ବେଙ୍ଗାଲୁରୁ, ୨୩ା୮: କର୍ନାଟକରେ ଜଣେ ମହିଳା ତାଙ୍କ ସ୍ବାମୀଙ୍କୁ ହତ୍ୟା କରିବାକୁ ସୁପାରି ଦେଲେ। ସୁପାରିକିଲର ସମ୍ପୃକ୍ତ ବ୍ୟକ୍ତିଙ୍କୁ ଅପହରଣ ମଧ୍ୟ କଲେ। ହେଲେ ହତ୍ୟା କରିବାକୁ ସେମାନଙ୍କ ସାହସ ହେଲାନି। ପରେ ଯୁବକଙ୍କ ଦେହସାରା କେଚ୍ଅପ୍(ଟମାଟୋ ସସ୍) ଢାଳି ତାହାକୁ ରକ୍ତ ବୋଲି କହି ମହିଳାଙ୍କ ନିକଟକୁ ସୁପାରି କିଲର ଫଟୋ ପଠାଇବା ଘଟଣା ଚର୍ଚ୍ଚାର ବିଷୟ ପାଲଟିଛି। ଘଟଣା ଜଣାପଡ଼ିବା ପରେ ପୋଲିସ ଅଭିଯୁକ୍ତଙ୍କୁ ଗିରଫ କରିଛି।
ସୂଚନା ଅନୁସାରେ, ୨୬ ବର୍ଷୀୟା ଅନୁପଲ୍ଲବୀ ନବୀନ କୁମାରଙ୍କୁ ବିବାହ କରି ତାଙ୍କ ସହ ଦୋଡାବିଦାରକଲୁରେ ରହୁଥିଲେ। ହିମବନ୍ତ କୁମାର ନାମକ ଆଉ ଜଣେ ଯୁବକଙ୍କ ସହ ଅନୁପଲ୍ଲବୀଙ୍କ ପ୍ରେମ ସମ୍ପର୍କ ରହିଥିଲା। ସେମାନେ ନବୀନଙ୍କୁ ରାସ୍ତାରୁ ହଟାଇବା ପାଇଁ ଯୋଜନା କରିଥିଲେ। ନବୀନଙ୍କୁ ହତ୍ୟା କରିବାକୁ ହରିଶ, ନାଗାରାଜୁ ଏବଂ ମୁଗିଲାନ୍ଙ୍କୁ ସୁପାରି ଦେଇଥିଲେ। ୨ ଲକ୍ଷ ଟଙ୍କାରେ ଏହି ଡିଲ୍ ହୋଇଥିଲା। ସୁପାରି କିଲର ଅଗ୍ରିମ ୯୦ ହଜାର ଟଙ୍କା ନେଇଥିଲେ। ଜୁଲାଇ ୨୩ରେ ଅଭିଯୁକ୍ତମାନେ ନବୀନଙ୍କୁ ଅପହରଣ କରି ତାମିଲନାଡ଼ୁ ନେଇଯାଇଥିଲେ, କିନ୍ତୁ ହତ୍ୟା କରିବା ପାଇଁ ସେମାନେ ଡରିଥିଲେ। ପରେ ୩ ସୁପାରିକିଲର ନବୀନଙ୍କ ସହ ବନ୍ଧୁତା କରି ସେଠାରେ ପାର୍ଟି କରିଥିଲେ। ଅନୁପଲ୍ଲବୀଙ୍କ ଫୋନ୍ ଆସିବାରୁ ସେମାନେ ନବୀନଙ୍କ ଦେହସାରା କେଚ୍ଅପ୍ ଢାଳି ଦେଇଥିଲେ। ଏହାକୁ ରକ୍ତ ବୋଲି କହିବା ସହ ସେମାନେ ନବୀନଙ୍କୁ ମୃତ ଦର୍ଶାଇ ଅନୁପଲ୍ଲବୀଙ୍କ ନିକଟକୁ ଫଟୋ ପଠାଇଥିଲେ। ଏହି ଫଟୋକୁ ହିମବନ୍ତ ସତ ଭାବିଥିଲେ। ତେଣୁ ଧରାପଡ଼ିବା ଭୟରେ ହିମବନ୍ତ ଆତ୍ମହତ୍ୟା କରିଦେଇଥିଲେ। ସେପଟେ ନବୀନଙ୍କ ପରିବାର ପକ୍ଷରୁ ଅଗଷ୍ଟ ୨ରେ ନିଖୋଜ ଏତଲା ଦିଆଯାଇଥିଲା। ହେଲେ ନବୀନ ଅଗଷ୍ଟ ୬ରେ ଘରକୁ ଫେରି ସବୁ ଘଟଣା ବଖାଣିଥିଲେ। ଏଥିରେ ଅନୁପଲ୍ଲବୀଙ୍କ ମା’ ମଧ୍ୟ ସମ୍ପୃକ୍ତ ଥିବା ପୋଲିସ ଜାଣିବାକୁ ପାଇଛି। ଉଭୟ ମା’ ଝିଅଙ୍କ ସମେତ ୩ ସୁପାରି କିଲରଙ୍କୁ ଗିରଫ କରାଯାଇଛି।
