ରାୟଗଡ଼ା ଅଫିସ,୨୩ା୯: ପ୍ରସବ ବେଳେ ନିଜ ସନ୍ତାନ ନଷ୍ଟ ହୋଇଯିବାରୁ ସ୍ତ୍ରୀ ଭାଙ୍ଗିପଡ଼ିଥିଲେ। ଫଳରେ ଅନ୍ୟର ଶିଶୁପୁତ୍ରକୁ ଡାକ୍ତରଖାନାରେ ଏକା ଦେଖି ସ୍ବାମୀ ଘରକୁ ନେଇଗଲେ। ହେଲେ ୮ମାସର ଶିଶୁପୁତ୍ର ନିଜ ମା’କୁ ଛାଡ଼ି ତାଙ୍କ ପାଖରେ ରହିପାରି ନ ଥିଲେ। କାନ୍ଦ ବନ୍ଦ ନ ହେବାରୁ ସ୍ତ୍ରୀ ଶିଶୁପୁତ୍ରକୁ ଆଣି ତାଙ୍କର ଅସଲି ମା’ କୋଳରେ ଦେବାକୁ ବାଧ୍ୟ ହୋଇଛନ୍ତି। ସଦର ବ୍ଲକ ଗୁମ୍ମା ପଞ୍ଚାୟତ ଅନ୍ତର୍ଗତ ବଡ଼ବାଲେଶ୍ୱର ଗ୍ରାମର ଦେଶୁ ହିକକା ଏବଂ ତାଙ୍କ ସ୍ତ୍ରୀ ଜ୍ୱରରେ ପୀଡ଼ିତ ବଡ଼ ଏବଂ ମଝିଆ ପୁଅକୁ ଚିକିତ୍ସା ପାଇଁ ନେଇ ଆସିଥିବାବେଳେ ଗୁରୁବାର ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟରେ ଏଭଳି ଘଟଣା ଘଟିଛି। ମେଡିକାଲ କର୍ତ୍ତୃପକ୍ଷ ପିଲାଚୋରି ନେଇ ଥାନାରେ ଅଭିଯୋଗ କରିବା ପରେ ପୋଲିସ କଲ୍ୟାଣସିଂହପୁର ବ୍ଲକ ଶିରିଗୁମା ଗ୍ରାମର ରାଜକୁମାର କନ୍ଧପାଣିଙ୍କୁ ଅଟକ ରଖି ପଚରାଉଚରା କରୁଛି।
ସୂଚନାଯୋଗ୍ୟ, ଦେଶୁଙ୍କ ଦୁଇପୁଅ ଡାକ୍ତରଖାନାରେ ଚିକିତ୍ସାଧୀନ ଥିଲେ। ୮ ମାସର ସାନପୁଅ ମା’ ବାପାଙ୍କ ନିକଟରେ ଥିଲେ। କୌଣସି ଜରୁରୀ କାମ ପଡ଼ିବାରୁ ଦେଶୁ ଏବଂ ସ୍ତ୍ରୀ ଶିଶୁପୁତ୍ରକୁ ଛାଡ଼ି ଅନ୍ୟତ୍ର ଯାଇଥିଲେ। ଏହି ସମୟରେ ସ୍ତ୍ରୀଙ୍କୁ ଅଲ୍ଟ୍ରାସାଉଣ୍ଡ ପାଇଁ ନେଇ ଆସିଥିବା ରାଜକୁମାର ଶିଶୁଟି କାନ୍ଦୁଥିବା ଦେଖିଥିଲେ। ମାସେତଳେ ସନ୍ତାନ ହରାଇଥିବା ତାଙ୍କ ସ୍ତ୍ରୀ ମାନସିକ ଦୁଶ୍ଚିନ୍ତାରେ ରହୁଥିବାରୁ ସେ ଶିଶୁଟିକୁ ଏକା ଦେଖି ଘରକୁ ନେଇ ଚାଲିଯାଇଥିଲେ। ଏହି ଘଟଣାରେ ଟାଉନ ଥାନାରେ ୨୨୭/୨୨ ରେ ଏକ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ପୋଲିସ ପ୍ରକାଶ କରିଛି। ତେବେ କିଛିଦିନ ତଳେ ବିଷମକଟକ ସ୍ଥିତ ଖ୍ରୀଷ୍ଟିଆନ ହସ୍ପିଟାଲରୁ ଜଣେ ମହିଳା ଶିଶୁ ଚୋରି କରିଥିବାବେଳେ ଏବେ ପୁଣି ଜିଲା ମୁଖ୍ୟ ଚିକିତ୍ସାଳୟରୁ ଜଣେ ବ୍ୟକ୍ତି ବିନା ବାଧାରେ ପିଲାଟିକୁ ନେବାରେ ସଫଳ ହେଲେ। ତେଣୁ ଜିଲାର ସରକାରୀ ଏବଂ ବେସରକାରୀ ହସ୍ପିଟାଲରେ ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି।
