ଭୁବନେଶ୍ୱର, ୪।୯(ବ୍ୟୁରୋ): ରାଜ୍ୟରେ ଆଇନ ତା’ ନିଜ ବାଟରେ ଯାଉନାହିଁ। ଶାସକ ବିଜେଡିର ତୁଙ୍ଗନେତା ଏହାର ବଡ଼ ବାଧକ ସାଜିଛନ୍ତି ା ରାଜ୍ୟରେ ଘଟିଯାଉଥିବା ପ୍ରମୁଖ ହତ୍ୟାକାଣ୍ଡ ଓ ଦୁର୍ନୀତି ପଛରେ ଶାସକ ବିଜେଡିର ବହୁ ମନ୍ତ୍ରୀ ଓ ନେତାଙ୍କ ସମ୍ପୃକ୍ତି ଯୋଗୁ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଛି। ଅନ୍ୟପକ୍ଷରେ ମୁଖ୍ୟମନ୍ତ୍ରୀଙ୍କ ନିକଟରେ ସବୁ ସତ୍ୟାସତ୍ୟ ଖବର ଅଛି ନା ନାହିଁ ବୋଲି ଭାଜପା ପ୍ରଶ୍ନ କରିଛି।
ଭାଜପା ରାଜ୍ୟ କାର୍ଯ୍ୟାଳୟଠାରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଦଳର ବିଧାୟକ ମୋହନ ମାଝି କହିଛନ୍ତି, ଯେତେବେଳେ ରାଜ୍ୟର ବିପର୍ଯ୍ୟସ୍ତ ଆଇନ ଶୃଙ୍ଖଳା ପ୍ରସଙ୍ଗରେ ଭାଜପା ତରଫରୁ ବିଧାନସଭା ଜରିଆରେ ମୁଖ୍ୟମନ୍ତ୍ରୀଙ୍କୁ ଅବଗତ କରିବା ପାଇଁ ସୁଯୋଗ ଥିଲା, ସେତେବେଳେ ଶାସକ ବିଜେଡି କଂଗ୍ରେସ ସହାୟତାରେ ଭଣ୍ଡୁର କରିଛି ା ମୁଖ୍ୟମନ୍ତ୍ରୀ ଯଦି ସବୁ ଘଟଣା ଜାଣି ନୀରବ ରହି ଦୋଷୀଙ୍କ ପାଇଁ ଢାଲ ସାଜୁଛନ୍ତି, ତେବେ ଏହା ଆହୁରି ଅଧିକ ଦଣ୍ଡନୀୟ ଅପରାଧ। ଆପରାଧିକ କାର୍ଯ୍ୟରେ ଶାସକ ବିଜେଡି ମନ୍ତ୍ରୀ ଓ ନେତାଙ୍କ ସମ୍ପୃକ୍ତି ବର୍ତ୍ତମାନ ହାଟରେ ପଡ଼ି ଦାଣ୍ଡରେ ଗଡ଼ିଲାଣି ା ରାଜ୍ୟ ମନ୍ତ୍ରିମଣ୍ଡଳରେ ୮ ଜଣ ମନ୍ତ୍ରୀଙ୍କ ବିରୋଧରେ ସଙ୍ଗିନ ଆପରାଧିକ ଓ ଦୁର୍ନୀତିର ଅଭିଯୋଗ ରହିଛି ା ପରୀ ହତ୍ୟାକାଣ୍ଡରେ ମନ୍ତ୍ରୀ ଅରୁଣ ସାହୁ, ମାହାଙ୍ଗା ଡବଲ ମର୍ଡର ଘଟଣାରେ ମନ୍ତ୍ରୀ ପ୍ରତାପ ଜେନା, ପାରଳାଖେମୁଣ୍ଡି ଏସିଏଫ୍ଙ୍କ ସନ୍ଦେହଜନକ ମୃତ୍ୟୁ ଘଟଣାରେ ମନ୍ତ୍ରୀ ବିକ୍ରମ କେଶରୀ ଆରୁଖଙ୍କ ସମେତ ଅନ୍ୟ ନେତାଙ୍କ ଆପରାଧିକ ଓ ଦୁର୍ନୀତି ସମ୍ପୃକ୍ତିର ଅଭିଯୋଗର ତଦନ୍ତକୁ ବାଟବଣା କରିବା ପାଇଁ କ୍ଷମତାର ଅପବ୍ୟବହାର କରିବା ଅତ୍ୟନ୍ତ ନିନ୍ଦନୀୟ। ଏକାଧିକ ଆପରାଧିକ ମାମଲାରେ ସମ୍ପୃକ୍ତ ମାନସ ଦାସଙ୍କୁ ସୁରକ୍ଷା ଦିଆଯିବା ରାଜ୍ୟର ଧ୍ୱସ୍ତ ଆଇନଶୃଙ୍ଖଳାକୁ ବର୍ଣ୍ଣନା କରୁଛି। ଏହି ସମୟରେ ଶାସକ ଦଳର ମୁଖ୍ୟ ସଚେତକ ଏସବୁ ଘଟଣାକୁ ‘ଛୋଟିଆ ଘଟଣା’ ବୋଲି କହିବା ଅତ୍ୟନ୍ତ ଦୁର୍ଭାଗ୍ୟଜନକ। ବିଧାନସଭା ଗୃହ କାର୍ଯ୍ୟରେ ରାଜ୍ୟର ବିପର୍ଯ୍ୟସ୍ତ ଆଇନ ଶୃଙ୍ଖଳା ପ୍ରସଙ୍ଗରେ ଆଲୋଚନା ହେବା ପାଇଁ ଭାଜପା ତରଫରୁ ବାଚସ୍ପତିଙ୍କ ଜରିଆରେ ଗୃହରେ ଏକ ମୁଲତବୀ ପ୍ରସ୍ତାବ ଅଣାଯାଇଥିଲା। କଂଗ୍ରେସ ଦଳର ବରିଷ୍ଠ ବିଧାୟକ ନରସିଂହ ମିଶ୍ର ଛିଡ଼ାହୋଇ ବିଧାନସଭା ପ୍ରଶ୍ନକାଳକୁ ବନ୍ଦ କରିବା ପାଇଁ ଚେଷ୍ଟା କରିଥିଲେ। ଏହାର ମାତ୍ର ଗୋଟିଏ ମିନିଟ୍ ଭିତରେ ବାଚସ୍ପତି ବିଧାନସଭା କାର୍ଯ୍ୟକୁ ମୁଲତବୀ ଘୋଷଣା କରିବା ଏକ ଯୋଜନାବଦ୍ଧ ନାଟକ ଥିଲା ବୋଲି ସେ ଅଭିଯୋଗ କରିଛନ୍ତି।
