଁ,୧୯ା୭(ସ୍ବ.ପ୍ର.):ନାଉଗାଁ ବ୍ଲକ ଅନ୍ତର୍ଗତ ନିଆଳି -ଗଜରାଜପୁର ରାସ୍ତା ଏବେ ମରଣଯନ୍ତା ପାଲିଟିଛି। ଏହି ରାସ୍ତା ଏରେଡା ଦେଇ ନିଆଳିକୁ ସଂଯୋଗ କରୁଛି। ଏହା ଦେବୀ ନଦୀବନ୍ଧ ଉପରେ ଯାଇଛି। ପୂର୍ବରୁ ଉକ୍ତ ରାସ୍ତା ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଥିଲା। ୭ ରୁ ୮ ବର୍ଷ ତଳେ ଏହାକୁ ନିର୍ମାଣ କରାଯାଇଥିବାବେଳେ ଏବେ ଏହା ବିପର୍ଯ୍ୟସ୍ତ ହୋଇପଡ଼ିଛି। ଏହି ବାଟ ଦେଇ ନିଆଳି, କଟକ, ଭୁବନେଶ୍ୱର ଆଦିକୁ ଯାତାୟାତ କରିବା ସୁବିଧାଜନକ ହୋଇଥିବାବେଳେ ଗଳଦାରୀ, ଗଜରାଜପୁର, ନୂଆଗଁା ଓ ରୋହିଆ ଆଦି ପଞ୍ଚାୟତ ପାଇଁ ଏହା ମୁଖ୍ୟ ସଂଯୋଗୀକରଣ ରାସ୍ତା। ମାତ୍ର ଦୀର୍ଘଦିନ ହେବ ଏହା ମରାମତି ହୋଇ ନ ଥିବାରୁ ଏହାର ଅବସ୍ଥା ଶୋଚନୀୟ ହୋଇଯାଇଛି। ଦେବୀ ନଦୀରେ ଥିବା ଅରଖକୁଦ, ଗଳଦାରୀ ବାଲି ସଇରାତ ଓ ନିଆଳି ବ୍ଲକରେ ଥିବା ବାଲି ସଇରାତରୁ ପ୍ରତ୍ୟହ ବାଲି ବୋଝେଇ ଗାଡି ଏହି ବାଟ ଦେଇ ଯାଇଥାଏ। ତେବେ ଆବଶ୍ୟକୀୟଠାରୁ ଅଧିକ ଓଜନର ଭାରିଯାନ ରାସ୍ତାରେ ଚଳାଚଳ କରିବା ଯୋଗୁ ଏବେ ଏହା ଖାଲଖମାରେ ପୂରି ଯାଇଛି ବୋଲି ସ୍ଥାନୀୟ ଲୋକେ କହିଛନ୍ତି। ବର୍ଷା ଦିନ ହୋଇଥିବାରୁ ଉକ୍ତ ଖାଲରେ ବର୍ଷା ପାଣି ଜମି ବହୁ ସମୟରେ ଦୁର୍ଘଟଣା ଘଟୁଛି। ଫଳରେ ରାସ୍ତାରେ ଯାତାୟାତ କରିବା ସମ୍ଭବ ହେଉନାହିଁ ବୋଲି ଡମ୍ବରୁଧର ବସ୍ତିଆ, ଅମରଜିତ ସ୍ବାଇଁ, ମନୋଜ କୁମାର ମହାନ୍ତି, ନିହାର ରଞ୍ଜନ ସ୍ବାଇଁ ଓ ଆର୍ତ୍ତତ୍ରାଣ ନାୟକ ପ୍ରମୁଖ ପ୍ରକାଶ କରିଛନ୍ତି। ୨୭ ଡିସେମ୍ବର ୨୦୨୧ରେ ଏହି ରାସ୍ତାକୁ ଗ୍ରାମ୍ୟ ଉନ୍ନୟନ ବିଭାଗ ଅଧୀନରୁ ପୂର୍ତ୍ତ ବିଭାଗକୁ ହସ୍ତାନ୍ତର କରାଯାଇଥିବା ସୂଚନା ମିଳିଛି। ମାତ୍ର ଏପର୍ଯ୍ୟନ୍ତ ରାସ୍ତା ମରାମତି ହୋଇ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ରାସ୍ତା ମରାମତି କରିବା ପାଇଁ ପ୍ରଶାସନ ନିକଟରେ ଦାବି ହୋଇଛି। ଏ ସମ୍ପର୍କରେ ପୂର୍ତ୍ତ ବିଭାଗ ଯନ୍ତ୍ରୀ ବଳରାମ ସ୍ବାଇଁ କୁହନ୍ତି, ରାସ୍ତା ନିର୍ମାଣ ପାଇଁ ପ୍ରୋସେସିଂ କାର୍ଯ୍ୟ ଜାରି ରହିଛି।
