ଭୁବନେଶ୍ୱର, ୪।୪(ବ୍ୟୁରୋ): ବ୍ରିଟେନରେ ଦେଖା ଦେଇଥିବା କରୋନାର ନୂଆ ଭାରିଆଣ୍ଟ ‘ଏକ୍ସଇ’ ଅଧିକ ଲୋକଙ୍କୁ ଆକ୍ରାନ୍ତ କରିପାରେ। ଏହା ଓମିକ୍ରନର ସବ୍ ଭାରିଆଣ୍ଟ ଓ ଅତି ଶୀଘ୍ର ବ୍ୟାପିବାର ସମ୍ଭାବନା ରହିଛି। କିନ୍ତୁ ଡେଲ୍ଟା ପରି ଏହା ଏତେ ମାରାତ୍ମକ ହେବ ନାହିଁ। ‘ଏକ୍ସଇ’ ଲୋକଙ୍କ ମୃତ୍ୟୁର କାରଣ ହୋଇ ନ ପାରେ ବୋଲି ସ୍ବାସ୍ଥ୍ୟ ବିଶେଷଜ୍ଞ ଡା. ନିରୋଜ ମିଶ୍ର କହିଛନ୍ତି। ଏ ସମ୍ପର୍କର ସୂଚନା ଦେଇ ଡା. ମିଶ୍ର କହିଛନ୍ତି, ଏହି ନୂଆ ଭାରିିଆଣ୍ଟ ଉପରେ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ବି ନଜର ରଖିଛନ୍ତି। ଯେହେତୁ ନୂଆ ନୂଆ ଭାରିଆଣ୍ଟ ଆସୁଛି, ତେଣୁ ମାସ୍କ ପିନ୍ଧିବା ନେଇ ଲୋକଙ୍କୁ ଟିକିଏ ସଚେତନ କରିବା। ଏବେ ଧୀରେ ଧୀରେ ମାସ୍କ ପିନ୍ଧିବା କମିଛି। ଆଉ କିଛିଦିନ ପରେ ମାସ୍କ ପିନ୍ଧିବା ଆହୁରି କମିଯିବ। କିନ୍ତୁ ମାସ୍କ ସମ୍ପୂର୍ଣ୍ଣ ହଟାଇ ଦେବା ଉଚିତ ହେବ ନାହିଁ। କାରଣ ସଂକ୍ରମଣ ସରିନାହିଁ। ଯେଉଁଠି ଶତାଧିକ ଲୋକ ଏକାଠି ହୋଇଛନ୍ତି, ସେଠାରେ ମାସ୍କ ପିନ୍ଧିବା ଉଚିତ। ଏସବୁ ଦିଗକୁ ଧ୍ୟାନ ଦେବାକୁ ହେବ ବୋଲି ଡା. ମିଶ୍ର ଗୁରୁତ୍ୱାରୋପ କରିଛନ୍ତି।
ଅପରପକ୍ଷେ ରାଜ୍ୟରେ କରୋନା ସଂକ୍ରମଣ ଆହୁରି କମିଛି। ଦୈନିକ ୫୦ ତଳକୁ ସଂକ୍ରମିତଙ୍କ ସଂଖ୍ୟା ରହୁଛି। ରବିବାର ଆଉ ୩୬ଜଣ ଚିହ୍ନଟ ହୋଇଥିବାବେଳେ ୬ଜଣ ୧୮ବର୍ଷରୁ କମ୍ ବୟସ୍କ ରହିଛନ୍ତି। ଏହି ଆକ୍ରାନ୍ତମାନେ ୧୧ଟି ଜିଲାରୁ ଚିହ୍ନଟ ହୋଇଥିବାବେଳେ ୧୯ ଜିଲାରେ ଆଦୌ ସଂକ୍ରମଣ ହୋଇନାହିଁ। ସେପଟେ କୋରାପୁଟ, ନୟାଗଡ଼ ଓ କେନ୍ଦୁଝର ଜିଲା ଏବେ କରୋନାମୁକ୍ତ ହୋଇଥିବା ରାଜ୍ୟ କୋଭିଡ୍ ଡ୍ୟାସ୍ବୋର୍ଡର ତଥ୍ୟରୁ ଜଣାପଡ଼ିଛି।
