ଭୁବନେଶ୍ୱର, ୨୪।୧୧ (ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି)ର କର୍ପୋରେଶନ ବୈଠକ ବୁଧବାର ଅନୁଷ୍ଠିତ ହୋଇଯାଇଛି। ମେୟର ସୁଲୋଚନା ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଓ୍ବାର୍ଡ ନଂ ୫୫ର କର୍ପୋରେଟର ନୃପେଶ ନାୟକ ବିଏମ୍ସିର ନୂତନ ବିଲ୍ଡିଂ କାହା ନାମରେ ଅଛି ବୋଲି ପ୍ରଶ୍ନ କରିଥିଲେ। ଅନ୍ୟ କର୍ପୋରେଟର ଏବଂ ମେୟର ଏହାକୁ ସମର୍ଥନ କରିବା ସହ ଯେପର୍ଯ୍ୟନ୍ତ ସମ୍ପୃକ୍ତ ବିଲ୍ଡିଂ ବିଏମ୍ସି ନାମରେ ହୋଇନାହିଁ ସେଠାକୁ କେହି ଯିବେ ନାହିଁ ବୋଲି ମେୟର କହିଥିଲେ। ଏଥିସହ ସେଠାରେ ହୋଇଥିବା କର୍ପୋରେଶନ ମିଟିଂ ହଲ୍କୁ ଅନ୍ୟ ସମୟରେ ଭଡ଼ାରେ ଦେବା ପାଇଁ ଆଲୋଚନା ହେଉଥିବା ଚର୍ଚ୍ଚା ହୋଇଥିଲା, ଯାହାକୁ ନେଇ ବୈଠକରେ ମେୟର ଏବଂ ଅନ୍ୟ କର୍ପୋରେଟରମାନେ ଅସନ୍ତୋଷ ପ୍ରକାଶ କରିଥିଲେ। ୨୦୧୩-୧୪ ଠାରୁ ୨୦୨୦-୨୧ ମଧ୍ୟରେ ବିଏମ୍ସିର ପରିମଳ ବିଭାଗ ପାଖରେ ୨୪୨ କୋଟି ଟଙ୍କାର ହିସାବ ନ ଥିବା ବା ହେର୍ଫେର ହୋଇଥିବା ନୃପେଶ ଅଭିଯୋଗ କରିଥିଲେ। ସେହିପରି ୨୦୧୯ରେ ୬୭ଟି ଓ୍ବାର୍ଡରେ ୪୫ଟି ବେଆଇନ୍ ମୋବାଇଲ୍ ଟାଓ୍ବାର ବସାଯାଇଛି। ଏ ନେଇ ବିଏମ୍ସି ଲିଖିତ ଭାବେ ସ୍ବକାରୋକ୍ତି ଦେଇଥିଲେ ବି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ। ତେବେ ଆସନ୍ତା ସପ୍ତାହ ମଧ୍ୟରେ ଟାଓ୍ବାର ଭଙ୍ଗା ଆରମ୍ଭ ହେବ ବୋଲି ପ୍ରତିଶ୍ରୁତି ଦିଆଯାଇଛି। ସ୍ମାର୍ଟ ସିଟିରେ ଦୁର୍ନୀତି ହୋଇଛି ବୋଲି ଜଣେ କର୍ପୋରେଟର ଅଭିଯୋଗ କରିବା ପରେ ମେୟର ସ୍ମାର୍ଟ ସିଟି ଜିଏମ୍ଙ୍କ ଠାରୁ ଉତ୍ତର ମାଗିଥିଲେ। ବିଏମ୍ସି ନବନିର୍ମିତ କୋଠାରେ ଡିଲଏଟ୍ ଓ ଅନ୍ୟ ବଡ଼ କମ୍ପାନୀଙ୍କୁ ବସାଇବା ନିଷ୍ପତ୍ତି କିଏ ନେଲା? ମେୟର କିଭଳି ଜାଣିପାରିଲେ ନାହିଁ? ଯଦି ସ୍ମାର୍ଟ ସିଟି ବିଏମ୍ସି ବାହାରେ ତେବେ ପ୍ରେସ୍ମିଟ୍ କରି ସର୍ବସମ୍ମୁଖରେ ତଥ୍ୟ ରଖନ୍ତୁ ବୋଲି ସେ କହିଥିଲେ। ବୈଠକରେ କମିଶନର ତଥା ସ୍ମାର୍ଟସିଟି ସିଇଓ ବିଜୟ ଅମୃତା କୁଲାଙ୍ଗେ ମଧ୍ୟ ଉପସ୍ଥିତ ଥିଲେ ମଧ୍ୟ ନିରବ ରହିଥିଲେ। ୧୮ଟି ଓ୍ବାର୍ଡରେ ଅଳିଆ ଉଠାଇବା ପାଇଁ ପୁନଃ ଟେଣ୍ଡର କରାଯିବ ବୋଲି ସୂଚନା ଦିଆଯାଇଛି। ଯେଉଁ ମଲ୍ଗୁଡିକର ପାର୍କିଂ ପାଇଁ ସୁବିଧା ନଥିବ ସେଗୁଡିକୁ ସିଲ୍ କରାଯିବ ବୋଲି ନିଷ୍ପତ୍ତି ହୋଇଥିଲା। ଅନ୍ୟମାନଙ୍କ ମଧ୍ୟରେ ଡେପୁଟି ମେୟର ମଞ୍ଜୁଲତା କଅଁର, ମଧ୍ୟ ବିଧାୟକ ଭୁବନେଶ୍ୱରଙ୍କ ପ୍ରତିନିଧି ମିଲନ କୁମାର ପାଇକରାୟ, ଏକାମ୍ର ବିଧାୟକଙ୍କ ପ୍ରତିନିଧି ଦାଶରଥି ଗରାବଡୁ, ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ, ବିନୟ କୁମାର ଦାଶ, ସୂର୍ଯ୍ୟବଂଶୀ ମୟୂର ବିକାଶ, କର୍ପୋରେଟର ବୃନ୍ଦ ଏବଂ ଉପବିଭାଗୀୟ ମୁଖ୍ୟମାନେ ଉପସ୍ଥିତ ଥିଲେ।
