ପାଟଣା, ୨୪।୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ମୁଷାଖୋରୀ ପଞ୍ଚାୟତ ରଥପଡ଼ା, ଭାଲୁଘର, ବଡ଼ପଡିଆପଶି ଓ ମୂଷାନାଳୀ ଗ୍ରାମର ଶତାଧିକ ପରିବା ଚାଷୀ ଭୋଟ ନ ଦେବାରୁ ଚାଷ ଜମିକୁ ପାଣି ଦିଆଯାଉନି ବୋଲି ଅଭିଯୋଗ କରିଛନ୍ତି। ଏହି ଚାଷୀ ମାନେ ସୋମବାର ମୂଷାଖରୀ ସରପଞ୍ଚ ଭାମାମଣୀ ଦାସଙ୍କୁ ଭେଟି ମୂଷାଖରୀ ଆହାର ବନ୍ଧରୁ ପାଣି ଛାଡିବାକୁ ନିବେଦନ କରିଛନ୍ତି। ପାଣି ବିନା ସେମାନଙ୍କର ପରିବା ଫସଲ ସହ ସୋରିଷ, ସୂର୍ଯ୍ୟମୁଖୀ ଚାଷ ଉଜୁଡି ଯିବ ବୋଲି ଆଶଙ୍କା ପ୍ରକାଶ କରିଛନ୍ତି। ଏହି ଚାଷୀ ମାନେ ପ୍ରତିବର୍ଷ ଆହାର ବନ୍ଧରୁ କେନାଲ ଜରିଆରେ ପାଣି ନେଇ ଚାଷ କରୁଥିଲେ। ହେଲେ ଚଳିତ ବର୍ଷ ପଞ୍ଚାୟତ ନିର୍ବାଚନରେ ବନ୍ଧକୁ ନିଲାମରେ ନେଇଥିବା ସ୍ବୟଂ ସହାୟିକା ମହିଳା ଗୋଷ୍ଠୀର ସମର୍ଥକ ସରପଞ୍ଚ ପ୍ରାର୍ଥୀ ହାରିଯିବାରୁ ଚାଷୀଙ୍କ ଜମିକୁ ପାଣି ଛାଡିବାକୁ ମନା କରିଦେଇଥିବା ଚାଷୀମାନେ କହିଛନ୍ତି। ଚାଷୀଙ୍କ ଜମିକୁ ତୁରନ୍ତ ପାଣି ବ୍ୟବସ୍ଥା କରିବାକୁ ପ୍ରଭାବିତ ଚାଷୀ ମାନେ ଦାବି କରିଛନ୍ତି। ଏସମ୍ପର୍କରେ ମୂଷାଖରୀ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ଅକ୍ଷୟ କୁମାର ସାହୁ କହିଛନ୍ତି, ଉକ୍ତ ବନ୍ଧକୁ ଦୁଇଟି ସ୍ବୟଂ ସହାୟିକା ଗୋଷ୍ଠୀଙ୍କୁ ମାଛ ଚାଷ କରି ସାବଲମ୍ବୀ ହେବାକୁ ୩ବର୍ଷ ପର୍ଯ୍ୟନ୍ତ ୨ଲକ୍ଷ ୫୫ ହଜାର ଟଙ୍କାର ଲିଜ୍ ସୂତ୍ରରେ ଦିଆଯାଇଛି। ନିୟମ ଅନୁଯାୟୀ ବନ୍ଧ ୭ ଫୁଟରୁ ଉଦ୍ଧର୍ବ ପାଣି ଥିଲେ ବନ୍ଧରୁ ଚାଷ ଜମିକୁ ପାଣି ଛଡ଼ାଯିବାର ବ୍ୟବସ୍ଥା ରହିଛି। ଏବେ ବନ୍ଧରେ ୧୨ ଫୁଟ ଉପରେ ପାଣି ଥାଇ ଚାଷୀଙ୍କୁ ପାଣି ଦିଆଯାଉ ନ ଥିବା ଅଭିଯୋଗ ହେବା ପରେ ସମସ୍ତ ଘଟଣା ସମ୍ପର୍କରେ ବିଡିଓ ଈଶ୍ୱର ଚନ୍ଦ୍ର ନାଏକଙ୍କୁ କାର୍ଯ୍ୟାନୁଷ୍ଠାନ ପାଇଁ ଅବଗତ କରାଯାଇଛି। ସବିଶେଷ ତଥ୍ୟ ଅନୁଯାୟୀ ସରପଞ୍ଚ ଉଭୟ ପକ୍ଷଙ୍କୁ ସମାଧାନ କରିବା ପାଇଁ ପଞ୍ଚାୟତ କାର୍ଯ୍ୟାଳୟକୁ ଡାକିଛନ୍ତି।
