ଯାଜପୁର ଅଫିସ/ପ୍ରୀତିପୁର (ଡି.ଏନ.ଏ.),୨୭ା୧୨:ଯାଜପୁର ଜିଲା ବିଞ୍ଝାରପୁର ବ୍ଲକ ଅଞ୍ଚଳର ଅଧିକାଂଶ ଚାଷୀ ପ୍ରାୟ ପ୍ରତିବର୍ଷ ଛୋଟବଡ଼ ବନ୍ୟା ଯୋଗୁ କ୍ଷତିଗ୍ରସ୍ତ ହେଉଛନ୍ତି। ଏଥିଯୋଗୁ ଚାଷୀମାନଙ୍କ ଆର୍ଥିକ ସ୍ଥିତି ଦୁର୍ବଳ ହେବା ସହ ପାରିବାରିକ ଅଶାନ୍ତି ବଢ଼ିବାରେ ଲାଗିଛି। ବନ୍ୟା ଜଳ ନିଷ୍କାସନର ସ୍ଥାୟୀ ବ୍ୟବସ୍ଥା ଅଦ୍ୟାବଧି ହୋଇପାରିନାହିଁ। ଆଜକୁ ପ୍ରାୟ ୧୦ ବର୍ଷ ହେବ ଅରେଇ, ଚିକଣା, ଗୁହାଳି, କହେଣା ରଘୁନାଥପୁର, ବରପଦା, କପିଳା, ମାଂସଡା, ଆଉଁରୀ, ହଳଦୀଢ଼ଇ, ଟିଣା, ପ୍ରୀତିପୁର, ଅଳକୁଣ୍ଡ, ବାଛୋଳ, ଓଳେଇ ଚନ୍ଦନପୁର, ସିଂହପୁର, ଜରି ପ୍ରଭୃତି ପଞ୍ଚାୟତର ଚାଷୀଙ୍କ ଜମିରେ ପାଣି ଜମି ରହୁଛି। ଏଥିଯୋଗୁ ଚାଷୀଙ୍କ ଶତାଧିକ ଏକର ଜମିରେ ଫସଲ ହୋଇପାରୁ ନାହିଁ। ଡ୍ରେନେଜ ବିଭାଗ ପକ୍ଷରୁ ନାଳ ସଫେଇ ଓ ଖୋଳେଇ ନଁାରେ ମିଥ୍ୟା ବିଲ ଭାଉଚର କରି ବାର୍ଷିକ ବିପୁଳ ସରକାରୀ ଅର୍ଥ ଲୁଟ୍ କରାଯାଉଛି। ଏଭଳି ଅଭିଯୋଗ ନେଇ ନବନିର୍ମାଣ କୃଷକ ସଂଗଠନର ବିଞ୍ଝାରପୁର ଶାଖା ପକ୍ଷରୁ ସୋମବାର ଜିଲାପାଳଙ୍କ ଅଭିଯୋଗ ଶୁଣାଣି ଶିବିରରେ ଏକ ସ୍ମାରକପତ୍ର ପ୍ରଦାନ କରାଯାଇଛି।
ସ୍ମାରକପତ୍ରରେ ଦର୍ଶାଯାଇଛି ଯେ, ବର୍ଷା ଦିନରେ ନାଳର ବିଭିନ୍ନ ସ୍ଥାନରେ ଧୀବରମାନେ ଆଡ଼ିବନ୍ଧ କରି ମାଛ ଧରୁଥିବାରୁ ପାଣି ନିଷ୍କାସନରେ ସମସ୍ୟା ସୃଷ୍ଟି ହେଉଛି। ବହୁବାର ଧୀବର ଓ ଚାଷୀଙ୍କ ମଧ୍ୟରେ ଗଣ୍ଡଗୋଳ, ମାରପିଟ ହୋଇ ମାମଲା ଥାନା ଓ ତହସିଲ ପର୍ଯ୍ୟନ୍ତ ଯାଇଛି। କିନ୍ତୁ ଚାଷୀଙ୍କ ଜମିରୁ ଇଞ୍ଚେ ହେଲେ ପାଣି ନ କମିବା ଯୋଗୁ ଧାନ ତଥା ଅନ୍ୟ ଅର୍ଥକରୀ ଫସଲ ହୋଇ ପାରୁନାହିଁ। ଏଥିଯୋଗୁ ବିଞ୍ଝାରପୁର ବ୍ଲକର ଅନେକ ହଜାର ଏକର ଜମି ପଡ଼ିଆ ପଡ଼ିଛି। ଏ ସମ୍ପର୍କରେ ଜିଲାପାଳ ଚକ୍ରବର୍ତ୍ତୀ ସିଂହ ରାଠୋର ଡ୍ରେନେଜ ବିଭାଗର ଅଧୀକ୍ଷଣ ଯନ୍ତ୍ରୀଙ୍କୁ ଡାକି ଆସନ୍ତା ଖରିଫ ଋତୁ ପୂର୍ବରୁ ପାଣି ନିଷ୍କାସନର ସ୍ଥାୟୀ ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଛନ୍ତି। ଏହାସହିତ ଉପଯୁକ୍ତ ଭାବେ ନାଳ ଖୋଳେଇବା ପାଇଁ ଭୂମି ଅଧିଗ୍ରହଣ କରି ଚାଷୀଙ୍କୁ କ୍ଷତିପୂରଣ ପ୍ରଦାନ ଏବଂ ନାଉବାଙ୍କ କାମଦେବ ମାହାରା ପର୍ଯ୍ୟନ୍ତ ନାଳ ଖୋଳିବାକୁ ନିର୍ଦ୍ଦେଶ ଦେଇଛନ୍ତି। ୨୦୨୧ ଓ ୨୦୨୨ ବର୍ଷର ଇନ୍ପୁଟ୍ ସବ୍ସିଡି ଅଦ୍ୟାବଧି ଚାଷୀଙ୍କ ଆକାଉଣ୍ଟକୁ ଛଡ଼ାଯାଇ ନ ଥିବା ସଂଗଠନ ପକ୍ଷରୁ ଅଭିଯୋଗ କରାଯାଇଛି। ୨ ସପ୍ତାହ ମଧ୍ୟରେ ଆବଶ୍ୟକ ଇନ୍ପୁଟ୍ ସବ୍ସିଡି ଚାଷୀଙ୍କ ଜମାଖାତାକୁ ପଠାଇବାକୁ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଏହାବାଦ୍ ଆଜକୁ ୩ବର୍ଷ ହେବ ସିଂହପୁରଠାରେ ୩୩ କେଭି କ୍ଷମତା ବିଶିଷ୍ଟ ଗ୍ରୀଡ୍ ସବ୍ଷ୍ଟେସନ ବସିବାକୁ ଅର୍ଥ ମଞ୍ଜୁର କରିଛି। କିନ୍ତୁ କାର୍ଯ୍ୟ ଆରମ୍ଭ ହେଉ ନ ଥିବା ସମ୍ପର୍କରେ ସାମାଜିକ କର୍ମୀ ଭୁବନାନନ୍ଦ ସାମଲ ଲିଖିତ ଅଭିଯୋଗ କରିଥିଲେ। ଏହାର ଶୁଣାଣି କରି ବାଳମୁକୁଳି ସବ୍ ଡିଭିଜନର ଟାଟା ପାୱାରର ସହକାରୀ ଯନ୍ତ୍ରୀଙ୍କୁ ଡାକି ଚଳିତ ମାସ ସୁଦ୍ଧା କାର୍ଯ୍ୟ ଆରମ୍ଭ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ସହକାରୀ ଯନ୍ତ୍ରୀ ଆସନ୍ତା ଦୁଇ ମାସ ମଧ୍ୟରେ ଓଳେଇଠାରେ ଗ୍ରୀଡ୍ ସବ୍ଷ୍ଟେଶନର କାର୍ଯ୍ୟ ଆରମ୍ଭ କରାଯିବ ବୋଲି ଜିଲାପାଳଙ୍କୁ ପ୍ରତିଶ୍ରୁତିି ଦେଇଥିଲେ। ଏହାଦ୍ୱାରା ଟିଣା, ବାଛୋଳ, ଓଳେଇ ଚନ୍ଦନପୁର, ସିଂହପୁର, ଜରି, ବାଙ୍ଗରା ପ୍ରଭୃତି ପଞ୍ଚାୟତବାସୀ ଲୋ ଭୋଲ୍ଟେଜ ସମସ୍ୟାରୁ ମୁକୁଳି ପାରିବା ସହିତ ସାମାନ୍ୟ ଝଡ଼, ବର୍ଷା ଓ ପବନରେ ଘଣ୍ଟା ଘଣ୍ଟା ଧରି ବିଦ୍ୟୁତ୍ କାଟ୍ ହେବ ନାହିଁ ବୋଲି ଆଶା କରାଯାଇଛି। ସଂଗଠନର ସଂଯୋଜକ ସନାତନ ସାହୁଙ୍କ ନେତୃତ୍ୱରେ ଭୁବନାନନ୍ଦ ସାମଲ, ରବୀନ୍ଦ୍ର ଜେନା, ଉଦକର ପଲେଇ, ବଳରାମ ବଳ, ଉପେନ୍ଦ୍ର ରାଉତ, ପ୍ରଫୁଲ୍ଲ ରାଉତ, ଧନେଶ୍ୱର ସାମଲ, ଅମୂଲ୍ୟ ଦେବତା, ସୀମାନ୍ତ ପାତ୍ର, ଦୈତାରି ପଣ୍ଡା, କୁଶଭଦ୍ର ପଣ୍ଡା, ସନ୍ତୋଷ ଧଳ, ଜ୍ଞାନେଦ୍ର ବେଉରିଆ, ରବୀନ୍ଦ୍ର ଧଳ ପ୍ରମୁଖ ଜନଶୁଣାଣିରେ ଜିଲାପାଳଙ୍କୁ ଭେଟି ସ୍ମାରକପତ୍ର ପ୍ରଦାନ କରିଛନ୍ତି।
