ନୂଆଦିଲ୍ଲୀ, ୧୧।୯ : ସୁପ୍ରିମକୋର୍ଟ ଋଣ କିସ୍ତି ପ୍ରଦାନ କ୍ଷେତ୍ରରେ ମୋରାଟୋରିୟମ ବା ଆଶ୍ୱସ୍ତି ସୁବିଧାକୁ ଚଳିତ ମାସ ୨୮ ଯାଏ ବୃଦ୍ଧି କରିଛନ୍ତି। ମୋରାଟୋରିୟମ ଅବଧି ମଧ୍ୟରେ ଯଦି କୌଣସି ବ୍ୟକ୍ତି ଋଣ କିସ୍ତି ପଇଠ କରିବାକୁ ସକ୍ଷମ ହୋଇ ନ ଥାନ୍ତି ତେବେ ତାଙ୍କ ଖାତାକୁ ବ୍ୟାଙ୍କ ଅନାଦାୟ ଋଣ(ଏନ୍ପିଏ) ଘୋଷଣା କରିପାରିବେ ନାହିଁ ବୋଲି ପୂର୍ବରୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶ ମଧ୍ୟ ବର୍ତ୍ତମାନ କାଏମ ରହିଛି। କୋଭିଡ୍-୧୯ ଦ୍ୱାରା କ୍ଷତିଗ୍ରସ୍ତ ହୋଇଥିବା ଲୋକଙ୍କୁ ଆଶ୍ୱସ୍ତି ପ୍ରଦାନ କରିବା ଲାଗି ରିଜର୍ଭ ବ୍ୟାଙ୍କ ମୋରାଟୋରିୟମ ସୁବିଧା ଘୋଷଣା କରିଥିଲା। ଏହା ମଧ୍ୟରେ ଲୋକମାନେ ଋଣ କିସ୍ତିକୁ ପ୍ରତି ମାସ ନ ଦେଲେ ମଧ୍ୟ କଟକଣା ଲାଗିବ ନାହିଁ ବୋଲି କୁହାଯାଇଥିଲା। ହେଲେ ଏହି ସମୟ ଅବଧିରେ ବ୍ୟାଙ୍କ ସୁଧ ଉପରେ ସୁଧ ଲଗାଇବା ଘଟଣା ସାମ୍ନାକୁ ଆସିଥିଲା। ଏହି ପ୍ରସଙ୍ଗ ସୁପ୍ରିମକୋର୍ଟରେ ପହଞ୍ଚିଥିଲା। ଏହା ଉପରେ ନ୍ୟାୟାଳୟ ବର୍ତ୍ତମାନ ଶୁଣାଣି କରୁଛନ୍ତି। ସରକାର ଘୋଷଣା କରିଥିବା ମୋରାଟୋରିୟମ ଅବଧି ଅଗଷ୍ଟ ୩୧ରେ ଶେଷ ହୋଇଛି।
ମୋରାଟୋରିୟମ ଅବଧିରେ ଋଣ କିସ୍ତି ଉପରେ ସୁଧ ଲାଗୁ ନ କରିବା ପ୍ରସଙ୍ଗରେ ବିଚାର କରିବାକୁ ସର୍ବୋଚ୍ଚ ନ୍ୟାୟାଳୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ସେହିଭଳି ଋଣଗ୍ରହୀତାଙ୍କ କ୍ରେଡିଟ୍ ରେଟିଂ ଉପରେ ଯେଭଳି କୌଣସି ପ୍ରଭାବ ନ ପଡେ ତାହା ଦେଖିବାକୁ କୁହାଯାଇଛି। ବର୍ତ୍ତମାନ ବଜାର କ୍ଷତିଗ୍ରସ୍ତ ହୋଇ ରହିଥିବାରୁ ଋଣ ମୋରାଟୋରିୟମ ଅବଧିକୁ ୨ ବର୍ଷ ପର୍ଯ୍ୟନ୍ତ ବଢାଯାଇପାରିବ ବୋଲି ସରକାର ସୁପ୍ରିମକୋର୍ଟଙ୍କୁ ନିକଟରେ କହିଥିଲେ। ଏହି ମାମଲାର ବିଭିନ୍ନ ଦିଗ ଉପରେ ବିଚାର କରିବା ଲାଗି ରିଜର୍ଭ ବ୍ୟାଙ୍କ ସହ ଆଲୋଚନା କରିବା ଲାଗି ସୁପ୍ରିମକୋର୍ଟ ସରକାରଙ୍କୁ କହିଛନ୍ତି।
ଜଣେ ଆବେଦନକାରୀଙ୍କ ପକ୍ଷରୁ ବରିଷ୍ଟ ଆଇନଜୀବୀ ରାଜୀବ ଦତ୍ତ ପକ୍ଷ ରଖି କହିଛନ୍ତି, ବ୍ୟାଙ୍କଗୁଡିକ ସୁଧ ଉପରେ ସୁଧ ଲାଗୁ କରିବା ଭଳି ଘଟଣା ସାମ୍ନାକୁ ଆସୁଛି। ମୋରାଟୋରିୟମ ଦ୍ୱାରା କେଉଁଠାରେ ଆଶ୍ୱସ୍ତି ମିଳିଲା ବୋଲି ସେ ପ୍ରଶ୍ନ ଉଠାଇଛନ୍ତି। ଋଣ ପୁନର୍ଗଠନ ସୁବିଧା ପୂର୍ବରୁ ଦେବାର ଆବଶ୍ୟକତା ଥିଲା। ବର୍ତ୍ତମାନ ଲୋକମାନେ ରୋଜଗାର ହରାଇଥିବା ବେଳେ ଅନେକ ସ୍ବାସ୍ଥ୍ୟ ସମସ୍ୟା ସାମ୍ନା କରୁଛନ୍ତି। ମୋରାଟୋରିୟମ ସୁବିଧାରେ ଲୋକଙ୍କୁ ସୁଧ ଛାଡ଼ , ବ୍ୟାଙ୍କଗୁଡିକ ଲାଗୁ କରୁଥିବା ସୁଧ ଉପରେ ସୁଧ ପ୍ରଦାନରୁ ଲୋକଙ୍କୁ ଆଶ୍ୱସ୍ତି ମିଳିବ କି ନାହିଁ ସେ ପ୍ରସଙ୍ଗରେ କେନ୍ଦ୍ର ସରକାର ପକ୍ଷ ସ୍ପଷ୍ଟ କରନ୍ତୁ ବୋଲି ସେ ଯୁକ୍ତିରେ କହିଛନ୍ତି।
