ଧାମନଗର,୬।୬(ସ୍ବ.ପ୍ର.):ଭଦ୍ରକ ଜିଲା ଧାମନଗର ବ୍ଲକ ଧୂଷୁରୀ ଥାନା ଅଞ୍ଚଳର ଜଣେ ମହିଳା ପରୀକ୍ଷା ଦେବାକୁ ଯାଇ ଗତମାସ ୩୦ ତାରିଖରୁ ନିଖୋଜ ଥିଲେ। ଏପଟେ ସ୍ତ୍ରୀଙ୍କୁ ଝୁରି ଝୁରି କାନ୍ଦୁଥିଲେ ସ୍ବାମୀ। ସୋମବାର ବାଲେଶ୍ୱର ଜିଲା ସାହାଡ଼ା ଅଣ୍ଡରାଇ ଅଞ୍ଚଳରୁ ତାଙ୍କ ସ୍ବାମୀ ମହିଳାଙ୍କୁ ଉଦ୍ଧାର କରିଛନ୍ତି। ସ୍ତ୍ରୀଙ୍କୁ ଫେରି ପାଇବା ପରେ ଖୁସିରେ ଆତ୍ମବିଭୋର ହୋଇଛନ୍ତି ସ୍ବାମୀ। ବାପଘର ସମେତ ମାଇଁ ଓ ମାମୁ ମିଶି ପରୀକ୍ଷା ହଲ୍ ନିକଟରୁ ତାଙ୍କୁ ଅପହରଣ କରି ନେଇଥିଲେ ବୋଲି ମହିଳା ଜଣଙ୍କ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି।
ସୂଚନା ଅନୁଯାୟୀ, ଏକ ସିକ୍ରେଟ ସିମ୍ ମାଧ୍ୟମରେ ସ୍ତ୍ରୀଙ୍କଠାରୁ ମେସେଜ ପାଇ ଯୁବକ ଜଣଙ୍କ ସୋମବାର ବାଲେଶ୍ୱର ସାହାଡ଼ା ଅଣ୍ଡରାଇସ୍ଥିତ ଜଗନ୍ନାଥ ମନ୍ଦିରରେ ପହଞ୍ଚିଥିଲେ। ସେଠାରେ ମହିଳାଙ୍କର ଅନ୍ୟତ୍ର ବିବାହ ପାଇଁ ପ୍ରସ୍ତୁତି ଚାଲିଥିଲା। ସ୍ବାମୀଙ୍କୁ ଦେଖି ସ୍ତ୍ରୀ ଦୌଡ଼ି ଆସିବା ପରେ ସେ ତାଙ୍କୁ ବାଇକ୍ରେ ନେଇ ଘରକୁ ଫେରିଛନ୍ତି। ପୂର୍ବରୁ ସେ ସ୍ତ୍ରୀଙ୍କୁ ଦେଇଥିବା ସିକ୍ରେଟ ସିମ୍ ତାଙ୍କୁ ପାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ବୋଲି ଯୁବକ ଜଣଙ୍କ ପ୍ରକାଶ କରିଛନ୍ତି। ମହିଳାଙ୍କ କହିବା ଅନୁଯାୟୀ ଗତ ୩୦ତାରିଖରେ ସେ ଯୁକ୍ତ ୩ ପରୀକ୍ଷା ଦେବାକୁ ନିକଟସ୍ଥ ଆଖଣ୍ଡଳମଣି ମହାବିଦ୍ୟାଳୟକୁ ଯାଇଥିଲେ। ପୂର୍ବାହ୍ନ ପ୍ରାୟ ୧୧ଟା ବେଳେ ପରୀକ୍ଷା ହଲ୍ରୁ ବାହାରିବା ପରେ ତାଙ୍କ ସ୍ବାମୀ କାର୍ରେ ଅପେକ୍ଷା କରିଛନ୍ତି, ସାଙ୍ଗରେ ବୁଲିଯିବା ପାଇଁ ତାଙ୍କୁ ଡାକୁଛନ୍ତି ବୋଲି ଜଣେ ବ୍ୟକ୍ତି କହିଥିଲେ। ସେ ଗାଡ଼ି ପାଖରେ ପହଞ୍ଚିବା ମାତ୍ରେ କେହି ଜଣେ ତାଙ୍କ ମୁହଁରେ ଏକ ରୁମାଲ ଶୁଙ୍ଘାଇ ଦେବାରୁ ସେ ଅଚେତ ହୋଇଯାଇଥିଲେ। ଚେତା ଫେରିବା ପରେ ତାଙ୍କ ମାମୁଘର ବାସୁଦେବପୁର ବ୍ଲକ ମଇତାପୁର ଅଞ୍ଚଳରେ ଥିବା ସେ ଜାଣିବାକୁ ପାଇଥିଲେ। ରବିବାର ବ୍ରାହ୍ମଣିପାଳସ୍ଥିତ ତାଙ୍କ ବାପଘରକୁ ନିଆଯାଇଥିଲା। ମେସେଜ ଦ୍ୱାରା ସେ ଘଟଣା ସମ୍ପର୍କରେ ସ୍ବାମୀଙ୍କୁ ଜଣାଇଥିଲେ।
ଉଲ୍ଲେଖଯୋଗ୍ୟ, ସେମାନେ ଦୁଇବର୍ଷ ଧରି ପରସ୍ପରକୁ ଭଲପାଉଥିଲେ। ତେବେ ଉଭୟ ଘର ଲୋକଙ୍କୁ ନ ଜଣାଇ ଫେରାର ହୋଇଯାଇଥିଲେ। ମିଳିବା ପରେ ପୁଅ ପରିବାର ପକ୍ଷରୁ ପୁରୀର ନୃସିଂହ ନାଥ ମନ୍ଦିରରେ ବିବାହ କରାଇ ଘରକୁ ଆଣିଥିଲେ। ୭ ମାସ ଧରି ଘରେ ରହିବା ପରେ ବୋହୂ ପାଠ ପଢ଼ିବାକୁ ଜିଦ୍ ଧରିବାରୁ କଲେଜରେ ଆଡ୍ମିଶନ କରାଯାଇଥିଲା। ସେଦିନ ପରୀକ୍ଷା ସରିବା ପରେ ସ୍ବାମୀ ଆଣିବାକୁ ଯାଇଥିବା ବେଳେ ଏକ କାର୍ରେ ବସି ସ୍ତ୍ରୀ ଚାଲିଯାଇଥିଲେ। ବହୁ ବାଟ ପିଛା କରି ନିରାଶ ହେବା ପରେ ସେ ଘରକୁ ଫେରି ପରିବାର ଲୋକଙ୍କ ଆଗରେ କହିଥିଲେ। ପରେ ପରିବାର ପକ୍ଷରୁ ଏନେଇ ଧୂଷୁରୀ ଥାନାରେ ଅଭିଯୋଗ କ୍ରମେ ପୋଲିସ ଏକ ମାମଲା (ନଂ. ୪୪/୨୨) ରୁଜୁ କରି ଘଟଣାର ତଦନ୍ତ ଚଳାଇଥିଲା।
