କଟକ ଅଫିସ, ୯ା୯: ଏସ୍ସିବି ମେଡିକାଲରେ ୨୦୦ ଶଯ୍ୟା ଓ ୨୫ଟି ଆଇସିୟୁ ବିଶିଷ୍ଟ କୋଭିଡ୍ ହସ୍ପିଟାଲ ଖୋଲିବା ପାଇଁ ସରକାର ଅନୁମୋଦନ ପ୍ରଦାନ କରିଛନ୍ତି। ଏସ୍ସିବିରେ ଗୁରୁତ୍ୱର କରୋନା ରୋଗୀଙ୍କ ପାଇଁ ୩୯ଟି ଆଇସିୟୁର ବ୍ୟବସ୍ଥା କରାଯିବ। ନୂତନ କୋଭିଡ ହସ୍ପିଟାଲ ପାଇଁ ନୂତନ ଭେଷଜ ବିଭାଗର ବିଲ୍ଡିଂରେ ଆଉ ୨୫ଟି ଆଇସିୟୁ ନିର୍ମାଣ କରାଯିବ। ଆସନ୍ତା ୨୧ ତାରିଖ ସୁଦ୍ଧା ଏହି କୋଭିଡ ହସ୍ପିଟାଲ କାର୍ଯ୍ୟକ୍ଷମ କରିବା ପାଇଁ ସମସ୍ତ ବିଭାଗୀୟ ଆନୁସଙ୍ଗୀକ କାର୍ଯ୍ୟ ୭ ଦିନ ମଧ୍ୟରେ ସାରିବାକୁ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତ(ଆରଡିସି) ଅନୀଲ କୁମାର ସାମଲ ସମସ୍ତ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏ ନେଇ ରାଜସ୍ବ ଆୟୁକ୍ତଙ୍କ ସମ୍ମିଳନୀ କକ୍ଷରେ ମଙ୍ଗଳବାର ଅନୁଷ୍ଠିତ ସମୀକ୍ଷା ବୈଠକରେ ସାମଲ ଏସ୍ସିବି କୋଭିଡ୍ ହସ୍ପିଟାଲ ପରିଚାଳନାର ସମୀକ୍ଷା କରିଛନ୍ତି। ଉକ୍ତ କୋଭିଡ୍ ହସ୍ପିଟାଲର ସୁପରିଚାଳନା ପାଇଁ ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କୁ ଆରଡିସି ନିର୍ଦ୍ଦେଶ ଦେଇଛନ୍ତି। ଏହି କୋଭିଡ୍ ହସ୍ପିଟାଲ ଦାୟିତ୍ୱରେ ଜଣେ ପ୍ରଫେସର ର଼୍ୟାଙ୍କର ବରିଷ୍ଠ ଡାକ୍ତର ରହିବେ। ହସ୍ପିଟାଲ ପାଇଁ ଆବଶ୍ୟକ ନର୍ସ, କୁଶଳୀ ଓ ଅଣକୁଶଳୀ ଏବଂ ନିରାପତ୍ତାରକ୍ଷୀ ଯୋଗଦେବାକୁ ସେ ପ୍ରକାଶ କରିଥିଲେ। ଆଇନଶୃଙ୍ଖଳା ଦୃଷ୍ଟିରୁ ସେଠାରେ ୧୫ ଜଣ ପୋଲିସ କର୍ମଚାରୀଙ୍କୁ ଏକ କ୍ୟାମ୍ପ କରି ନିୟୋଜିତ କରିବାକୁ ଡିସିପି ପ୍ରତୀକ ସିଂହଙ୍କୁ ଆରଡିସି ପରାମର୍ଶ ଦେଇଥିଲେ। ସେହିପରି ମୃତଦେହକୁ ଖୁବ୍ଶୀଘ୍ର ସେଠାରୁ ନେବା ବ୍ୟବସ୍ଥା କରିବା ପାଇଁ ସିଏମ୍ସି କମିଶନର ଅନନ୍ୟା ଦାସଙ୍କୁ ସେ ପରାମର୍ଶ ଦେଇଥିଲେ। ଏହି ହସ୍ପିଟାଲଠାରେ ସୂଚନାକେନ୍ଦ୍ର ଖୋଲାଯାଇ ରୋଗୀମାନଙ୍କ ସମ୍ପର୍କୀୟଙ୍କୁ ସୂଚନା ଦିଆଯିବ। ସେଠାରେ ଏକ ଟେଲିଫୋନ ରଖିବାକୁ ସାମଲ ଏସ୍ସିବି ପ୍ରଶାସନିକ ଅଧିକାରୀ କଳ୍ପତରୁ ବେହେରାଙ୍କୁ ନିର୍ଦ୍ଦେଶ ଦେଇଥିଲେ। ଡାକ୍ତରମାନଙ୍କ ରହିବା ପାଇଁ ଏସ୍ସିବି ମେଡିକାଲ କ୍ୟାମ୍ପସ୍ରେ ରହିଥିବା ନର୍ସିଂ ପ୍ରଶିକ୍ଷଣ ସ୍କୁଲରେ ହଷ୍ଟେଲ ବ୍ୟବସ୍ଥା କରିବାକୁ ମଧ୍ୟ ସେ ପ୍ରଶାସନିକ ଅଧିକାରୀଙ୍କୁ ପରାମର୍ଶ ଦେଇଥିଲେ। ଏହି କୋଭିଡ ହସ୍ପିଟାଲରେ ହାଉସ ସର୍ଜନଙ୍କ ସହିତ ପିଜି ଛାତ୍ରମାନେ କାର୍ଯ୍ୟ କରିବା ପାଇଁ ଦାୟିତ୍ୱ ପ୍ରଦାନ କରାଯିବାକୁ ନିଷ୍ପତ୍ତି ନିଆଯାଇଥିବା ଜଣାପଡିଛି। ଏହି ବୈଠକରେ ଜିଲାପାଳ ଭବାନୀ ଶଙ୍କର ଚୟନୀ, ଏସ୍ସିବି ମେଡିକାଲ କଲେଜର ଡିନ୍ ଏବଂ ପ୍ରିନ୍ସିପାଲ ଡା. ଦତ୍ତେଶ୍ୱର ହୋତା, ଅଧୀକ୍ଷକ ଡ. ଅନ୍ନଦା ପ୍ରସାଦ ପଟ୍ଟନାୟକ, ଜରୁରୀକାଳୀନ ଅଧିକାରୀ ଭୁବନାନନ୍ଦ ମହାରଣା, କୋଭିଡ ନୋଡାଲ ଅଧିକାରୀ, ଜନସ୍ବାସ୍ଥ୍ୟ ବିଭାଗର ନିର୍ବାହୀଯନ୍ତ୍ରୀ ସୁକାନ୍ତ ଘଡେଇ ଓ ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ପ୍ରମୁଖ ଉପସ୍ଥିତ ଥିଲେ।
