ନୂଆଦିଲ୍ଲୀ: କୋଭିଡ୍-୧୯ ଯୋଗୁ ୨୦୨୦-୨୧ ଆର୍ଥତ୍କ ବର୍ଷରେ ଦେଶର ହୋଟେଲ ଶିଳ୍ପ ୧.୩୦ ଲକ୍ଷ କୋଟି ଟଙ୍କାର ରାଜସ୍ବ କ୍ଷତି ସହିଛି। ଏହି ଶିଳ୍ପ ବର୍ତ୍ତମାନ ସଙ୍କଟ ସମୟ ଦେଇ ଗତି କରୁଥିବା ଫେଡେରେଶନ ଅଫ୍ ହୋଟେଲ ଆଣ୍ଡ ରେଷ୍ଟୁରାଣ୍ଟ ଆସୋସିଏଶନ ଅଫ୍ ଇଣ୍ଡିଆ(ଏଫ୍ଏଚ୍ଆର୍ଏଆଇ) ପକ୍ଷରୁ ରବିବାର କୁହାଯାଇଛି। ଏ ନେଇ ଶିଳ୍ପର ପ୍ରତିନିଧି ଦଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହସ୍ତକ୍ଷେପ ଲୋଡ଼ିବା ସହ ଶିଳ୍ପ ଲାଗି ସହାୟତା ଆଶା ରଖିଛନ୍ତି। ସରକାର ଆର୍ଥତ୍କ ସହାୟତା ଯୋଗାଣ ଦ୍ୱାରା ହସ୍ପିଟାଲିଟି କ୍ଷେତ୍ରକୁ ଧ୍ୱଂସ ମୁଖରୁ ବଞ୍ଚାଇପାରିବେ ବୋଲି ସଂଘ ପକ୍ଷରୁ ମତ ପ୍ରକାଶ ପାଇଛି।
୨୦୧୯-୨୦ରେ ଦେଶର ହୋଟେଲ ଶିଳ୍ପର ମୋଟ ରାଜସ୍ବ ୧.୮୨ ଲକ୍ଷ କୋଟି ଟଙ୍କା ରହିଥିଲା। ୨୦୨୦-୨୧ରେ ଏହି ଶିଳ୍ପର ରାଜସ୍ବ ୭୫% ପୋଛି ହୋଇଯାଇଛି। କ୍ଷତି ପରିମାଣ ପ୍ରାୟ ୧.୩୦ ଲକ୍ଷ କୋଟି ଟଙ୍କା ହେବ ବୋଲି ଏଫ୍ଏଚ୍ଆର୍ଏଆଇ ପକ୍ଷରୁ ସୂଚନା ମିଳିଛି। ଧୀରେ ଧୀରେ ବ୍ୟବସାୟୀମାନେ କାରବାର ବନ୍ଦ କରି ଦେଉଥିବା ଦେଖାଯାଉଛି। ଅପରପକ୍ଷରେ ଏହି ଶିଳ୍ପରେ ଅନାଦାୟ ଋଣ (ଏନ୍ପିଏ) ପରିମାଣ ମଧ୍ୟ ବୃଦ୍ଧି ଘଟୁଛି। ୨୦୨୦ ମାର୍ଚ୍ଚ ପରଠାରୁ ଶିଳ୍ପ ବିଭିନ୍ନ ବୈଧାନିକ ଏବଂ ପୁଞ୍ଜିଗତ ଖର୍ଚ୍ଚ ତୁଲାଇବାକୁ ସଂଘର୍ଷ କରୁଛି। ଋଣ ଏବଂ ଏଥି ଜନୀତ ସୁଧ ବର୍ତ୍ତମାନ ପ୍ରଦାନ କରିବା କଷ୍ଟକର ହୋଇପଡୁଛି। ବର୍ତ୍ତମାନ ସ୍ଥିତିରେ ହୋଟେଲ ଶିଳ୍ପ ଦୁର୍ଦ୍ଦିନ ଦେଇ ଗତି କରୁଛି ବୋଲି ଏଫ୍ଏଚ୍ଆର୍ଏଆଇ ଉପସଭାପତି ଗୁରୁବକ୍ସିସ ସିଂ କୋହଲି ସୂଚନା ଦେଇଛନ୍ତି।
ଋଣ କିସ୍ତି ଉପରେ ମୋରାଟୋରିୟମ ନ ରହିବା ଏବଂ ସୁଧ ପ୍ରଦାନ କରିବା ଶିଳ୍ପ ଲାଗି ଏବେ କଷ୍ଟସାଧ୍ୟ ବ୍ୟାପାର ହୋଇଛି। ବର୍ତ୍ତମାନସ୍ଥିତିରେ ହୋଟେଲ ଶିଳ୍ପର ସମସ୍ୟାକୁ ନଜରରେ ରଖି ସରକାର ବିଭିନ୍ନ ନୀତିଗତ ଏବଂ ଆର୍ଥତ୍କ ସହାୟତା ଯୋଗାଣ ଦିଗରେ କାର୍ଯ୍ୟ କରିବାର ଆବଶ୍ୟକତା ରହିଛି ବୋଲି କୋହଲି ମତ ରଖିଛନ୍ତି। ହୋଟେଲ ଶିଳ୍ପକୁ ଦେବାକୁ ପଡୁଥିବା ବିଭିନ୍ନ ଷ୍ଟାଚ୍ୟୁଟୋରି ଚାର୍ଜ ଛାଡ କରିବା, ସମ୍ପତ୍ତି ଟିକସ ଛାଡ, ଓ୍ବାଟର ଚାର୍ଜ, ଇଲେକ୍ଟ୍ରିସିଟି ଏବଂ ଏକ୍ସାଇଜ ଲାଇସେନ୍ସ ଫି’ ଲକ୍ଡାଉନ ସମୟରେ ଛାଡ କରିବାକୁ ଦାବି ହୋଇଛି। ହୋଟେଲ ଶିଳ୍ପରେ କାର୍ଯ୍ୟ କରୁଥିବା ଅଂଶୀଦାର ଏବଂ ପରିବାରକୁ କ୍ଷତିପୂରଣ ପ୍ରଦାନ କରିବାର ଆବଶ୍ୟକତା ରହିଛି ବୋଲି ସଂଘର ଯୁଗ୍ମ ସମ୍ପାଦକ ପ୍ରଦୀପ ସେଟ୍ଟୀ ସୂଚନା ଦେଇଛନ୍ତି।
