କନ୍ୟା ସନ୍ତାନର ଜନନୀ ହେଲେ ସ୍ତୋସୁରଙ୍କ ପାର୍ଟନର
7:18 amJuly 14, 2020July 14, 2020 / 21

ମେଲବୋର୍ନ, ୧୪ା୭ (ଏ.ପି.)-ୟୁଏସ୍‌ ଓପନ ୨୦୧୧ ଚାମ୍ପିୟନ ସାମନ୍ଥା ସ୍ତୋସୁରଙ୍କ ପାର୍ଟନର ଲିଜ୍‌ ଗତ ମାସରେ ଏକ କନ୍ୟା ସନ୍ତାନ ଜନ୍ମ ଦେଇଛନ୍ତି। ହେଲେ ସେ ସୋମବାର ରାତିରେ ଇନ୍‌ଷ୍ଟାଗ୍ରାମ୍‌ରେ ଏହି ଖବରକୁ ସେ ଶେୟାର କରିବା ସହ ଏକ ଫଟୋ ମଧ୍ୟ ପୋଷ୍ଟ କରିଛନ୍ତି। ନବ ଜନ୍ମିତ ସନ୍ତାନଟିର ନାମ ସେମାନେ ଜେନିଭିଭ୍‌ ରଖିଛନ୍ତି। ସ୍ତୋସୁର ଶେୟାର କରିଥିବା ଫଟୋଟିର ଏକ କ୍ୟାପ୍‌ଶନ ଦେଇଛନ୍ତି। କରୋନା ଭାଇରସ୍‌ ଯୋଗୁ ଲକ୍‌ଡାଉନ୍‌ ବହୁ କ୍ଷେତ୍ରରେ ଚ୍ୟାଲେଞ୍ଜ ସୃଷ୍ଟି କରିଛି। ହେଲେ ଏହା ମୋ ପାଇଁ ଜୀବନର ସବୁଠାରୁ ରୋମାଞ୍ଚକ ଏବଂ ଖୁସିର ମୁହୂର୍ତ୍ତ ପାଲଟିଛି ବୋଲି ସେଥିରେ ସ୍ତୋସୁର ଲେଖିଛନ୍ତି। ପାର୍ଟନର ଲିଜ୍‌ ଜୁନ୍‌ ୧୬ ତାରିଖରେ କନ୍ୟା ସନ୍ତାନଟିକୁ ଜନ୍ମ ଦେଇଥିଲେ। ବର୍ତ୍ତମାନ ଜେନିଭିଭ୍‌ ବିନା ଆମ ଜୀବନର କୌଣସି ଅର୍ଥ ନ ଥିବା ଭଳି ମନେ ହେଉଛି ବୋଲି କହିଛନ୍ତି ଏହି ଟେନିସ୍‌ ଖେଳାଳି। ସୂଚନାଯୋଗ୍ୟ, ସ୍ତୋସୁର ୯ ବର୍ଷ ପୂର୍ବେ ଫାଇନାଲରେ ସେରେନା ଓ୍ବିଲିୟମ୍ସକୁ ପରାସ୍ତ କରି ୟୁଏସ୍‌ ଓପନ ସିଙ୍ଗଲ୍ସ ଗ୍ରାଣ୍ଡସ୍ଲାମ ଟାଇଟଲ ଜିତିଥିଲେ। ୨୦୧୦ରେ ସେ ଫ୍ରେଞ୍ଚ୍‌ ଓପନ୍‌ରେ ରନର୍ସଅପ୍‌ ହୋଇଥିଲେ। ରୋଲାଣ୍ଡ ଗ୍ୟାରୋସଠାରେ ସେ ୩ ଥର ସେମିଫାଇନାଲିଷ୍ଟ ଅଟନ୍ତି। ଡବଲ୍ସରେ ସ୍ତୋସୁର ବିଶ୍ୱର ନମ୍ବର ଓ୍ବାନ ଖେଳାଳି ହୋଇପାରିଛନ୍ତି। ସେ ୩ଥର ଗ୍ରାଣ୍ଡସ୍ଲାମ ଟ୍ରଫି ଜିତିଛନ୍ତି। ନିକଟ ଅତୀତରେ ୨୦୧୯ରେ ସେ ଅଷ୍ଟ୍ରେଲିଆନ ଓପନ ଜିତିଥିଲେ।