କଲମ୍ବୋ, ୩୧ା୭ (ପି.ଟି.)- ଶିଖର ଧାଓ୍ବନଙ୍କ ନେତୃତ୍ୱାଧୀନ ଭାରତୀୟ ସୀମିତ ଓଭର ଦଳ ଶୁକ୍ରବାର ସନ୍ଧ୍ୟାରେ ବେଙ୍ଗାଲୁରୁରେ ପହଞ୍ଚତ୍ଛି। କୋଭିଡ୍ ଟେଷ୍ଟରେ ପଜିଟିଭ ଯୋଗୁ କ୍ରିଷ୍ଣାପ୍ପା ଗୋଥାମ, ୟୁଜବେନ୍ଦ୍ର ଚହଲ ଓ କ୍ରୁନାଲ ପାଣ୍ଡ୍ୟା ପ୍ରମୁଖ ଆସିନାହାନ୍ତି। ଗୁରୁବାର ଅନୁଷ୍ଠିତ ତୃତୀୟ ତଥା ଅନ୍ତିମ ଅନ୍ତର୍ଜାତୀୟ ଟି୨୦ ମ୍ୟାଚରେ ଶ୍ରୀଲଙ୍କା ୭ ଉଇକେଟରେ ଭାରତକୁ ପରାସ୍ତ କରି ୩ ମ୍ୟାଚ ବିଶିଷ୍ଟ ସିରିଜ ୨-୧ରେ ବିଜୟ ହାସଲ କରିଛି। ଏହି ମ୍ୟାଚରେ ପ୍ରଥମେ ବ୍ୟାଟିଂ କରିଥିବା ଭାରତ ନିର୍ଦ୍ଧାରିତ ଓଭରରେ ୮ ଉଇକେଟ ବିନିମୟରେ ୮୧ ରନ କରିଥିଲା। ଶ୍ରୀଲଙ୍କା ୧୪. ୩ ଓଭରରେ ୩ ଉଇକେଟ ବିନିମୟରେ ବିଜୟ ପାଇଁ ଆବଶ୍ୟକ ରନ ସଂଗ୍ରହ କରିନେଇଥିଲା। ପୂର୍ବରୁ ଅନୁଷ୍ଠିତ ଦିନିକିଆ ସିରିଜକୁ ଭାରତ ୨-୧ରେ ଜିତିନେଇଥିଲା। ସୂଚନାଯୋଗ୍ୟ, କ୍ରୁନାଲ କରୋନା ସଂକ୍ରମିତ ଜଣାପଡ଼ିବା ପରେ ତାଙ୍କ ସଂସ୍ପର୍ଶରେ ଆସିଥିବା ୮ ଭାରତୀୟ ଖେଳାଳି ଆଇସୋଲେଶନରେ ରହିଥିଲେ। କିନ୍ତୁ ଶୁକ୍ରବାର ଭାରତୀୟ ଦଳର ପ୍ରତ୍ୟାବର୍ତ୍ତନ ପୂର୍ବରୁ ଆର୍ଟି-ପିସିଆର ରିପୋର୍ଟରେ ଗୋଥାମ ଓ ଚହଲଙ୍କର ପଜିଟିଭ ଆସିଥିଲା। ଦେଶର ସ୍ବାସ୍ଥ୍ୟ ପ୍ରୋଟୋକଲ ଅନୁସାରେ ସେମାନେ ବାଧ୍ୟତାମୂଳକ ୭ ଦିନ ଆଇସୋଲେଶନରେ ରହିବେ। ବେଙ୍ଗାଲୁରୁରେ ପହଞ୍ଚତ୍ଥିବା ଖେଳାଳିମାନେ ସେମାନଙ୍କ ସହରକୁ ଯୋଗାଯୋଗ କରୁଥିବା ବିମାନଗୁଡ଼ିକରେ ନିଜ ଘରକୁ ଫେରିବେ। ମୁମ୍ବାଇ ଓ କଲମ୍ବୋରେ ୬ ସପ୍ତାହ ଧରି ବାୟୋବବଲରେ ରହିବା ପରେ ଖେଳାଳିମାନଙ୍କୁ ବିଶ୍ରାମ ପ୍ରୟୋଜନ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ଜଣେ କର୍ମକର୍ତ୍ତା କହିଛନ୍ତି। କ୍ରୁନାଲଙ୍କର ଯଦି ଦୁଇଟି ଆର୍ଟି-ପିସିଆର୍ ରିପୋର୍ଟ ନେଗେଟିଭ ଆସେ ତେବେ ଆସନ୍ତା ସପ୍ତାହ ମଧ୍ୟ ଭାଗରେ ସ୍ବଦେଶ ଫେରିବାରେ ସମର୍ଥ ହେବେ। ବିମାନରେ ଚଢ଼ିବା ପୂର୍ବରୁ ପ୍ରତ୍ୟେକ ସଦସ୍ୟଙ୍କର ଆରଟି-ପିସିଆର୍ ଟେଷ୍ଟ ହୋଇଥିଲା। ସମ୍ଭବତଃ କ୍ରୁନାଲଙ୍କ ସହ ଗୋଥାମ ଓ ଚହଲ ଅଧିକ ସଂସ୍ପର୍ଶରେ ଆସିଥିବାରୁ ସେମାନଙ୍କର ପଜିଟିଭ ଆସିଥିଲା। ଅନ୍ୟ ୬ଜଣ ହାର୍ଦ୍ଦିକ ପାଣ୍ଡ୍ୟା, ମନିଷ ପାଣ୍ଡେ, ଇଶାନ କିଷନ, ସୂର୍ଯ୍ୟକୁମାର ଯାଦବ, ପୃଥ୍ବୀ ଶ’ ଏବଂ ଦୀପକ ଚହରଙ୍କୁ ଦେଶକୁ ଫେରିଯିବା ଲାଗି ଅନୁମତି ମିଳିଯାଇଥିଲା। ଏହି ସମସ୍ତ ୯ଜଣ ଖେଳାଳି ପ୍ରଥମ ଗେମ୍ ଏବଂ ପରେ ଜୁଲାଇ ୨୭ରେ ଦ୍ୱିତୀୟ ଅନ୍ତର୍ଜାତୀୟ ଟି୨୦ ବେଳେ ଏକାଠି ହୋଇଥିଲେ। ସେତେବେଳେ କ୍ରୁନାଲଙ୍କ ପାଖରେ ଗଳାରେ ଯନ୍ତ୍ରଣା ସହ କରୋନା ଲକ୍ଷଣ ପ୍ରକାଶ ପାଇଥିଲା। ତାଙ୍କର କୋଭିଡ୍ ଟେଷ୍ଟ କରାଯିବାକରୁ ପଜିଟିଭ ଆସିଥିଲା।
