ନୟାଗଡ଼ ଅଫିସ,୯।୨: ନୟାଗଡ଼ ଜିଲାରେ ଧାନ କ୍ରୟ ଶେଷ ହୋଇ ଆସୁଛି । ଏଭଳିସ୍ଥଳେ ଧାନକିଣାରେ ଦେଖା ଦେଇଥିବା ଅବ୍ୟବସ୍ଥା ଦୂର ହୋଇ ପାରୁନି । ଓଡ଼ଗଁା ବ୍ଲକ ପଞ୍ଚରିଡା ମାନପୁର ଧାନକ୍ରୟ କେନ୍ଦ୍ର(ମଣ୍ଡି)ରେ ମିଲରକୁ ଅପେକ୍ଷା କରି ବସିଛନ୍ତି ଚାଷୀ । ଅଥଚ ମିଲର ଆସୁ ନାହାନ୍ତି କି ଧାନ ନେବା ପାଇଁ ଗାଡ଼ି ପଠାଉ ନାହାନ୍ତି । କେତେଜଣ ଚାଷୀଙ୍କ ଟୋକନ ଅବଧି ଶେଷ ହେବାକୁ ବସିଛି। ଏଭଳିସ୍ଥଳେ ଗତ ପାଳିରେ ଚାଷୀ ମଣ୍ଡିଠାରୁ ୧ କିମି ଦୂର ଯାଇ ମିଲରଙ୍କୁ ଧାନ ବିକ୍ରି କରିଥିଲା । ଏଥର ଅବସ୍ଥା ପୁରା ଅସମ୍ଭାଳ ହେଲାଣି । ଏନେଇ ଚାଷୀ ଗଙ୍ଗା ରାଉତ ଓ ଭଗବାନ ଭୋଳ କୁହନ୍ତି, ପଞ୍ଚରିଡ଼ା ମାନପୁର ଓ ଗୋଡ଼ିପଲ୍ଲି ପାଇଁ ପଞ୍ଚରିଡ଼ା ମାନପୁରଠାରେ ମଣ୍ଡି ଖୋଲିଛି । ତେବେ ସମ୍ବଲପୁର ମିଲର ଧାନ କିଣିବାକୁ ଆସୁ ନାହାନ୍ତି । ନୟାଗଡ଼ ମିଲରଙ୍କଠାରୁ ସମ୍ବଲପୁର ମିଲର ଭଲ ହୋଇଥିଲେ ହେଁ ଆମ ମଣ୍ଡିକୁ କାହିଁକି ଅଣଦେଖା କରୁଛି ବୁଝାପଡୁନି । ଗତ ଶୁକ୍ରବାରଠାରୁ ଧାନ ବିକ୍ରି କରିବାକୁ ଚାଷୀମାନେ ଅପେକ୍ଷା କରି ବସିଛନ୍ତି ।
ବଡ଼ ଚାଷୀଙ୍କ ଟୋକନ ଆସିନି: ବଡ଼ ଓ ମଧ୍ୟବିତ୍ତ ଚାଷୀଙ୍କ ଧାନ ବିକ୍ରି ପାଇଁ ଟୋକନ ଆସୁନି । ଟୋକନ ଆସିବ କି ନାହିଁ ଜଣାପଡୁ ନାହିଁ । ଚାଷୀମାନେ କାହିଁକି ଟୋକନ ଆସୁନି ବୋଲି ପାକ୍ସ ସମ୍ପାଦକ ଓ ଯୋଗାଣ ବିଭାଗକୁ ବାରମ୍ବାର ପଚାରୁଛନ୍ତି। ତେବେ ସମସ୍ତଙ୍କଠାରୁ ଉତ୍ତର ମିଳୁଛି ଅପେକ୍ଷା କର, ଟୋକନ ଆସିବ । ଅନ୍ୟପକ୍ଷେ ଟୋକନ ଥାଇବି କେତେଜଣ ଚାଷୀ ଧାନ କିଣାର ଅବ୍ୟବସ୍ଥା ଦେଖି ମଣ୍ଡିକୁ ଯାଉ ନାହାନ୍ତି । ସ୍ବଳ୍ପ ଦାମରେ ଚାଷୀ ବ୍ୟବସାୟୀଙ୍କୁ ଧାନ ବିକ୍ରି କରୁଛି । ଚାଷୀଙ୍କ ସମସ୍ୟା ସମାଧାନ ହେଉ ନ ଥିବାରୁ ମଧ୍ୟସ୍ଥି, ବ୍ୟବସାୟୀମାନେ ମିଲର ଓ ପାକ୍ସ ସମ୍ପାଦକଙ୍କୁ ଧରାଧରି କରି ଭଲ ଦୁଇ ପଇସା ରୋଜଗାର କରୁଛନ୍ତି । ମିଲର ଓ ପାକ୍ସ ସମ୍ପାଦକ ମଧ୍ୟ ଅନୁରୂପ ଭାବେ ମଧ୍ୟସ୍ଥି ଓ ବ୍ୟବସାୟ ଯୋଗୁ ଲାଭରେ ରହୁଛନ୍ତି ।
ମଧ୍ୟସ୍ଥି କରୁଛନ୍ତି ପାକ୍ସ କର୍ମଚାରୀ: ଚଢ଼େୟାପଲି ପାକ୍ସର କେତେଜଣ କର୍ମଚାରୀ କଳସାଖମଣ ପାକ୍ସ ଅଞ୍ଚଳରୁ ଧାନ କିଣୁଛନ୍ତି। ସେହି ଧାନକୁ କେତେଜଣ ଚାଷୀଙ୍କୁ ହାତଗୁଞ୍ଜା ଦେଇ ଚଢ଼େୟାପଲି ପାକ୍ସରେ ବିକ୍ରୟ କରୁଛନ୍ତି । ପାକ୍ସ କର୍ମଚାରୀଙ୍କ ଏହି ମଧ୍ୟସ୍ଥି ନୀତକୁ ଚାଷୀମାନେ ନାପସନ୍ଦ କରୁଛନ୍ତି । ହେଲେ ଆଦିବିସୀ ଅଧ୍ୟୁଷିତ ଅଞ୍ଚଳର ଏପରି ଅସୁବିଧାକୁ ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି । ଅପରପକ୍ଷେ ଚଢ଼େୟାପଲି ଓ କଳାସଖମଣ ପାକ୍ସରେ ନେଟ୍ୱାର୍କ କାମ କରୁ ନାହିଁ । ଏଣୁ ସେଠାରେ ଅଫ୍ଲାଇନରେ ଧାନ କିଣା ଚାଲିଛି । ଗତ ବର୍ଷ ଅଫ୍ଲାଇନରେ ଧାନ କିଣା ହୋଇ ୩୦ରୁ ଊର୍ଦ୍ଧ୍ୱ ଚାଷୀଙ୍କ ଧାନ କିଣା ଟଙ୍କା ଆତ୍ମସାତ୍ କରାଯାଇଥିଲା । ଏଠାର ଚାଷୀମାନେ ବିଷ ବୋତଲ ଧରି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅନଶନ କରିଥିଲେ। ଚଳିତ ବର୍ଷ ପୁଣି ସେହିପରି ଧାନ କିଣାରେ ଅନିୟମିତତା ହୋଇଥିବାର ଅଭିଯୋଗ ହୋଇଛି । ଏଣୁ ଯୋଗାଣ ବିଭାଗ ଓ ପ୍ରଶାସନ ଆଗୁଆ ଏ ଦିଗରେ ପଦକ୍ଷେପ ନେବାକୁ ଦାବି କରାଯାଇଛି।
