ବାଙ୍କୀ,୨୧ା୩(ସ୍ବ.ପ୍ର.): ପଞ୍ଚାୟତ ନିର୍ବାଚନ ସରିଥିଲେ ମଧ୍ୟ ରାଜନୈତିକ ହିଂସା ଥମିବାର ନଁା ନେଉନାହିଁ। ଶନିବାର କଟକ ଜିଲା ବୈଦେଶ୍ୱର ଥାନା ଅନ୍ତର୍ଗତ କାଳିପୋଇ ପଞ୍ଚାୟତର ୨ ଗ୍ରାମରେ ହୋଲି ଖେଳ ପରେ ରାଜନୈତିକ ହିଂସାକାଣ୍ଡ ଘଟିଛି। ନବନିର୍ବାଚିତ ସମିତି ସଭ୍ୟାଙ୍କ ଘର ଜାଳି ଦିଆଯାଇଥିବା ବେଳେ ଆଉ କେତେଜଣଙ୍କୁ ମାଡ଼ ଦିଆଯାଇଥିବା ଅଭିଯୋଗ ହୋଇଛି। ଏହି ଘଟଣାରେ ଥାନାରେ ୧୨ଟି ମାମଲା ରୁଜୁ କରାଯାଇ ୭ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ନବନିର୍ବାଚିତ ସମିତି ସଭ୍ୟା ମନୋରମା ନାୟକଙ୍କ ଅଭିଯୋଗ ଅନୁଯାୟୀ, କାଳିପୋଇ ଗ୍ରାମରେ ତାଙ୍କ ଘର। ପଞ୍ଚାୟତ ନିର୍ବାଚନରେ ହୋଇଥିବା ପରାଜୟକୁ ସହ୍ୟ କରି ନ ପାରି ଏକ ନିର୍ଦ୍ଦିଷ୍ଟ ରାଜନୈତିକ ଦଳର କେତେଜଣ ସମର୍ଥକ ଅପରାହ୍ନ ପ୍ରାୟ ୨ଟା ବେଳେ ତାଙ୍କ ଘରେ ପହଞ୍ଚତ୍ ଗାଳିଗୁଲଜ କରିଥିଲେ। ଏନେଇ ନାୟକଙ୍କ ସହ ସେମାନଙ୍କ ବଚସା ହେବାରୁ ଦୁର୍ବୃତ୍ତମାନେ ତାଙ୍କ ଘରେ ପଶି ଆସବାବପତ୍ର ବାହାରକୁ ଫୋପାଡ଼ି ଦେଇଥିଲେ। ଏଥିସହ ଘରେ ଥିବା ଲକ୍ଷାଧିକ ଟଙ୍କା ସମେତ, ସୁନା ଗହଣା ଆଦି ଲୁଟି ନେଇଥିଲେ। ସ୍ବାମୀ ମାୟାଧର ଓ ଘରେ କାମ କରୁଥିବା ଶରତ ପ୍ରଧାନ ଏହାକୁ ବିରୋଧ କରିବାରୁ ସେମାନଙ୍କୁ ମାଡ଼ ଦିଆଯିବା ସହ ମାରଣାସ୍ତ୍ରରେ ଆକ୍ରମଣ କରାଯାଇଥିଲା। ଦୁର୍ବୃତ୍ତମାନେ ନାୟକଙ୍କ ଘରେ ନିଅଁା ଲଗାଇ ଚାଲିଯାଇଥିଲେ। ଖବରପାଇ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ଏନେଇ ପରିବାର ପକ୍ଷରୁ ଥାନାରେ ଅଭିଯୋଗ କରାଯାଇଛି। ଏହାପରେ ଦୁର୍ବୁତ୍ତମାନେ ଉକ୍ତ ଗ୍ରାମର ଲିଙ୍ଗରାଜ ସ୍ବୟଂସହାୟିକା ଗୋଷ୍ଠୀ ସଭାପତି ସୁଜାତା ପଟସିଂଙ୍କ ରାଶନ ଦୋକାନରେ ପହଞ୍ଚତ୍ ଚାଉଳ, କିରୋସିନ ଆଦି ଲୁଟି ନେଇଥିଲେ। ଏଥିସହ ଦୁର୍ବୃତ୍ତମାନେ ଚଢ଼େଇବନ୍ଧ ଗ୍ରାମକୁ ଯାଇ ଦଳୀୟ ପ୍ରାର୍ଥୀଙ୍କୁ କାହିଁକି ଭୋଟ ଦେଲନି କହି ୬ ପରିବାରକୁ ଆକ୍ରମଣ କରି ପାଣି ମେଶିନ, ଗ୍ୟାସ,ଧାନ ଓ ହଣ୍ଡା ଆଦି ଲୁଟି ନେଇଥିଲେ। ସେମାନେ ଘରକୁ ଭାଙ୍ଗିବା ସହ, ଟ୍ରାକ୍ଟର, ଗୋଟିଏ କାର, ୫ଟି ବାଇକ ଭାଙ୍ଗି ଦେଇଥିଲେ। ବ୍ରଜବନ୍ଧୁ ପ୍ରଧାନଙ୍କ ସ୍ତ୍ରୀ ଲଳିତା ମଞ୍ଜରୀ ପ୍ରଧାନ, ମାଧବ ଜେନାଙ୍କ ପୁଅ ଓ ଝିଅ ଜୟନ୍ତୀଙ୍କୁ ମାଡ଼ମାରି ଗୁରୁତର କରିଥିଲେ। ଗୁରୁତରମାନେ ଏବେ ଖୋର୍ଦ୍ଧା ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଏନେଇ ଥାନାରେ ଅଭିଯୋଗ ପରେ ପୋଲିସ ଚଢ଼େଇବନ୍ଧ ଗ୍ରାମର ପ୍ରମୋଦ ମହାପାତ୍ର, ଅବିନାଶ ରାଉତରାୟ, ପୂର୍ଣ୍ଣଚନ୍ଦ୍ର ଛୋଟରାଏ, ଯଦୁ ଜେନା, ବାଉରୀବନ୍ଧୁ ଜେନା, ମାଗିଜେନା ଓ ଭଗବାନ ଜେନାଙ୍କୁ ଗିରଫ କରିଛି। ତେବେ ଉଭୟ ସ୍ଥାନରେ ପୋଲିସ ପହଞ୍ଚତ୍ବାରେ ବିଳମ୍ବ କରିବାରୁ ଉତ୍ତେଜନା ପ୍ରକାଶ ପାଇଛି। ଏହାର କାରଣ ସମ୍ପର୍କରେ ଜାଣିବା ପାଇଁ ବୈଦେଶ୍ୱର ଥାନା ଅଧିକାରୀ ଦୋଳ ଗୋବିନ୍ଦ ସ୍ବାଇଁ ଓ ବାଙ୍କୀ ଉପଖଣ୍ଡ ପୋଲିସ ଅଧିକାରୀ ବାସୁଦେବ ସ୍ବାଇଁଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେମାନେ ଫୋନ ଉଠାଇ ନ ଥିଲେ।
