କୋକସରା, ୨୬।୧୨ (ଡି.ଏନ.ଏ)- କଳାହାଣ୍ଡି ଜିଲା କୋକସରା ବ୍ଲକ ପ୍ରଶାସନ ଦ୍ୱାରା ଗତ ୨୧ ତାରିଖରେ ବ୍ଲକ ସଭାଗୃହ ରେ ଏକ ସ୍କ୍ରିନିଂ କମିଟିର ବୈଠକ ଅନୁଷ୍ଠିତ ହୋଇଥିଲା । ଏହି ସ୍କ୍ରିନିଂ କମିଟିର ବୈଠକରେ କୋକସରା ବ୍ଲକ ବିଡ଼ିଓ ମନୀଷା ଦାସ ସମେତ କୋକସରା ବ୍ଲକ ଅଧ୍ୟକ୍ଷା ଶବ୍ୟାରାଣୀ ବାଗ ଉପସ୍ଥିତ ରହିଥିଲେ। ଏହି ସମୟରେ ରେଙ୍ଗାଳପାଲି ସମିତି ସଭ୍ୟା ମାଧୁରୀ ନିଆଲ ଅଧ୍ୟକ୍ଷାଙ୍କ ବିରୋଧରେ ପିସି ନେଉଥିବା ଅଭିଯୋଗ କରିଥିଲେ । ବିନା ପିସିରେ କୌଣସି କାମ ହେଉନାହିଁ ବୋଲି ସମିତି ସଭ୍ୟା ଅଭିଯୋଗ କରିଥିଲେ । ଯାହାକୁ ନେଇ ଅଧ୍ୟକ୍ଷା ଓ ସମିତି ସଭ୍ୟାଙ୍କ ମଧ୍ୟରେ ପ୍ରବଳ ହଟ୍ଟଗୋଳ ଦେଖିବାକୁ ମିଳିଥିଲା । ଏହି ଘଟଣା ପରେ ଗୃହରେ ଅଚଳାବସ୍ଥା ଦେଖିବାକୁ ମିଳିଥିଲା । ପରେ ସମିତି ସଭ୍ୟା ଗୃହ ପରିତ୍ୟାଗ ପରେ ସ୍କ୍ରିନିଂ କମିଟି ସଦସ୍ୟ ଚୟନ ହୋଇଥିଲା । ଏହି ଘଟଣାର ୪ ଦିନ ପରେ ଶୁକ୍ରବାର କୋକସରା ବ୍ଲକ ଅଧ୍ୟକ୍ଷା ଏକ ପ୍ରେସ୍ମିଟ କରି ନିଜ ଉପରେ ଲାଗିଥିବା ଅଭିଯୋଗକୁ ଖଣ୍ଡନ କରିଛନ୍ତି । ତାଙ୍କ କହିବା ଅନୁସାରେ ସେ କେବେ ମଧ୍ୟ କାହାଠାରୁ କାମ ବାବଦରେ ପିସି ଗ୍ରହଣ କରିନାହାନ୍ତି । ଜାଣିଶୁଣି ତାଙ୍କୁ ୩ ଜଣ ସମିତି ସଭ୍ୟା ସଭ୍ୟ ବଦନାମ କରିବାକୁ ଏହିଭଳି ଭିତ୍ତିହୀନ ଅଭିଯୋଗ ଆଣିଛନ୍ତି । ଯାହାକୁ ସେ କଡା ବିରୋଧ କରିବା ସହ ଖଣ୍ଡନ କରିଛନ୍ତି । ନିଜ କୋକସରା ବାସଭବନରେରେ ଅଧ୍ୟକ୍ଷା ପ୍ରେସ୍ମିଟ କରି ଏହି ସୂଚନା ଦେଇଛନ୍ତି ।
