ମହାକାଳପଡା,୧୨।୧୦(ଡି.ଏନ.ଏ.): କେନ୍ଦ୍ରାପଡା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ଖୁଲମଖୁଲା ଏଲୋପାଥିକ, ହୋମିଓପାଥିକ ଓ ଆୟୁର୍ବେଦିକ ନକଲି ଡାକ୍ତରଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଛି। ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଏହି ଅଞ୍ଚଳଗୁଡ଼ିକରେ ପରିଦର୍ଶନ କରିବା ସହ ଅଙ୍କୁଶ ଲଗାଇବାକୁ ବିଭିନ୍ନ ମହଲରୁ ଅଭିଯୋଗ ହେଉଛି ବୋଲି କୁହାଯାଉଛି। ବ୍ଲକର ବତୀଘର, ଖରିନାସୀ, ରାମନଗର, ପେଟଛେଲା, ଜମ୍ବୁ, ଜେବି ଦାଣ୍ଡୁଆ, ସୁନିତି, ନାଞ୍ଜୁରା ଆଦି ପଞ୍ଚାୟତ ସମେତ ଅନ୍ୟ ବଙ୍ଗୀୟ ଅଧ୍ୟୁଷିତ ଅଞ୍ଚଳଗୁଡ଼ିକରେ ନକଲି ଡାକ୍ତର ବା ଗଁା ବୈଦ୍ୟମାନେ ଦୋକାନ ଖୋଲିବା ହେଉ ବା ସାଇକେଲରେ ଖଣ୍ଡେ ବ୍ୟାଗ ଓହଳାଇ ମାଇକି ଧରି ରୋଗୀଙ୍କ ଘରେ ପହଞ୍ଚତ୍ ଚିକିତ୍ସା କରୁଛନ୍ତି। ଏପରି କି କେତେକ ଗଁା ବୈଦ୍ୟମାନେ ଅତି ଚତୁରତା ସହ ଗୁପ୍ତରେ ରାତି ଅଧିଆ ଏକ ନିର୍ଦ୍ଦିଷ୍ଟ ସ୍ଥାନରେ ବେଆଇନ ଭାବେ ନାବାଳିକା, ମହିଳାମାନଙ୍କୁ ଗର୍ଭପାତ କରାଉଥିବା ଅଭିଯୋଗ ହେଉଛି। ଏହି ନକଲି ଡାକ୍ତରମାନେ ଏକ ଗର୍ଭପାତ କରାଇଲେ ୪ରୁ ୫ ହଜାର ଟଙ୍କା ଦାବି କରି ରୋଗୀଙ୍କୁ ଶୋଷୁଛନ୍ତି। ଏହା ଆଜିକାଲି ନୁହେଁ, ଦୀର୍ଘଦିନ ଧରି ଚାଲି ଆସୁଥିବା ଜନୈକ ଗଁା ବୈଦ ନାମ ଗୋପନ ରଖିବା ସର୍ତ୍ତରେ ସୂଚନା ଦେଇଛନ୍ତି। ଏହି ନକଲି ଡାକ୍ତରଙ୍କ ମାସକୁ ବେଶ୍ ଭଲ ଦୁଇ ପଇସା ରୋଜଗାର କରୁଛନ୍ତି। ଏମାନେ କୋଲକାତାରୁ ଅତି ନିମ୍ନମାନର ଔଷଧ ଚାଲାଣ କରି ଏଠି ଚଢ଼ା ଦରରେ ରୋଗୀଙ୍କୁ ବିକ୍ରି କରୁଛନ୍ତି ବୋଲି ଅଭିଯୋଗ ହେଉଛି। ଏହି ନକଲି ଡାକ୍ତରଙ୍କ ଚିକିତ୍ସାରେ ଜମ୍ବୁ ପଞ୍ଚାୟତ ଭାଟେଣି ଗଁାର ଦୁଇବର୍ଷ ପୂର୍ବେ ଜନୈକ ମହିଳା ରୋଗୀଙ୍କୁ ଜମ୍ବୁ ଗ୍ରାମର ନକଲି ଡାକ୍ତର ଭୁଲ୍ ଇଞ୍ଜେକଶନ ଦେଇଥିଲେ। କିଛି ଘଣ୍ଟା ମଧ୍ୟରେ ତାଙ୍କର ମୃତ୍ୟୁ ଘଟିଥିଲା। ଏହି ଘଟଣା ଜିଲାରେ ହଇଚଇ ସୃଷ୍ଟି କରିଥିଲେ ମଧ୍ୟ ସ୍ବାସ୍ଥ୍ୟ ବିଭାଗ ଉପର ଠାଉରିଆ ତଦନ୍ତ କରି ହାତ ବାନ୍ଧି ବସିଛନ୍ତି ବୋଲି ଅଭିଯୋଗ ହେଉଛି। ଜମ୍ବୁ ଅଞ୍ଚଳର ଏହି ନକଲି ଡାକ୍ତରଙ୍କୁ ଗିରଫ କରାଗଲା ନାହିଁ। ଅଦ୍ୟାବଧି ଉକ୍ତ ନକଲି ଡାକ୍ତର ଜଣକ ଜମ୍ବୁରେ ଔଷଧ ଦୋକାନ ଖୋଲିବା ସହ ଘରେ ଘରେ ରୋଗୀ ଚିକିତ୍ସା କରୁଛନ୍ତି। ହେଲେ ସ୍ବାସ୍ଥ୍ୟ ବିଭାଗ ପାଖରେ ଖବର ନାହିଁ। ସେହିପରି ବେଣାକନ୍ଧା -ମିଲନମୋଡ଼ ଅଞ୍ଚଳର ନକଲି ଡାକ୍ତରଙ୍କ ଚିକିତ୍ସାରେ ବର୍ଷେ ପୂର୍ବେ ସ୍ଥାନୀୟ ପଙ୍କପାଳ ଗ୍ରାମର ୨୮ ବର୍ଷର ଯୁବକଙ୍କ ଜ୍ୱରରେ ଭୁଲ୍ ଚିକିତ୍ସା ଯୋଗୁ ମୃତ୍ୟୁ ହୋଇଥିଲା। ସେହିପରି କିଛି ବର୍ଷ ମଧ୍ୟରେ ରାମନଗର ପିତାପାଟ ଗଁାର ନକଲି ଡାକ୍ତରଙ୍କ ଚିକିତ୍ସାରେ ଜଣେ ମହିଳା ଶ୍ରମିକଙ୍କ ମୃତ୍ୟୁ ଘଟିଥିଲା। ଏ ସବୁ ବେଆଇନ ଭାବେ ଚାଲିଥିଲେ ମଧ୍ୟ ଚଢାଉ କରାଯାଉନାହିଁ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି। ତେବେ ନକଲି ଡାକ୍ତର ବା ଗଁା ବୈଦ୍ୟଙ୍କର ରୋଗୀଙ୍କ ଚିକିତ୍ସା ପାଇଁ କିଛି ସରକାରୀ ଖାତା ଖତିଆନ ନାହିଁ, ପ୍ରମାଣପତ୍ର ନାହିଁ ବୋଲି କୁହାଯାଇଛି। ଗ୍ରାମାଞ୍ଚଳ ରୋଗୀମାନେ ସଚେତନତା ଅଭାବ ଯୋଗୁ ଏହି ନକଲି ଡାକ୍ତରଙ୍କ ପରାମର୍ଶ ନେଉଛନ୍ତି ବୋଲି ଚର୍ଚ୍ଚା ହେଉଛ। ଏଠାରେ ପ୍ରଶ୍ନ ଉଠେ ସରକାରଙ୍କ ପକ୍ଷରୁ ପ୍ରତି ଗ୍ରାମରେ ଆଶା କର୍ମୀ, ଅଙ୍ଗନୱାଡି କର୍ମୀ, ଏଏନ୍ଏମ୍ ଓ ମହିଳା ସଙ୍ଗଠନ ନିଯୁକ୍ତ ହୋଇଥିଲେ ମଧ୍ୟ ଏମାନଙ୍କ ନଜର ଏହା ଉପରେ ଆସୁନାହିଁ କିପରି। ଯଦି ଏମାନେ ଜାଣୁଛନ୍ତି ଗାଁ ଗାଁ ବୁଲି ନକଲି ଡାକ୍ତରମାନେ ରୋଗୀଙ୍କୁ ଚିକିତ୍ସା କରିଥିଲେ ମଧ୍ୟ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କାହିଁକି କରୁନାହାନ୍ତି ବୋଲି ସ୍ଥାନୀୟ ବୁଦ୍ଧିଜୀବୀ ସୁବାସ ଚନ୍ଦ୍ର ସ୍ବାଇଁ କହିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସା ଅଧିକାରିଣୀ ଡା. ଅନିତା ପଟ୍ଟନାୟକଙ୍କୁ ପଚାରିବାରେ ଉପକୂଳ ଅଞ୍ଚଳରେ ଜନ ସଚେତନତା କାର୍ଯ୍ୟକ୍ରମ କରାଯିବ ବୋଲି ସେ କହିଛନ୍ତି।
