ନୂଆଦିଲ୍ଲୀ,୧୩।୧୦: ସ୍ବଚ୍ଛ, ଉତ୍ତରଦାୟୀ ଏବଂ ରୋଗୀ କୈନ୍ଦ୍ରିକ ସ୍ବାସ୍ଥ୍ୟସେବା ପ୍ରଦାନକୁ ସୁଦୃଢ଼ କରିବା ଦିଗରେ ଏକ ବଡ଼ ପଦକ୍ଷେପ ସ୍ବରୂପ ହସ୍ପିଟାଲଗୁଡ଼ିକରେ ସ୍ବାସ୍ଥ୍ୟସେବା ଦର ସ୍ପଷ୍ଟ ଭାବେ ପ୍ରଦର୍ଶନ କରାଯିବାକୁ ସୁନିଶ୍ଚିତ କରିବା ଲାଗି କେନ୍ଦ୍ର ସରକାର ସୋମବାର ରାଜ୍ୟଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ଏହାର ଉଦ୍ଦେଶ୍ୟ ହେଲା ରୋଗୀମାନଙ୍କୁ ସ୍ବାସ୍ଥ୍ୟସେବା ସମ୍ବନ୍ଧୀୟ ଠିକ୍ ନିଷ୍ପତ୍ତି ନେବାରେ ସହାୟତା କରିବା। ଏହାଦ୍ୱାରା ବିଲ୍ ସମ୍ବନ୍ଧୀୟ ବିବାଦକୁ ରୋକାଯିବା ସହ ସ୍ବାସ୍ଥ୍ୟସେବା ଉପରେ ବିଶ୍ୱାସକୁ ସୁଦଢ଼ ହେବ। କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ପୁଣ୍ୟସଲୀଳା ଶ୍ରୀବାସ୍ତବ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ସଚିବମାନଙ୍କୁ ପତ୍ର ଲେଖି ସ୍ବାସ୍ଥ୍ୟସେବା ଦରଗୁଡ଼ିକର ସ୍ବଚ୍ଛ ପ୍ରଦର୍ଶନ ସମ୍ବନ୍ଧୀୟ ବ୍ୟବସ୍ଥାଗୁଡ଼ିକୁ ପ୍ରଭାବଶାଳୀ ଭାବେ କାର୍ଯ୍ୟକାରୀ କରିବାକୁ କହିଛନ୍ତି।
ଏଥିସହିତ ବିଦେଶୀ ରୋଗୀ ଯେଉଁମାନେ ମେଡିକାଲ ଓ ଆୟୁଷ ଭିଜାରେ ଭାରତ ଆସୁଛନ୍ତି, ସେମାନଙ୍କ ପାଇଁ ପ୍ୟାକେଜ ମୂଲ୍ୟର ସ୍ବଚ୍ଛ ପ୍ରଦର୍ଶନକୁ ସହଜ କରିବା ନିମନ୍ତେ ରାଜ୍ୟଗୁଡ଼ିକୁ କୁହାଯାଇଛି। ଏହାଦ୍ୱାରା ଉକ୍ତ ଅନ୍ତର୍ଜାତୀୟ ରୋଗୀମାନେ ସୂଚନାଭିତ୍ତିକ ନିଷ୍ପତ୍ତି ନେଇପାରିବେ ଏବଂ ମୂଲ୍ୟ ଏବଂ ବିଲିଂ ସମ୍ବନ୍ଧୀୟ ଅଭିଯୋଗକୁ ଏହା ହ୍ରାସ କରିବା ସହ ଚିକିତ୍ସା ଓ ଆୟୁଷ ଯତ୍ନ ପାଇଁ ଏକ ବିଶ୍ୱସନୀୟ ସ୍ଥାନ ଭାବେ ଭାରତର ସ୍ଥିତିକୁ ଆହୁରି ସୁଦୃଢ଼ କରିବ ବୋଲି ଶ୍ରୀବାସ୍ତବ କହିଛନ୍ତି। ପ୍ରଚଳିତ ନିୟାମକ ବ୍ୟବସ୍ଥାଗୁଡ଼ିକର ଅନୁପାଳନର ସମୀକ୍ଷା ପାଇଁ ସ୍ବାସ୍ଥ୍ୟ ସଚିବ କହିବା ସହ ସ୍ବାସ୍ଥ୍ୟସେବା ଶୁଳ୍କ ବିଷୟରେ ସୂଚନା ଯେପରି ରୋଗୀ ଓ ତାଙ୍କ ସମ୍ପର୍କୀୟମାନଙ୍କୁ ସ୍ପଷ୍ଟ ଭାବେ ଦୃଶ୍ୟ ହେବ, ତାହା ସୁନିଶ୍ଚିତ କରିବା ଦିଗରେ ଉପଯୁକ୍ତ ପଦକ୍ଷେପ ନେବାକୁ କହିଛନ୍ତି।