ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟରେ ଉନ୍ନତ ଚିକିତ୍ସା ସୁବିଧା ନାହିଁ। ଆଇସିୟୁ, ଭେଣ୍ଟିଲେଟର ନ ଥିବା ଯୋଗୁ ଗୁରୁତର ରୋଗୀ ପଡ଼ୋଶୀ ଜିଲା ଏବଂ ଆନ୍ଧ୍ରପ୍ରଦେଶ ଉପରେ ନିର୍ଭର କରୁଛନ୍ତି। ବିଭିନ୍ନ ରୋଗର ପରୀକ୍ଷା ପାଇଁ ମେଶିନ ରହିଥିଲେ ମଧ୍ୟ ସେଗୁଡ଼ିକ ଚଳାଇବା ନିମନ୍ତେ ଆବଶ୍ୟକ କର୍ମଚାରୀଙ୍କ ଅଭାବ ରହିଛି। ସେହିପରି ଆଧୁନିକ ଯନ୍ତ୍ରପାତିର ଅଭାବ ମଧ୍ୟ ରହିଛି। ଏଥିପାଇଁ ଅନେକ ଗରିବ ଲୋକ ବାହାରକୁ ଯାଇ ନ ପାରି ମୃତ୍ୟୁମୁଖରେ ପଡ଼ୁଛନ୍ତି। ତେଣୁ ଜିଲାରେ ମେଡିକାଲ କଲେଜ ଆଣ୍ଡ ହସ୍ପିଟାଲ ପ୍ରତିଷ୍ଠା ପାଇଁ ବାରମ୍ବାର ଦାବି ହୋଇଆସୁଛି। ୩୨୭.୪୦ କୋଟି ଟଙ୍କା ବ୍ୟୟରେ ଏକ ମେଡିକାଲ କଲେଜ ଆଣ୍ଡ ହସ୍ପିଟାଲ ପ୍ରତିଷ୍ଠା କରିବାକୁ ଚାହୁଁଥିବା ରାଜ୍ୟ ସ୍ବାସ୍ଥ୍ୟମନ୍ତ୍ରୀ ୨୦୧୪ ମସିହାରେ ବିଧାନସଭାରେ ଘୋଷଣା କରିଥିଲେ। ଏଥିପାଇଁ ଜମି ଚିହ୍ନଟ ହୋଇଥିବା ମଧ୍ୟ କୁହାଯାଇଥିଲା। ହେଲେ ଏ ପର୍ଯ୍ୟନ୍ତ କାମ ଆଗେଇ ପାରିନାହିଁ। ଜିଲାକୁ ଉପେକ୍ଷା କରାଯାଉଥିବାରୁ ଜିଲାବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି।
ରାୟଗଡ଼ା ଅଫିସ,୨୯।୧୨- ଉପାନ୍ତ ରାୟଗଡ଼ା ଜିଲାରେ ମେଡିକାଲ କଲେଜ ଆଣ୍ଡ ହସ୍ପିଟାଲ ପ୍ରତିଷ୍ଠା ନେଇ କେନ୍ଦ୍ର ସରକାର ସମ୍ମତି ଦେଇଥିଲେ। କେନ୍ଦ୍ର ସରକାରଙ୍କ ଭାଏବିଲିଟି ଗ୍ରାଫ୍ ଫଣ୍ଡିଂ ମାଧ୍ୟମରେ ରାୟଗଡ଼ା ଜିଲାରେ ଏକ ମେଡିକାଲ କଲେଜ ପ୍ରତିଷ୍ଠା ନିମନ୍ତେ ନିଷ୍ପତ୍ତି ନିଆଯାଇଥିଲା। ୨୦୧୪ରେ ଓଡ଼ିଶା ସରକାର ୩୨୭.୪୦ କୋଟି ଟଙ୍କା ବ୍ୟୟରେ ଏକ ମେଡିକାଲ କଲେଜ ଆଣ୍ଡ ହସ୍ପିଟାଲ କରିବାକୁ ଚାହୁଁଥିବା କଥା ସ୍ବାସ୍ଥ୍ୟମନ୍ତ୍ରୀ ବିଧାନସଭାରେ ମଧ୍ୟ ଘୋଷଣା କରିଥିଲେ। ଏଥିପାଇଁ ୨୦-୨୫ ଏକର ଜାଗା ଚିହ୍ନଟ ହୋଇଛି ବୋଲି ସରକାର ଘୋଷଣା କରିଥିଲେ। ହେଲେ ଅଦ୍ୟାବଧି ମେଡିକାଲ କଲେଜ ଆଣ୍ଡ ହସ୍ପିଟାଲ ପ୍ରତିଷ୍ଠା ନେଇ କୌଣସି ଅଗ୍ରଗତିର ସୂଚନା ନାହିଁ। ତେଣୁ ଜିଲାବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି।
କେନ୍ଦ୍ର ସରକାର ଦେଶରେ ୭୫ ମେଡିକାଲ କଲେଜ ପ୍ରତିଷ୍ଠା ନେଇ ଘୋଷଣା କରିଥିଲେ। ଏଥିପାଇଁ ସ୍ବଳ୍ପ ସେବା ରହିତ ଓ ଆସ୍ପିରେଶନାଲ ଜିଲାଗୁଡ଼ିକରେ (ଯେଉଁଠାରେ ପୂର୍ବରୁ ମେଡିକାଲ କଲେଜ ହସ୍ପିଟାଲ ନାହିଁ) ସେହି ଜିଲାର ମୁଖ୍ୟ ଚିକିତ୍ସାଳୟରେ ୨୦୦ ଶଯ୍ୟାର ସୁବିଧା ରହିଥିବ, ସେଠାରେ ଅଗ୍ରାଧିକାର ଭିତ୍ତିରେ ମେଡିକାଲ କଲେଜ ପ୍ରତିଷ୍ଠା ପାଇଁ ଅନୁଦାନ ଦିଆଯିବ ବୋଲି କୁହାଯାଇଥିଲା। କେନ୍ଦ୍ର ସରକାରଙ୍କ ନୀତି ଆୟୋଗର ଘୋଷଣା ଅନୁଯାୟୀ ରାୟଗଡ଼ା ଜିଲା ଏକ ପଛୁଆ ଏବଂ ଆସ୍ପିରେଶନାଲ ଜିଲା ଭାବେ ପରିଚିତ। ଏଠାରେ ୩୦୦ ଶଯ୍ୟାର ସୁବିଧା ମଧ୍ୟ ହୋଇପାରିବ। ଜିଲା ମେଡିକାଲ କଲେଜ ଆଣ୍ଡ ହସ୍ପିଟାଲ ପାଇଁ ହକ୍ଦାର ବୋଲି ରାୟଗଡ଼ାର ବହୁ ସଙ୍ଗଠନ ମିଳିତ ଭାବେ ପୂର୍ବରୁ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କୁ ଦେଇଥିଲେ। ଏ ନେଇ ଆଉ କେତୋଟି ସଙ୍ଗଠନ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ମଧ୍ୟ କରିଛନ୍ତି। ହେଲେ କୌଣସି ସୁଫଳ ମିଳିନାହିଁ। କୋରାପୁଟ ଏମ୍ପି ସପ୍ତଗିରି ଉଲାକା ଦିଲ୍ଲୀରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀଙ୍କୁ ଭେଟି ମେଡିକାଲ କଲେଜ ପାଇଁ ଦାବି ଜଣାଇବା ସହ ଡିଟେଲ ପ୍ରୋଜେକ୍ଟ ରିପୋର୍ଟ (ଡିପିଆର) ପ୍ରସ୍ତୁତ କରି କେନ୍ଦ୍ର ସରକାରଙ୍କୁ ପଠାଇବାକୁ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଅନୁରୋଧ କରିଥିଲେ। ସେହିପରି ଆଦିବାସୀ କଲ୍ୟାଣ ବିଭାଗ ମନ୍ତ୍ରୀ ଜଗନ୍ନାଥ ସାରକା, ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ଉପଦେଷ୍ଟା ସୁଧୀର ଦାଶ ଏବଂ ଅନ୍ୟ ସ୍ଥାନୀୟ ନେତା ମଧ୍ୟ ମିଳିତଭାବେ ମୁଖ୍ୟମନ୍ତ୍ରୀଙ୍କୁ ଭେଟି ଦାବି ଜଣାଇଛନ୍ତି। କିନ୍ତୁ ଏ ପର୍ଯ୍ୟନ୍ତ ରାଜ୍ୟ ସରକାରଙ୍କ ପକ୍ଷରୁ ଡିପିଆର ପ୍ରସ୍ତୁତ ହୋଇପାରୁ ନ ଥିବାରୁ କାମ ଆଗକୁ ବଢ଼ିପାରୁ ନ ଥିବା ଜଣାପଡ଼ିଛି।
ଏମାନେ ଯାହା କୁହନ୍ତି..
ଏ ସମ୍ପର୍କରେ ବାରମ୍ବାର କେନ୍ଦ୍ର ଏବଂ ରାଜ୍ୟ ସରକାରଙ୍କ ନିକଟରେ ଦାବି ଜଣାଇଛୁ, କିନ୍ତୁ କୌଣସି ସୁଫଳ ମିଳୁନାହିଁ। ରାଜ୍ୟ ସରକାରଙ୍କ ନିର୍ଦ୍ଦେଶରେ ସ୍ବାସ୍ଥ୍ୟ ବିଭାଗ ପକ୍ଷରୁ ଜିଲା ପ୍ରଶାସନ ଏକ ଡିପିଆର୍ ପ୍ରସ୍ତୁତ କରି କେନ୍ଦ୍ରକୁ ପଠାଇବା ଆବଶ୍ୟକତା ରହିଛି। ହେଲେ ଶାସକ ଦଳ ଡିପିଆର ପ୍ରସ୍ତୁତ କରିବାକୁ ଚାହୁଁନାହାନ୍ତି। ତେଣୁ ମେଡିକାଲ କଲେଜ ବିଷୟ ଆଗକୁ ବଢ଼ି ପାରୁନାହିଁ ବୋଲି ସେ କହିଛନ୍ତି।
ସପ୍ତଗିରି ଉଲାକା, ଏମ୍ପି କୋରାପୁଟ
ମୋ ପାଖରେ ଖବର ନାହଁ। ଆମକୁ ସରକାରଙ୍କ ଯାହା ନିର୍ଦ୍ଦେଶ ଆସିବ, ଆମେ କରିବୁ ବୋଲି ସେ କହିଛନ୍ତି। ତେବେ ଆବଶ୍ୟକତାକୁ ଦୃଷ୍ଟିରେ ରଖି ଶୀଘ୍ର ମେଡିକାଲ କଲେଜ ଆଣ୍ଡ ହସ୍ପିଟାଲ ପ୍ରତିଷ୍ଠା କରାଯାଉ ବୋଲି ଜିଲାବାସୀ ଦାବି କରିଛନ୍ତି।
ଡା. ଆର୍ତ୍ତବନ୍ଧୁ ନାୟକ, ସିଡିଏମ୍ଓ, ରାୟଗଡ଼ା
