ଚିତ୍ରକୋଣ୍ଡା,୨୨ା୧୨(ଡି.ଏନ୍.ଏ.): ମାଲକାନଗିରି ଜିଲାର ସ୍ବାଭିମାନ ଅଞ୍ଚଳରେ ପୁଣି ମାଓବାଦୀଙ୍କ ହିଂସା ଦେଖିବାକୁ ମିଳିଛି। ସ୍ବାଭିମାନ ଅଞ୍ଚଳ ଯନ୍ତ୍ରୀ ପଞ୍ଚାୟତ ସନ୍ନ୍ୟାସୀଗୁଡ଼ା ଗ୍ରାମର ଗୋଟିଏ ପରିବାରକୁ ପ୍ରଜାକୋର୍ଟରେ ନିର୍ଯାତନା ଦିଆଯିବା ସହ ଗାଁରୁ ବିତାଡ଼ିତ କରିଛନ୍ତି ମାଓବାଦୀ। ଦୁଇଦିନ ତଳେ ସ୍ବାଭିମାନ ଅଞ୍ଚଳର ସନ୍ନ୍ୟାସୀଗୁଡା ଗ୍ରାମରେ ମାଓବାଦୀ ପହଞ୍ଚି ପ୍ରଜାକୋର୍ଟ କରିଥିଲେ। ଏହି ଗ୍ରାମର ମାନୁ ଗୋଲରୀଙ୍କୁ ପ୍ରଜାକୋର୍ଟରେ ହାଜର ହେବାକୁ କୁହାଯାଇଥିଲା। ତେବେ ପ୍ରଜାକୋର୍ଟରେ ମାନୁଙ୍କୁ ପୋଲିସ ଇନ୍ଫର୍ମର ଭାବେ ଦୋଷୀ ସାବ୍ୟସ୍ତ କରାଯାଇଥିଲା। ଗତ ନଭେମ୍ବର ୨୬ ଏବଂ ଡିସେମ୍ବର ୧୩ରେ ସିଙ୍ଗରାମ ଗ୍ରାମରେ ହୋଇଥିବା ପୋଲିସ ଏନ୍କାଉଣ୍ଟରକୁ ସନ୍ଦେହ କରି ମାନୁ ଗୋଲରୀକୁ ନିର୍ଯାତନା ଦେବା ସହ ଗାଁରୁ ତୁରନ୍ତ ଚାଲିଯିବାକୁ ଧମକ ଦିଆଯାଇଥିଲା।
ପରିବାର ଲୋକଙ୍କଠାରୁ ମିଳିଥିବା ସୂଚନାନୁଯାୟୀ, ମାନୁଙ୍କ ଦୁଇ ପୁଅ ମାଧବ ଓ ରାଜୁ ତିନି ଚାରି ବର୍ଷ ହେଲା ମାଓବାଦୀଙ୍କର ଧମକରେ ଚିତ୍ରକୋଣ୍ଡା ଜନଜାତି କାର୍ଯ୍ୟାଳୟରେ ବିସ୍ଥାପିତ ହୋଇ ରହି ଆସୁଥିଲେ। ସିଙ୍ଗାରାମ ଏନ୍କାଉଣ୍ଟର ପୂର୍ବରୁ ପୁଅ ମାଧବ ଗାଁକୁ ବୁଲିବାକୁ ଯାଇଥିଲେ। ସେମାନେ ପୋଲିସକୁ ସୂଚନା ଦେଇଥିବାର ମାଓବାଦୀମାନେ ସନ୍ଦେହ କରି ମାନୁଙ୍କ ପରିବାରକୁ ଗାଁ ଛାଡ଼ି ଚାଲି ଯିବାକୁ କହିଥିଲେ। ତାଙ୍କ ପରିବାର ଗାଁ ଛାଡ଼ି ତାଙ୍କର ଜଣେ ସମ୍ପର୍କୀୟଙ୍କ ଘରେ ଆଶ୍ରୟ ନେଇଥିଲେ। ପରେ ଡଙ୍ଗାରେ ମଙ୍ଗଳବାର ଚିତ୍ରକୋଣ୍ଡାରେ ପହଞ୍ଚିଛନ୍ତି। ଏବେ ଚିତ୍ରକୋଣ୍ଡା ଜନଜାତି କାର୍ଯ୍ୟାଳୟରେ ଦୁଇ ପୁଅ ମାଧବ ଓ ରାଜୁଙ୍କ ପାଖରେ ବାପା ମାନୁ ଗଲୋରୀ, ସ୍ତ୍ରୀ ମଲା, ଝିଅ ବୈଦେହୀ ଅଛନ୍ତି। ଚିତ୍ରକୋଣ୍ଡା ପୋଲିସ ମନୁ ଓ ତାଙ୍କ ପରିବାରକୁ ଉଦ୍ଧାର କରି ଚିତ୍ରକୋଣ୍ଡାରେ ଆଶ୍ରୟ ଦେଇଛନ୍ତି।
