ନୟାଗଡ଼ ଅଫିସ,୧୩।୨: ବହୁଚର୍ଚ୍ଚିତ ନୟାଗଡ଼ ସଦର ଥାନା ଯଦୁପୁରର ୫ ବର୍ଷୀୟା ଶିଶୁକନ୍ୟା ପରୀ ହତ୍ୟା ମାମଲାରେ କଲେଜ ଛାତ୍ରଙ୍କ ସ୍ବରର ସ୍ତର ନିରୀକ୍ଷଣ (ଏଲ୍ଭିଏ) (ଲୟାର ଭଏସ୍ ଆନାଲେସିସ୍) ପାଇଁ ଏସ୍ଆଇଟି କରିଥିବା ଆବେଦନ ଚିଲ୍ଡ୍ରେନ କୋର୍ଟରେ ଶୁକ୍ରବାର ଶୁଣାଣି ହୋଇଛି। ସେହିପରି ରିମାଣ୍ଡ ସମୟରେ କଲେଜ ଛାତ୍ରଙ୍କୁ ମାଡ଼ ଓ ନିର୍ଯାତନା ଅଭିଯୋଗର ଶୁଣାଣି ମଧ୍ୟ ଅନୁରୂପ ଭାବେ କରାଯାଇଛି। ରାୟ ସଂରକ୍ଷିତ ରହିଛି। ଆସନ୍ତା ୧୯ ତାରିଖରେ ରାୟ ପ୍ରକାଶ ପାଇବ ବୋଲି ସରକାରୀ ଓକିଲ ଅନ୍ୱାର ମଲ୍ଲିକ ଓ କଲେଜ ଛାତ୍ରଙ୍କ ଓକିଲ ଚନ୍ଦ୍ରବିଜୟୀ ମିଶ୍ର କହିଛନ୍ତି।
ଅନ୍ୟପକ୍ଷେ ପରୀ ମା’ଙ୍କ ବ୍ଲଡ ଗ୍ରୁପ, ପରୀର ଜଙ୍ଘହାଡ଼ ଓ ଫ୍ରକ୍, କଲେଜ ଛାତ୍ରଙ୍କ ଭଉଣୀଙ୍କ ମୋବାଇଲ ପରୀକ୍ଷା ପାଇଁ ତାଙ୍କ ପାଖରେ ଟେକ୍ନୋଲୋଜି ନ ଥିବା ଦର୍ଶାଇ କୋଲକତା ସେଣ୍ଟ୍ରାଲ ଫରେନ୍ସିକ ସାଇନ୍ସ ଲାବୋରାଟରୀ ଫେରାଇ ଦେଇଛି। ଗତ ୧୦ ତାରିଖରେ ଏନେଇ ଏସ୍ଆଇଟି ଚିଲ୍ଡ୍ରେନ କୋର୍ଟକୁ ଅବଗତ କରାଇଥିଲା। ପରେ କୋର୍ଟଙ୍କ ଅନୁମତିକ୍ରମେ ଗୁଜରାଟ ଗାନ୍ଧୀନଗର ଫରେନ୍ସିକ୍ ସାଇନ୍ସ ଲାବୋରାଟାରୀକୁ ଏହାର ପରୀକ୍ଷଣ ପାଇଁ ପଠେଇବାକୁ ଅନୁମତି ମିଳିଛି। ତେବେ ସେଣ୍ଟ୍ରାଲ ଫରେନ୍ସିକ ସାଇନ୍ସ ଲାବୋରାଟରୀ ଉପରୋକ୍ତ ସାମଗ୍ରୀ ଫେରାଇ ଦେଇଥିବାବେଳେ ଗୁଜରାଟ ରାଜ୍ୟ ସରକାରଙ୍କ ଲାବୋରେଟୋରୀ କିପରି ସଫଳ ହେବ ସେନେଇ କଲେଜ ଛାତ୍ରଙ୍କ ଓକିଲ ମିଶ୍ର ପ୍ରଶ୍ନ କରିଛନ୍ତି।
