ଦାରିଙ୍ଗବାଡ଼ି,୩ା୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ଦନେକବାଡ଼ି ପଞ୍ଚାୟତ ମାଣ୍ଡୁବାଡ଼ି ଗ୍ରାମ ବଲାମାହା ଜଙ୍ଗଲ ଡବାଡ଼ଙ୍ଗା ଗଛରେ ଗତ ସୋମବାର ଉଜ୍ଜ୍ବଳ ସିଂ ଦିଗାଲଙ୍କ ଝୁଲନ୍ତା ମୃତଦେହକୁ ପୋଲିସ ଜବତ କରିଥିବା ଘଟଣାରେ ହତ୍ୟା ଅଭିଯୋଗ ଜୋର ଧରିଛି। ଶନିବାର ଯୁବକଙ୍କ ସ୍ତ୍ରୀ-ପରିବାର ଏବଂ ଅଞ୍ଚଳବାସୀ ଏହାର ପୁନଃ ତଦନ୍ତ, ପୁନଃ ବ୍ୟବଚ୍ଛେଦ କରାଇବା, ବିଚାର ବିଭାଗ ଦ୍ୱାରା ତଦନ୍ତ, ଦୋଷୀଙ୍କୁ ତୁରନ୍ତ ଗିରଫ କରିବା ଭଳି ଦାବି କରିବା ସହ ଥାନା ମୁଖ୍ୟ ଫାଟକ ସମ୍ମୁଖରେ ଧାରଣା ଦେଇ ପ୍ରତିବାଦ ଜଣାଇଥିଲେ। ହାତରେ ପ୍ଲାକାର୍ଡ ଧରି ଦୀର୍ଘ ସମୟ ଧାରଣାରେ ବସିଥିଲେ। ପରେ ପୋଲିସ ଏସ୍ଡିପିଓ ଶୁଭମ୍ ଭୋସଲେ, ଆଇଆଇଆସି ସଂଗ୍ରାମ କେଶରୀ ଜେନା ପ୍ରମୁଖ ଏହାକୁ ସଠିକ ତଦନ୍ତ କରାଯାଉଛି ଏବଂ ଏହି ଘଟଣାରେ ସନ୍ଧାନୀ କୁକୁର ଦ୍ୱାରା ଅଧିକ ଯାଞ୍ଚ କରାଯିବାକୁ ପ୍ରତିଶ୍ରୁତି ଦେବା ପରେ ପ୍ରାୟ ୫ ଘଣ୍ଟା ପରେ ବିକ୍ଷୋଭକାରୀମାନେ ଆନ୍ଦୋଳନରୁ ଓହରିଥିଲେ।
ସୂଚନାଯୋଗ୍ୟ, ମୃତ ଉଜ୍ଜ୍ବଳଙ୍କ ଘର ସିଆଙ୍ଗବାଲି ପଞ୍ଚାୟତ କାଜୁରିପାଦେରୀ ଗ୍ରାମରେ। ସେ କୌଣସି କାର୍ଯ୍ୟରେ ଦନେକବାଡ଼ି ଯାଇ ଆଉ ଫେରି ନ ଥିଲେ। ପରେ କିଛି ଲୋକ ଜଙ୍ଗଲରେ ଝୁଲନ୍ତା ମୃତଦେହ ଦେଖି ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ମୃତଦେହ ଜବତ କରିବା ସହ ଏକ ମାମଲା (୫/୨୬)ରୁଜୁ କରି ତଦନ୍ତ କରୁଥିଲା।
