ଢେଙ୍କାନାଳ ଅଫିସ, ୫।୫ – ଡରାଉଛି କରୋନାର ଦ୍ୱିତୀୟ ଲହର। ବଢୁଥିବା ଦ୍ରୁତ ସଂକ୍ରମଣ ରୋକିବା ଲାଗି ଲକ୍ଡାଉନ୍କୁ ଅସ୍ତ୍ର ଭାବେ ପ୍ରୟୋଗ କରିଛନ୍ତି ରାଜ୍ୟ ସରକାର। ସଂକ୍ରମଣ ଚେନ୍ ଭାଙ୍ଗିବାକୁ ବୁଧବାରଠାରୁ ଆରମ୍ଭ ହେବାକୁ ଥିବା ୧୪ଦିନିଆ ତାଲାବନ୍ଦକୁ ବୁଦ୍ଧିଜୀବୀବର୍ଗ ସ୍ବାଗତ କରିଛନ୍ତି। ଅନ୍ୟପଟେ ଲକ୍ଡାଉନ୍ ସମୟରେ ଅମାନିଆଙ୍କୁ ଜଗିବା, ଭିଡ଼ କମାଇବା ସହ ବ୍ୟବସାୟିକ ପ୍ରତିଷ୍ଠାନଗୁଡ଼ିକ ଉପରେ ନଜର ରଖିବା ସହରାଞ୍ଚଳ ପ୍ରଶାସନ ଲାଗି ଚ୍ୟାଲେଞ୍ଜ ପାଲଟିଥିବାବେଳେ ଏଥିଲାଗି ଅଣ୍ଟା ଭିଡ଼ିଛି ଢେଙ୍କାନାଳ ପୌରସଂସ୍ଥା।
ଢେଙ୍କାନାଳ ସହରାଞ୍ଚଳରେ ସଂକ୍ରମଣ ବଢ଼ିବାରେ ଲାଗିଛି। ଏହାକୁ ପ୍ରତିହତ କରିବା ଲାଗି ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଥିଲେ ହେଁ ନିୟନ୍ତ୍ରଣକୁ ଆସୁନି କରୋନା। ଇତିମଧ୍ୟରେ ରାଜ୍ୟ ସରକାର ଲକ୍ଡାଉନ୍ ଘୋଷଣା କରିବା ପରେ ପ୍ରଶାସନ ସଜାଗ ହୋଇଛି। ତାଲାବନ୍ଦ ଅବ୍ୟବହିତ ପୂର୍ବରୁ ଲକ୍ଡାଉନ୍ ସମ୍ପର୍କିତ ନିୟମାବଳୀ ସମ୍ପର୍କରେ ଜନସାଧାରଣଙ୍କ ଡାକବାଜି ଯନ୍ତ୍ର ସହାୟତାରେ ପ୍ରଚାର କରାଯାଇଛି। ଏହାସତ୍ତ୍ୱେ ସମସ୍ତ ବ୍ୟବସାୟିକ ପ୍ରତିଷ୍ଠାନ ସମେତ ମଦ ଦୋକାନଗୁଡ଼ିକରେ ଅସମ୍ଭାଳ ଭିଡ଼ ପରିଲକ୍ଷିତ ହୋଇଥିଲା। ସୂଚନା ପାଇ ମଦ କାଉଣ୍ଟରଗୁଡ଼ିକରେ ପୋଲିସ ପହଞ୍ଚତ୍ ସ୍ଥିତି ନିୟନ୍ତ୍ରଣ କରିଥିଲା। ଲକ୍ଡାଉନ୍ ସମୟରେ ଯେପରି ଜନସାଧାରଣଙ୍କ କୌଣସି ସମସ୍ୟା ନ ଉପୁଜେ, ସେଥିଲାଗି ସକାଳ ୭ଟାରୁ ମଧ୍ୟାହ୍ନ ୧୨ଟା ଯାଏ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହିବ ବୋଲି ପ୍ରଶାସନ ସ୍ପଷ୍ଟ କରିଛି। ତଥାପି ଦୋକାନରେ ଅସମ୍ଭାଳ ଭିଡ଼ ବିପଦକୁ ଡାକରା ବୋଲି ବୁଦ୍ଧିଜୀବୀମାନେ କହିଛନ୍ତି।
ଅନ୍ୟପଟେ ଲକ୍ଡାଉନ୍ ପାଇଁ ରାସ୍ତାପାର୍ଶ୍ୱ ଦୋକାନୀ, ଫାଷ୍ଟଫୁଡ୍ ଏବଂ ହୋଟେଲ ବ୍ୟବସାୟୀ ଚିନ୍ତାରେ ପଡିଯାଇଛନ୍ତି। ମଧ୍ୟାହ୍ନ ପୂର୍ବରୁ ବ୍ୟବସାୟ ବନ୍ଦ କରିବା ଲାଗି ଜୋର୍ ଦିଆଯାଉଥିବାରୁ ସେମାନେ କିଭଳି ବ୍ୟବସାୟ କରିବେ ତାହାକୁ ନେଇ ଦ୍ୱନ୍ଦ୍ୱ ବଢ଼ିଛି। ସମସ୍ତଙ୍କ ପକ୍ଷ ଅନ୍ଲାଇନ୍ କାରବାର କରିବା ସମ୍ଭବପର ନ ଥିବାରୁ ଲକ୍ଡାଉନ୍ ହୋଟେଲ ବ୍ୟବସାୟ ଉପରେ ଚଡ଼କ ସଦୃଶ ବୋଲି ଅନେକେ ମତ ଦେଇଛନ୍ତି।
ଆଗରୁ ତାଲାବନ୍ଦ ହୋଇଥିଲେ ଭଲ ହୋଇଥାନ୍ତା
ବଢୁଥିବା କରୋନା ସଂକ୍ରମଣ ରୋକିବା ଲାଗି ସରକାରଙ୍କ ନିକଟରେ ଲକ୍ଡାଉନ୍ ଶେଷ ବିକଳ୍ପ ଥିଲା। ସକାଳ ୭ରୁ ମଧ୍ୟାହ୍ନ ୧୨ଟା ଯାଏ କ୍ଷୀର, ଗ୍ରସେରି, ଆମିଷ, ପରିବା ଦୋକାନ ଖୋଲା ରହିବ। ଲକ୍ଡାଉନ ଘୋଷଣା ସ୍ବାଗତଯୋଗ୍ୟ। ତାଲାବନ୍ଦ ନିଷ୍ପତ୍ତି ଆଗରୁ ହୋଇଥିଲେ ଭଲ ହୁଅନ୍ତା।
-ଶରତ ଚନ୍ଦ୍ର ପାଢ଼ୀ, ଢେଙ୍କାନାଳ ଶିଳ୍ପ ଓ ବାଣିଜ୍ୟ ପ୍ରତିଷ୍ଠାନ ସଭାପତି
ଅସାବଧାନତା ବଢ଼ାଉଛି ସଂକ୍ରମଣ
ଲୋକମାନଙ୍କ ଖାମଖିଆଲ ନୀତି ଏବଂ ଅସାବଧାନରୁ ସଂକ୍ରମଣ ବଢୁଛି। ଜୀବନ ସୁରକ୍ଷା ଲାଗି ଲକ୍ଡାଉନ୍ ନିଷ୍ପତ୍ତି ଯଥାର୍ଥ। ଏହି ସମୟରେ ସର୍ବାଧିକ ପ୍ରଭାବିତ ନିମ୍ନ ଏବଂ ମଧ୍ୟବିତ୍ତ ଶ୍ରେଣୀ ପ୍ରତି ସରକାର ଦୃଷ୍ଟି ଦେବା ଜରୁରୀ। ସେହିପରି ପୋଲିସ ମାତ୍ରାଧିକ କାର୍ଯ୍ୟାନୁଷ୍ଠାନ ବଦଳରେ ମଣିଷ ପଣିଆ ଦେଖାଇବା ଉଚିତ।
-ସୁରେଶ ପ୍ରସାଦ ମିଶ୍ର, ଅଧ୍ୟାପକ
ନିୟମ ନ ମାନିଲେ ଜୀବନ ବିପନ୍ନ
କରୋନା ସଂକ୍ରମଣକୁ ରୋକିବା ଲାଗି ରାଜ୍ୟ ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ଲକ୍ଡାଉନ ସମ୍ପର୍କିତ ନୀତି ନିୟମକୁ ସମସ୍ତେ ମାନିବା ଉଚିତ। ଟିକାକରଣ, ମାସ୍କ ପରିଧାନ, ସାମାଜିକ ଦୂରତ୍ୱ ରକ୍ଷା, ହାତ ଧୋଇବା, ପରିଷ୍କାର ପରିଚ୍ଛନ୍ନତା ଆଦି ବିଷୟକୁ ଗୁରୁତ୍ୱର ସହ ନ ମାନିଲେ ଜୀବନ ବିପନ୍ନ ହେବ।
-ବିରଞ୍ଚତ୍ ନାରାୟଣ ପାଣି, ସାମାଜିକ କର୍ମୀ
