ଟୋକିଓ, ୨୩ା୭(ପି.ଟି.): ପ୍ରି-ଅଲିମ୍ପିକ୍ସ ଟ୍ରେନିଂ ବେଳେ ନିଖୋଜ ହୋଇଯାଇଥିବା ଉଗାଣ୍ଡାର ଭାରୋତ୍ତୋଳକ ଜୁଲିଅସ୍ ସେକିଟୋଲେକୋଙ୍କୁ ବିମାନବନ୍ଦରରେ ଭାରତ ଟ୍ରାକ୍ ଜ୍ୟାକେଟ ପରିଧାନ କରିଥିବା ଅବସ୍ଥାରେ ଦେଖିବାକୁ ମିଳିଥିଲା ବୋଲି ସ୍ଥାନୀୟ ଏକ ଟିଭି ଚ୍ୟାନେଲ ରିପୋର୍ଟରେ ପ୍ରକାଶ ପାଇଛି। ଏହି ଖବର ଟୋକିଓରେ ଉପସ୍ଥିତ ଭାରତୀୟ ଅଫିସିଆଲଙ୍କୁ ହତଚକିତ କରିଛି। ଏହି ୨୦ ବର୍ଷୀୟ ଆଥ୍ଲେଟ ସେଣ୍ଟ୍ରାଲ ଜାପାନରେ ନାରିତା ବିମାନବନ୍ଦର ଆଡକୁ ଯାଉଥିଲେ। ସେ ଏକ ଲାଲରଙ୍ଗର ଟ୍ରାକ୍ ଟପ୍ ପିନ୍ଧିଥିଲେ। ଟପ୍ର ପଛ ପଟେ ‘ଇଣ୍ଡିଆ’ ବୋଲି ଲେଖା ରହିଥିଲା। ଗୋଲ୍ଡକୋଷ୍ଟରେ ଅନୁଷ୍ଠିତ ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ାବେଳେ ଭାରତୀୟ ଆଥ୍ଲେଟମାନେ ଯେଉଁ କିଟ୍ ବ୍ୟବହାର କରିଥିଲେ ଠିକ୍ ତାହା ଭଳି ଏହା ଦେଖାଯାଉଥିଲା। ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ସାଧାରଣ ସମ୍ପାଦକ ରାଜୀବ ମେହେଟା କହିଛନ୍ତି ସେକିଟୋଲେକୋଙ୍କୁ ଯେଉଁ ପୋଷାକରେ ଦେଖିବାକୁ ମିଳିଛି ତାହା ଟୋକିଓ ଗେମ୍ସ ପାଇଁ ଦେଶର ଅଫିସିଆଲ କିଟ୍ ନୁହେଁ। ଉଗାଣ୍ଡାର ଚିଫ୍ ଡି’ ମିଶନ ଆଇଶା ନାସାଙ୍ଗା କହିଛନ୍ତି ସେକିଟୋଲେକୋ କେଉଁଠୁ ଭାରତ ଟ୍ରାକ୍ ଜ୍ୟାକେଟ ପାଇଲେ ସେ ସମ୍ପର୍କରେ ତାଙ୍କର କୌଣସି ଧାରଣା ନାହିଁ। ଭାରୋତ୍ତୋଳକ ଜଣକ ଜାପାନରେ ଟ୍ରେନିଂ ନେବା ଲାଗି ଜୁନ୍ ୧୮ରେ ଆସିଥିଲେ। ଜଣେ କେହି ତାଙ୍କୁ ଏହି ଜ୍ୟାକେଟଟି ଦେଇପାରିଥାନ୍ତି ଅବା ଏହା ପୁରୁଣା ହୋଇଥାଇପାରେ। ସେକିଟୋଲେକୋ ପୁରୁଷ ୫୬କେଜି କାଟେଗୋରିରେ ଭାଗ ନେଇଥାନ୍ତି। ଓସାକା ଅନ୍ତର୍ଗତ ଇଜୁମିସାନୋରେ ଟ୍ରେନିଂ ନେଉଥିବା ୯ ଜଣିଆ ଉଗାଣ୍ଡା ଦଳର ସେ ଅନ୍ୟତମ ସଦସ୍ୟ ଥିଲେ। ଗତ ଶୁକ୍ରବାର କୋଭିଡ୍ ଟେଷ୍ଟ ବେଳେ ସେକିଟୋଲେକୋଙ୍କୁ ଯେତେବେଳେ ଖୋଜାଗଲା ସେ ତାଙ୍କ ହୋଟେଲ ରୁମ୍ରେ ନ ଥିଲେ। ଅଫିସିଆଲ ଓ ଟିମ୍୍ମେଟ୍ମାନେ ଏନେଇ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ଟିଭି ଚ୍ୟାନେଲର ରିପୋର୍ଟ ଅନୁସାରେ ସେକିଟୋଲେକୋ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିଛନ୍ତି କି ନା ସେ ସମ୍ପର୍କରେ ସ୍ପଷ୍ଟ ନ ହୋଇ ଆଗୁଆ ଜାପାନ ପଳାଇ ଆସିଥିଲେ। ଅନ୍ତର୍ଜାତୀୟ ଭାରୋତ୍ତୋଳନ ମହାସଂଘ ତରଫରୁ ଜୁଲାଇ ୫ରେ ସୂଚାଇ ଦିଆଯାଇଥିଲା ଯେ, ସେ ଗେମ୍ସ ପାଇଁ କୋଟା ହାସଲ କରିପାରିନାହାନ୍ତି। ଏହି ଖବର ପାଇବା ପରେ ସେକିଟୋଲେକୋ ଏକ ହାତଲେଖା ଚିଠି ଛାଡ଼ି ତାଙ୍କ ହୋଟେଲ ରୁମ୍ରୁ ଫେରାର ହୋଇଯାଇଥିଲେ। ବର୍ତ୍ତମାନ ସେ ନିଜ ଦେଶକୁ ଫେରିଯିବା ଲାଗି ଚାହାନ୍ତି ନାହିଁ ବୋଲି ସେଥିରେ ଲେଖାଥିଲା। ପରବର୍ତ୍ତୀକାଳରେ ସେକିଟୋଲେକୋଙ୍କୁ ଟୋକିଓଠାରୁ ୧୭୦ କିମି ଦୂର ୟୋକାକାଇ ସହରରେ ଠାବ କରାଯାଇଥିଲା। ବୁଧବାର ତାଙ୍କୁ ଉଗାଣ୍ଡା ପଠାଇ ଦିଆଯାଇଛି।
