ସ୍ତ୍ରୀଙ୍କ ସମ୍ମୁଖରେ ସ୍ବାମୀ ଜୀବନ୍ତ ଦଗ୍ଧ
10:50 amDecember 26, 2020December 26, 2020

ପଡ଼ିଆ,୨୬ା୧୨(ଡି.ଏନ.ଏ.): ମାଲକାନଗିରି ଜିଲା ପଡ଼ିଆ ବ୍ଲକ ନିଲିଗୁଡ଼ା ପଞ୍ଚାୟତ ପୁରୁଣା ନିଲିଗୁଡ଼ା ଗ୍ରାମରେ ଶୁକ୍ରବାର ଘଟିଛି ଏକ ଦୁଃଖଦ ଘଟଣା। ଗୁରୁବାର ମଧ୍ୟରାତ୍ରିରେ ପୁରୁଣା ନିଲିଗୁଡ଼ା ଗ୍ରାମରେ ଅଗ୍ନିକାଣ୍ଡ ଘଟି ସ୍ତ୍ରୀଙ୍କ ଆଗରେ ସ୍ବାମୀ ଜଳିଯାଇ ଜୀବନ୍ତ ଦଗ୍ଧ ହୋଇଯାଇଛନ୍ତି। ଖବରପାଇ ସରପଞ୍ଚ ବୁଦୁରା କାର୍ତ୍ତାମି, ତହସିଲଦାର ଶଶାଙ୍କ ଶେଖର ମିଶ୍ର, ଥାନା ଅଧିକାରୀ ରଞ୍ଜନ କୁମାର ମାଝି, ଆର୍‌ଆଇ ପହଞ୍ଚତ୍ ପରିସ୍ଥିତି ଅନୁଧ୍ୟାନ କରିଛନ୍ତି। କ୍ଷୟକ୍ଷତି ଆକଳନ ପରେ ତାଙ୍କୁ ସରକାରୀ ସହାୟତା ପ୍ରଦାନ କରାଯିବ ବୋଲି ତହସିଲଦାର କହିଛନ୍ତି।
ଖବରରୁ ଜଣାପଡ଼ିଛି ଗ୍ରାମର ଇର୍ମା ପଡିଆମୀ ଓ ତାଙ୍କ ସ୍ତ୍ରୀ ଯୋଗୀ ଗୁରୁବାର ଜମିରେ କଟାହୋଇଥିବା ଧାନ ବୋହି ଖଳାକୁ ଆଣିଥିଲେ। ପରେ ରୋଷେଇ କରି ଖାଇସାରି ଉଭୟେ ଶୋଇପଡ଼ିଥିଲେ। ମାତ୍ର ମଧ୍ୟରାତ୍ରିରେ ବିଦ୍ୟୁତ୍‌ ଶର୍ଟସର୍କିଟ ଯୋଗୁ ଅଗ୍ନିକାଣ୍ଡ ଘଟି ତାଙ୍କ ଘର ପୋଡ଼ିଯାଇଥିଲା। ନିଆଁ ଧାସରେ ଯୋଗୀଙ୍କ ନିଦ ଭାଙ୍ଗିଯାଇଥିଲା। ସେ ପୁଅକୁ ଧରି ବାହାରକୁ ଦୌଡ଼ି ଆସିଥିଲେ। ମାତ୍ର ବାହାରେ କିଛି ସମୟ ପରେ ଇର୍ମାଙ୍କୁ ଖୋଜି ପାଇ ନ ଥିଲେ। ଇର୍ମା ଘର ଭିତରେ ହିଁ ରହିଯାଇଥିଲେ। ସ୍ବାମୀ ଇର୍ମା ଜୀବନ୍ତ ଦଗ୍ଧ ହୋଇଯାଇଥିବା ଜାଣି ସେ କାନ୍ଦିବାକୁ ଲାଗିଲେ। ତାଙ୍କ କାନ୍ଦ ଏବଂ ପାଟି ଶୁଣି ଗ୍ରାମବାସୀ ପହଞ୍ଚତ୍ଥିଲେ। ସେତେବେଳକୁ ଘରଟି ସମ୍ପୂର୍ଣ୍ଣ ଜଳିସାରିଥିଲା। ଖବରପାଇ ଅଗ୍ନିଶମ କର୍ମଚାରୀ ପହଞ୍ଚତ୍ ନିଆଁକୁ ଆୟତ୍ତ କରିଥିଲେ। ଶୁକ୍ରବାର ମୋଟୁ ତହସିଲଦାର, ଆର୍‌ଆଇ ଯୋଗୀଙ୍କୁ ଶାଢ଼ି,କମ୍ବଳ ଏବଂ କିଛି ଅର୍ଥ ସହାୟତା ଦେଇଛନ୍ତି। କ୍ଷୟକ୍ଷତି ଆକଳନ ପରେ ସରକାରୀ ବ୍ୟବସ୍ଥା ଅନୁସାରେ ସହାୟତା ମିଳିବ ବୋଲି ତହସିଲଦାର ମିଶ୍ର ସୂଚନା ଦେଇଛନ୍ତି।