ପୁରୁଣା ଭୁବନେଶ୍ୱର,୨୮ା୨(ଡି.ଏନ୍.ଏ.):ଚଳିତବର୍ଷ ପ୍ରଭୁ ଶ୍ରୀଲିଙ୍ଗରାଜଙ୍କ ଜାଗର ଯାତ୍ରାରେ ରାତି ୧୦ଟାରେ ମହାଦୀପ ଉଠିବା ନେଇ ପ୍ରଶାସନ ପକ୍ଷରୁ ନିଷ୍ପତ୍ତି ହୋଇଥିଲା। ତେବେ ନିର୍ଦ୍ଧାରିତ ସମୟର ୩ଘଣ୍ଟା ୮ମିନିଟ ବିଳମ୍ବରେ ଅର୍ଥାତ୍ ରାତି ୧ଟା ୮ରେ ମନ୍ଦିର ଉପରକୁ ମହାଦୀପ ଉଠିଥିଲା। ଯାହାକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ମନ୍ଦିର ପ୍ରଶାସନ ଏହାକୁ ଗୁରୁତର ନେବା ସହ ଉକ୍ତ ଦିନର ପାଳିଆ ପୂଜା ପଣ୍ଡା, ଚର୍ଚ୍ଚେୟିତ, ମହାସୁଆର ସେବାୟତଙ୍କୁ ପୃଥକ ଭାବେ ବିଳମ୍ବର କାରଣ ଦର୍ଶାଅ ନୋଟିସ୍ ଜାରି କରିଥିଲା। ଏନେଇ ସୋମବାର ସେବାୟତ ସେମାନଙ୍କର ପକ୍ଷ ରଖିଛନ୍ତି।
ବରିଷ୍ଠ ଚର୍ଚ୍ଚେୟିତ ସେବାୟତ ଅଶୋକ ପଣ୍ଡା ଉକ୍ତଦିନର ବିଳମ୍ବକୁ ନେଇ ଦୁଃଖ ପ୍ରକାଶ କରିଛନ୍ତି। ଅଚ୍ୟୁତ ପିଣ୍ଡିଠାରୁ ଭୋଗ ମଣ୍ଡପ ପାଳିଆ ସେବାୟତ ଭୋଗ ନେବା ଆଣିବା ସହଜ ନ ଥିଲା। ଭିଭିଆଇପି ପାସ୍ଧାରୀଙ୍କୁ ଦକ୍ଷିଣ ଦ୍ୱାର ଦେଇ ମନ୍ଦିରକୁ ଯିବା ପାଇଁ ଅନୁମତି ପ୍ରଦାନ କରାଯାଇଥିଲା। ତେବେ ଅନେକ ପାସ୍ଧାରି ଉତ୍ତର ଦ୍ୱାର ଏବଂ ସିଂହଦ୍ୱାର ଦେଇ ଯାଇଥିଲେ। ସେହିପରି କେତେଜଣ ପୋଲିସ ସମ୍ପର୍କୀୟଙ୍କୁ ଆଣିଥିଲେ। ଜାଗର ଯାତ୍ରାରେ ଆଡ଼କାଠ ନିକଟରେ ଶ୍ରଦ୍ଧାଳୁଙ୍କୁ ଶୃଙ୍ଖଳିତ ଦର୍ଶନ କରାଇ କର୍ମଚାରୀଙ୍କୁ ଛାଡ଼ିବାର ଦାୟିତ୍ୱ ଥିଲା। ତେବେ ସେଠାରେ ଥିବା ଜଣେ କର୍ମଚାରୀ ଦାୟିତ୍ୱ ତୁଲାଇପାରି ନ ଥିଲେ ବୋଲି ପଣ୍ଡା କହିଛନ୍ତି। ସୂର୍ଯ୍ୟ ପୂଜାଠାରୁ ପ୍ରଶାସନ ପକ୍ଷରୁ ଦେଢଘଣ୍ଟା ନୀତି ବିଳମ୍ବ ହୋଇଥିଲା। ବୀରକିଶୋରୀ ବଲ୍ଲଭଠାରୁ ନୀତି ୧ଘଣ୍ଟା ଡେରି ହୋଇଥିଲ। ଅବଶିଷ୍ଟ ୨୩ ମନିଟ୍ ଭୋଗ ନେବା ଆଣିବା, ପୂଜାର୍ଚ୍ଚନାରେ ବିଳମ୍ବ ହୋଇଥିବା ନେଇ ମଣ୍ଟୁ ପୂଜାପଣ୍ଡା ସଫେଇ ଦେଇଛନ୍ତି। ସେହିପରି ଅନୁରୂପଭାବେ ଘଟଣାବଳୀକୁ ବିରଞ୍ଚି ନାରାୟଣ ପତି ଦର୍ଶାଇଛନ୍ତି।
