ପୁରୀ ଅଫିସ,୨୯।୧୦: ରାଜ୍ୟ ସରକାରଙ୍କ ଫୋକସ୍ରେ ରହିଛି ପୁରୀ। ଏଠାରେ ଅନେକ ବିକାଶମୂଳକ କାର୍ଯ୍ୟ ହାତକୁ ନିଆଯାଇଛି। ଏକାଧିକ ପ୍ରକଳ୍ପ କାମ ଚାଲିଥିବା ଆଗକୁ ଆହୁରି ଅନେକ ପ୍ରକଳ୍ପ କାମ ଆରମ୍ଭ କରାଯିବ। ତେବେ ପୁରୀ ସହର କଡ଼ରେ ରହିଥିବା ମୂଷା ନଦୀ ପ୍ରାୟ ସୁପ୍ତ ଅବସ୍ଥାରେ ରହିଛି। ଦଳ ଓ ଆବର୍ଜନାରେ ଭର୍ତ୍ତି ମୂଷା ନଦୀର ବିକାଶ କରାଯିବ। ଏହାକୁ ସମ୍ପ୍ରସାରଣ କରିବା ଲାଗି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର। ଏଥିପାଇଁ ପୁରୀ ସଦର ତହସିଲ ଅନ୍ତର୍ଗତ ୩ଟି ମୌଜା (ସମଙ୍ଗ, ମାଟିତୋଟା ଏବଂ ମାର୍କଣ୍ଡେଶ୍ୱର ସାହି)ର ୪୬.୬୦୯ ଏକର ଜମି ଅଧିଗ୍ରହଣ କରାଯିବ। ଏହି ଜମି ଅଧିଗ୍ରହଣ ନିମନ୍ତେ ସର୍ବସାଧାରଣ ଉଦ୍ଦେଶ୍ୟରେ ପ୍ରଭାବିତ ଅଞ୍ଚଳରେ ସାମାଜିକ ପ୍ରଭାବ ନିର୍ଦ୍ଧାରଣ (ଏସ୍ଆଇଏ) ସର୍ବେକ୍ଷଣ ହେବ। ଭୂମି ଅର୍ଜନ, ପୁନର୍ବାସ ଓ ଥଇଥାନରେ ଉଚିତ ମୂଲ୍ୟ ଏବଂ ସ୍ବଚ୍ଛତା ଅଧିକାର ଆଇନ-୨୦୧୩ର ଧାରା ୪ ଅନୁଯାୟୀ ଉକ୍ତ ସର୍ବେକ୍ଷଣ କରାଯିବ ବୋଲି ସରକାରଙ୍କ ପକ୍ଷରୁ ଅଧିସୂଚନା ଜାରି କରାଯାଇଛି।
ହୁଳୁହୁଳିଆ ପୋଲଠାରୁ ଦେବୀଘାଟ ପର୍ଯ୍ୟନ୍ତ ମୂଷା ନଦୀର ସମ୍ପ୍ରସାରଣ କରାଯିବ। ନଦୀର ଉଭୟ ପାର୍ଶ୍ୱରେ ଜମି ଅଧିଗ୍ରହଣ ହେବ। ପୁରୀ ସଦର ତହସିଲ ଅନ୍ତର୍ଗତ ଉପରୋକ୍ତ ୩ଟି ମୌଜାର ୪୬.୬୦୯ ଏକର ଜମି ଅଧିଗ୍ରହଣ କରାଯିବ। ଏଥିରେ ଘରୋଇ ଜମି ୩୭.୬୨୯ ଏକର ରହିଥିବା ବେଳେ ୮.୯୮୦ ଏକର ସରକାରୀ ଜମି ରହିଛି। ସମଙ୍ଗ ମୌଜାର ୨୪.୯୪୬ ଏକର ଘରୋଇ ଜମି ଏବଂ ୩.୪୦୦ ଏକର ସରକାରୀ ଜମି, ମାଟିତୋଟା ମୌଜାର ୧୦.୮୯୮ ଏକର ଘରୋଇ ଜମି ଏବଂ ୦.୦୭୨ ଏକର ସରକାରୀ ଜମି, ମାର୍କଣ୍ଡେଶ୍ୱର ସାହିର ୧.୭୮୫ ଏକର ଘରୋଇ ଜମି ଏବଂ ୫.୫୦୮ ଏକର ସରକାରୀ ଜମି ରହିଥିବା ଜଣାପଡିଛି।
