ନୂଆଦିଲ୍ଲୀ, ୩୦।୭(ପି.ଟି.)- କରୋନା ଭାଇରସ ସଂକ୍ରମଣ ଜନିତ କାରଣରୁ ଚଳିତ ବର୍ଷର ଜାତୀୟ କ୍ରୀଡ଼ା ପୁରସ୍କାର ପ୍ରଦାନ ଉତ୍ସବ ମାସେ କିମ୍ବା ୨ ମାସ ବିଳମ୍ବ ହୋଇପାରେ। ରାଷ୍ଟ୍ରପତି ଭବନରୁ ପରାମର୍ଶ ମିଳବା ପରେ ଏ ସମ୍ପର୍କରେ ଯାହାକିଛି ନିଷ୍ପତ୍ତି ନିଆଯିବ ବୋଲି କ୍ରୀଡ଼ା ମନ୍ତ୍ରଣାଳୟର ଜଣେ କର୍ମକର୍ତ୍ତା ପ୍ରକାଶ କରିଛନ୍ତି। ପ୍ରତିବର୍ଷ ଅଗଷ୍ଟ ୨୯ରେ ଜାତୀୟ କ୍ରୀଡ଼ା ଦିବସ ଅବସରରେ ରାଷ୍ଟ୍ରପତି ରାଜୀବ ଗାନ୍ଧି ଖେଳରନତ୍, ଅର୍ଜୁନ, ଦ୍ରୋଣାଚାର୍ଯ୍ୟ ଓ ଧ୍ୟାନଚାନ୍ଦ ଆଦି ଜାତୀୟ କ୍ରୀଡ଼ା ପୁରସ୍କାର ପ୍ରଦାନ କରିଥାନ୍ତି। ହକି କିମ୍ବଦନ୍ତୀ ମେଜର ଧ୍ୟାନ ଚାନ୍ଦଙ୍କ ଜନ୍ମ ଦିବସରେ ଏହି ଉତ୍ସବ ଅନୁଷ୍ଠିତ ହୋଇଥାଏ। ମାତ୍ର ଚଳିତ ବର୍ଷ ଏଥିରେ ବିଳମ୍ବ ଘଟିପାରେ। ”ରାଷ୍ଟ୍ରପତି ଭବନରୁ ଏ ସମ୍ପର୍କରେ ଏପର୍ଯ୍ୟନ୍ତ କିଛି ସୂଚନା ଆସିନାହିଁ। ତେଣୁ ନିର୍ଦ୍ଧାରିତ ସମୟରେ ଜାତୀୟ କ୍ରୀଡ଼ା ପୁରସ୍କାର ପ୍ରଦାନ କରାଯିବ କି ନାହିଁ ତାହା କହିବା କଷ୍ଟସାଧ୍ୟ“ ବୋଲି ସେ କହିଛନ୍ତି। କୋଭିଡ-୧୯ ଯୋଗୁ ଏବେ ସାରା ଦେଶରେ ସାଧାରଣ ଲୋକ ଏକତ୍ରିତ ହେବା ଉପରେ କଟକଣା ଜାରି ରହିଛି। ରାଷ୍ଟ୍ରପତି ଭବନରେ କୌଣସି ଉତ୍ସବ ମଧ୍ୟ ହେଉନାହିଁ। ଅତୀତରେ ପୁରସ୍କାର ଉତ୍ସବ ବିଳମ୍ବରେ ହେବାର ନଜିର ରହିଛି। ତେଣୁ ଏଥର ଅଗଷ୍ଟ ୨୯ରେ ହୋଇ ନ ପାରିଲେ ଆମେ ମାସେ କିମ୍ବା ୨ ମାସ ବିଳମ୍ବରେ ଦେବୁ। ବର୍ତ୍ତମାନ ପରିସ୍ଥିତିରେ ସମସ୍ତଙ୍କ ସୁରକ୍ଷାକୁ ଗୁରୁତ୍ୱ ଦିଆ ଯାଉଛି ବୋଲି ଉକ୍ତ କର୍ମକର୍ତ୍ତା ଜଣକ ପ୍ରକାଶ କରିଛନ୍ତି।
କରୋନା ସଂକ୍ରମଣ ଯୋଗୁ କ୍ରୀଡ଼ା ମନ୍ତ୍ରଣାଳୟ ପକ୍ଷରୁ ଆବେଦନର ତାରିଖକୁ ଘୁଞ୍ଚାଇ ଦିଆ ଯାଇଥିଲା। ଏପରିକି ଯୋଗ୍ୟ ଆଥଲେଟ୍ମାନେ ନିଜେ ଆବେଦନ କରିପାରିବେ ବୋଲି ସୁଯୋଗ ଦିଆ ଯାଇଥିଲା। ଫଳରେ ଏଥର ବହୁ ପରିମାଣରେ ଆବେଦନ କରାଯାଇଥିଲା ଜଣାଯାଇଛି। ଜାତୀୟ କ୍ରୀଡ଼ା ଦିବସକୁ ଆଉ ମାସେରୁ କମ୍ ସମୟ ଥିବାବେଳେ ବିଜେତା ଚୟନ ପାଇଁ କ୍ରୀଡ଼ା ମନ୍ତ୍ରଣାଳୟ ଏପର୍ଯ୍ୟନ୍ତ କମିଟି ଗଠନ କରିନାହିଁ। ଏପରିକି ଆବେଦନ ଗୁଡ଼ିକ ସ୍କ୍ରିନିଂ ମଧ୍ୟ କରାଯାଇନାହିଁ। ତେଣୁ ଏଥିରେ ବିଳମ୍ବ ହେବା ସ୍ବାଭାବିକ ମନେ ହେଉଛି।
