ଯୋଡ଼ା,୧୮ା୧୧(ଡି.ଏନ୍.ଏ): କେନ୍ଦୁଝର ଜିଲା ଯୋଡ଼ା ଖଣି ଅଞ୍ଚଳ, ଭୌଗୋଳିକ ଦୃଷ୍ଟିକୋଣରୁ ବଣ ପାହାଡ଼ ଘେରା ଏହି ଅଞ୍ଚଳରେ ରାଜ୍ୟର ଅନେକ ଛୋଟ ବଡ଼ ଲୁହାପଥର ଖଣି ରହିଛି। ଏଠାକାର ମାଟି ପଥୁରିଆ ହୋଇଥିବାରୁ ଚାଷ କରିବା ଏତେ ସହଜ ହୋଇ ନ ଥାଏ। ଏହି ମାଟିରେ ପରିବା ଚାଷ କରି ଆତ୍ମନିର୍ଭରଶୀଳ ହୋଇପାରିଛନ୍ତି ସଫଳଚାଷୀ ଗଙ୍ଗା ମୁଣ୍ଡା। ଖଣି ଅଞ୍ଚଳକୁ ସବୁଜିମା ତଥା ଶସ୍ୟଶ୍ୟାମଳାରେ ପରିଣତ କରି ଅନ୍ୟମାନଙ୍କ ପାଇଁ ପ୍ରେରଣା ସାଜିଛନ୍ତି। ତାଙ୍କ ଦ୍ବାରା ଉତ୍ପାଦିତ, ବାଇଗଣ, କୋବି, ବିନ୍ସ, ବିଲାତି ପ୍ରଭୃତି ପରିବା ବ୍ୟବସାୟୀମାନେ କିଣି ବଜାରରେ ବିକ୍ରି କରୁଛନ୍ତି। କେନ୍ଦୁଝର ଜିଲା ଖଣି ଅଞ୍ଚଳର ଯୋଡ଼ା ପୌରାଞ୍ଚଳ ଅଧୀନ ୬ ନଂ. ଓ୍ବାର୍ଡର ଗଙ୍ଗାଙ୍କୁ ନେଇ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚା।
ଏ ସମ୍ପର୍କରେ ଯୋଡ଼ା ବିକାଶ ପରିଷଦ ସଭାପତି ନିରଞ୍ଜନ ବହିଦାର କହିଛନ୍ତି, ଖଣି ଅଞ୍ଚଳ ଯୋଗୁ ପ୍ରାୟତଃ ୯୦ ପ୍ରତିଶତ ଲୋକ ଖଣି କାମରେ ନିୟୋଜିତ ରହିଥିଲେ। କିଛିବର୍ଷ ପୂର୍ବେ ଖଣିଗୁଡ଼ିକରେ ମେଶିନ ବ୍ୟବହାର ହୋଇଯିବାରୁ ଅନେକ ଶ୍ରମିକ ଶ୍ରେଣୀର ଲୋକ ରୋଜଗାର ହରାଇଲେ। ଏପରି ସ୍ଥଳେ ଗଙ୍ଗା ଖଣି ଅଞ୍ଚଳରେ ଚାଷ କରି ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। ସ୍ଥାନୀୟ ଯୋଡ଼ା ଅଞ୍ଚଳବାସୀ ତଥା ଅବସରପ୍ରାପ୍ତ ଶିକ୍ଷକ ସୋମନାଥ ମହାନ୍ତି କହିଛନ୍ତି, ଖଣି ଅଞ୍ଚଳରେ ଦିନକୁ ଦିନ ଅଧିକ ଯାନ୍ତ୍ରିକ ଖଣି କରାଯାଉଥିବାରୁ ଶ୍ରମିକମାନଙ୍କୁ ଆଉ କାମ ମିଳୁନାହିଁ। ବ୍ୟାପକ ଖଣି ଖନନ ଦ୍ୱାରା ପରିବେଶ ପ୍ରଦୂଷଣ ହେବା ସହିତ ଜମିର ଉର୍ବରତା ନଷ୍ଟ ହେଉଛି। ତଥାପି ନିଜର ଦୃଢ଼ ଇଚ୍ଛାଶକ୍ତି ଓ ପରିଶ୍ରମ ବଳରେ ଗଙ୍ଗା ଖଣି ଅଞ୍ଚଳରେ ଜଣେ ସଫଳ ଚାଷୀ ରୂପେ ନିଜକୁ ପ୍ରତିଷ୍ଠିତ କରିପାରିଛନ୍ତି। ଗଙ୍ଗାଙ୍କ ସ୍ତ୍ରୀ ସୁମିତ୍ରା ମୁଣ୍ଡା କୁହନ୍ତି, କାମଧନ୍ଦା ଅଭାବରୁ ଚାଷକାମକୁ ଆପଣେଇଛନ୍ତି। ତାଙ୍କୁ କିଛି ସରକାରୀ ପ୍ରୋତ୍ସାହନ ମିଳିଲେ ତାଙ୍କ ପରିବାର ଆହୁରି ଅଧିକ କିଛି କରିପାରନ୍ତେ ବୋଲି ସେ କହିଥିଲେ।
