କେନ୍ଦ୍ରାପଡ଼ା ଅଫିସ/ପଟ୍ଟାମୁଣ୍ଡାଇ,୪ା୭(ସ୍ବ.ପ୍ର.): ବ୍ରାହ୍ମଣୀ ଓ ଗୋବରୀ ନଦୀର ଜଳପଥ ସଂଯୋଗୀକରଣ ଆନ୍ଦୋଳନ ଏବେ ଫସର ଫାଟିବାକୁ ଯାଉଛି। ପୂର୍ବରୁ ଥିବା ଏହି ୧୬ କିଲୋମିଟର ଜଳପଥ ଉପରେ ପଟ୍ଟାମୁଣ୍ଡାଇର ଇନ୍ଡୋର ଷ୍ଟାଡିୟମ ନିର୍ମାଣ ହେଉଛି। ଜଳପଥ ଉପରେ ହେଉଥିବା ଏହି ଷ୍ଟାଡିୟମ ସ୍ଥାନୀୟ ଅଞ୍ଚଳର କୃଷି ଓ କୃଷକଙ୍କ ପାଇଁ ଆଗାମୀ ଦିନରେ ଆତ୍ମଘାତୀ ହେବ ବୋଲି ଆଶଙ୍କା ପ୍ରକାଶ ପାଇଛି। ଏଥିପାଇଁ ସ୍ଥାନୀୟ ଅଞ୍ଚଳରେ ଏକ ବଡ଼ଧରଣର ଆନ୍ଦୋଳନ ପାଇଁ ସଜବାଜ ହେଉଥିବା ସୂଚନା ମିଳିଛି।
ଏ ସମ୍ପର୍କରେ ସାମାଜିକ କର୍ମୀ ପ୍ରଫୁଲ୍ଲ କୁମାର ଦାଶ କହିଛନ୍ତି, ପଟ୍ଟାମୁଣ୍ଡାଇ ନିକଟରେ ଥିବା ବ୍ରାହ୍ମଣୀ ନଦୀର ଏକ ଶାଖା ନରସିଂହପୁର ଗ୍ରାମ ଦେଇ କେନ୍ଦ୍ରାପଡ଼ା ବ୍ଲକ ଗଣ୍ଡାକିଆଠାରେ ଗୋବରୀ ନଦୀରେ ମିଶିଥିଲା। ଏହି ଶାଖାକୁ ନଅଙ୍କ ଦୁର୍ଭିକ୍ଷ ସମୟ ୧୮୬୬ରେ ଉନ୍ନତୀକରଣ କରାଯାଇ ନୌଚଳାଚଳର ବ୍ୟବସ୍ଥା ହୋଇଥିଲା। ନୌପରିବହନ ସହ ସ୍ଥାନୀୟ ଅଞ୍ଚଳର କୃଷି ଓ ଦୈନନ୍ଦିନ କାର୍ଯ୍ୟ ପାଇଁ ବ୍ୟବହାର ହେଉଥିଲା। ତେବେ ଜଳସମ୍ପଦ ବିଭାଗ ପକ୍ଷରୁ ଏହାର ଉନ୍ନତୀକରଣ କରା ନ ଯିବାରୁ ତାହା ପୋତିହୋଇପଡିଛି। ଆଇନଜୀବୀ ପ୍ରମୋଦ କୁମାର ସାହୁ କହିଛନ୍ତି, ଏହି ଜଳଉତ୍ସରୁ ପଟ୍ଟାମୁଣ୍ଡାଇ ଓ କେନ୍ଦ୍ରାପଡ଼ା ବ୍ଲକ ସହ ମହାକାଳପଡ଼ା ବ୍ଲକ ଅଞ୍ଚଳର ଚାଷୀ କ୍ଷେତ ପାଇଁ ଜଳ ନେଉଥିଲେ। ତେବେ ଏହାର ଜଳପଥ ପୋତି ହୋଇପଡ଼ିବାରୁ ନିକଟସ୍ଥ କେତେଜଣ ବ୍ୟକ୍ତି ଏହି ଜମିକୁ ଜବରଦଖଲ କରିଛନ୍ତି। ଏହାର ଉନ୍ନତୀକରଣ ପାଇଁ ସ୍ଥାନୀୟ ଅଞ୍ଚଳର ଚାଷୀ ବହୁବାର ଆନ୍ଦୋଳନ କରିଛନ୍ତି। ଏଥିପାଇଁ ୨୦୧୦ ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟାନାୟକ ଜଳପଥର ଉନ୍ନତୀକରଣ ପାଇଁ ୩ କୋଟି ଟଙ୍କା ବ୍ୟୟ ଅଟକଳ କରି ଶିଳାନ୍ୟାସ କରିଥିଲେ। ତେବେ କୌଣସି କାରଣରୁ ଠିକା ସଂସ୍ଥା କାର୍ଯ୍ୟ ଛାଡ଼ିଦେବାରୁ ଏହାର ପରିବର୍ଦ୍ଧିତ ବ୍ୟୟ ଅଟକଳ ୭ କୋଟି ଟଙ୍କାରେ ପହଞ୍ଚତ୍ଛି। ତେବେ ଏହି ଜଳପଥ ଉପରେ ଇନ୍ଡୋର ଷ୍ଟାଡିୟମ ନିର୍ମାଣ ଚାଷୀଙ୍କ ଚାଷ ଆଶାକୁ ଆଶଙ୍କାରେ ପରିଣତ କରିଛି। ଏ ସଂକ୍ରାନ୍ତରେ କ୍ଷୀରୋଦ କୁମାର ମଲ୍ଲିକ କୁହନ୍ତି, ଚିରସ୍ରୋତା ବ୍ରାହ୍ମଣୀ ସହିତ ଗୋବରୀ ନଦୀର ସଂଯୋଗୀକରଣ ପାଇଁ ବହୁବାର ଆନ୍ଦୋଳନ ହୋଇଛି। ଏବେ ଏହାର ଉନ୍ନତୀକରଣ ହେଉଥିବା ବେଳେ ଜଳପଥ ଉପରେ ଇନ୍ଡୋର ଷ୍ଟାଡିୟମ ନିର୍ମାଣ ବାଧକ ହୋଇଛି। ନଦୀ କିସମ ଉପରେ ଏହି ନିର୍ମାଣକୁ ନେଇ କ୍ଷୀରୋଦଙ୍କ ସହ ଅଶୋକ କୁମାର ବଳ ଓ ଦେବାଶିଷ ପଣ୍ଡା ଜାତୀୟ ଆଇନ ସେବା ପ୍ରାଧିକରଣ (ନାଲସା)ରେ ଅଭିଯୋଗ କରିଥିଲେ। ନାଲସା ପକ୍ଷରୁ କେନ୍ଦ୍ରାପଡ଼ା ଜିଲା ଆଇନ ସେବା ପ୍ରାଧିକରଣକୁ ଏ ସମ୍ପର୍କରେ ଚିଠି ପରେ ଏହି ମାମଲା ଜଳସମ୍ପଦ ବିଭାଗ ବୁଝିବାକୁ ଚିଠି ହୋଇଛି। ଜଳପଥ ଉପରେ ଷ୍ଟାଡିୟମ ନିର୍ମାଣ ଫଳରେ ନଦୀ ସଂଯୋଗୀକରଣ କାର୍ଯ୍ୟ ବ୍ୟାହତ ହେବ। ଜଳପଥ ଶୁଖିଲା ରହିବା ଦ୍ୱାରା ପରୋକ୍ଷରେ ଏହାକୁ ଜବରଦଖଲକାରୀଙ୍କ ହାତକୁ ଟେକିଦେଇ ଚାଷୀଙ୍କ ସ୍ବାର୍ଥକୁ ବଳି ପକାଯାଉଛି ବୋଲି ସେ କ୍ଷୋଭ ପ୍ରକାଶ କରିଛନ୍ତି। ଏ ସମ୍ପର୍କରେ ପିଡି ରାଜେନ୍ଦ୍ର କୁମାର ପଣ୍ଡାଙ୍କୁ ପଚାରିବାରେ ଜଳପଥ ଉପରେ ଷ୍ଟାଡିୟମ ନିର୍ମାଣ ସମ୍ପର୍କରେ ସ୍ଥାନୀୟ ଅଞ୍ଚଳରୁ କୌଣସି ଅଭିଯୋଗ ଆସିନାହିଁ। ଅଭିଯୋଗ ମିଳିଲେ ଜଳସମ୍ପଦ ବିଭାଗ ସହ ଆଲୋଚନା କରାଯିବ ବୋଲି ସେ କହିଛନ୍ତି।
