ଡେରାବିଶ,୧୮।୪: (ସ୍ବ.ପ୍ର.) ଡେରାବିଶ ବ୍ଲକର ଅଞ୍ଚଳ ସପ୍ତାହେ ହେବ ୪୦ ଡିଗ୍ରୀ ପାଖାପାଖି ତାପମାତ୍ରା ରହିବାରୁ ପ୍ରବଳ ଗୁଳୁଗୁଳି ଅନୁଭୂତ ହେଉଛି। ତେବେ ପ୍ରଚଣ୍ଡ ରୌଦ୍ରତାପ ସାଙ୍ଗକୁ ବ୍ଲକର କେତେକ ଅଞ୍ଚଳରେ ପାନୀୟ ଜଳ ସଙ୍କଟ ଯୋଗୁ ଲୋକେ ଅସ୍ତବ୍ୟସ୍ତ ହୋଇପଡ଼ିଛନ୍ତି। ରାଜ୍ୟ ଓ କେନ୍ଦ୍ର ସରକାରଙ୍କ ବସୁଧା ଯୋଜନା ଯୋଗେ ସମସ୍ତଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇବା ପାଇଁ ଯୋଜନା କରାଯାଇଥିବା ବେଳେ କେନ୍ଦ୍ରାପଡ଼ା ପାନୀୟ ଜଳ ଯୋଗାଣ ବିଭାଗର ଅପାରଗତା ପାଇଁ ବ୍ଲକ ଅଞ୍ଚଳର ବିଭିନ୍ନ ଗ୍ରାମରେ ପାନୀୟ ଜଳ ସଙ୍କଟ ଏବେ ଉତ୍କଟ ରୂପ ଧାରଣ କରିଛି। ବ୍ଲକ ଅଧୀନସ୍ଥ ଛୋଟି ପଞ୍ଚାୟତର ଛୋଟିଠାରେ ଥିବା ଓଭରହେଡ୍ ପାଣିଟାଙ୍କିରୁ ପଞ୍ଚାୟତର ବିଭିନ୍ନ ଗ୍ରାମକୁ ପାନୀୟ ଜଳ ଯୋଗାଇ ଦିଆଯାଇଛି। ହେଲେ ଜାନୁୟାରୀରୁ ପଞ୍ଚାୟତ ଅଧୀନ ୫ଟି ୱାର୍ଡର ୨୦୦୦ରୁ ଊର୍ଦ୍ଧ୍ୱ ଅଧିବାସୀ ପନୀୟ ଜଳ ସଙ୍କଟରେ ଘାଣ୍ଟି ହେଉଛନ୍ତି। ତେବେ ବର୍ତ୍ତମାନ ପାନୀୟ ଜଳର ଅନ୍ୟ କୌଣସି ବିକଳ୍ପ ଉତ୍ସ ନ ଥିବାରୁ ଛୋଟି ପଞ୍ଚାୟତ ଦେଇ ଯାଇଥିବା ବିରୂପା ନଦୀର ପାଣିକୁ ଜଳ କ୍ଲିଷ୍ଟ ଲୋକଙ୍କ ପାଇଁ ସାହାରା ପାଲଟିଛି। ଯେଉଁ ନଦୀରେ ଗୃହପାଳିତ ପ୍ରାଣୀ ପାଣିକୁ ବ୍ୟବହାର କରୁଛନ୍ତି ସେହି ନଦୀର ଦୂଷିତ ଜଳକୁ ଜଳ କ୍ଲିଷ୍ଟ ଲୋକମାନେ ମଧ୍ୟ ନିଜକୁ ବଞ୍ଚାଇବା ପାଇଁ ଘରଠାରୁ ୨ କିଲୋମିଟର ଦୂର ନଦୀରୁ ନିତ୍ୟ ବ୍ୟବହାର୍ଯ୍ୟ ପାଇଁ ପାଣି ଆଣୁଥିବା ଦେଖିବାକୁ ମିଳିଛି। ତେବେ ଏ ବିଷୟରେ ଦାୟିତ୍ୱରେ ଥିବା ବିଭାଗୀୟ କନିଷ୍ଠ ଯନ୍ତ୍ରୀ ଦେବାଶିଷ ଧଳଙ୍କୁ ପଚାରିବାରେ ଓଭରହେଡ୍ ଟାଙ୍କିରୁ ସମ୍ପୃକ୍ତ ଗ୍ରାମଗୁଡ଼ିକୁ ପାଇପ୍ ବିଛାଇବା ପାଇଁ ଜଣେ ଠିକାଦାରକୁ ଦାୟିତ୍ୱ ଦିଆଯାଇଥିଲା। ଠିକାଦର ଜଣକୁ ବିଭାଗୀୟ ଡାଇଗ୍ରାମ ଅନୁସାରେ କେତେକ ଜାଗାରେ ଯାଇଥିବା ପୁରୁଣା ପାଇପ୍ ରହିବା ସହ ଅନ୍ୟ ଜାଗାରେ ନୂଆ ପାଇପ୍ ବିଛା ହେବା ପାଇଁ କୁହାଯାଇଥିଲା। ମାତ୍ର ଜଳ କ୍ଲିଷ୍ଟ ଗ୍ରାମର କେତେଜଣ ବ୍ୟକ୍ତି ପୁରୁଣା ପାଇପ୍କୁ ସମ୍ପୂର୍ଣ୍ଣ ଉଠାଇ ନୂଆ ପାଇପ୍ ଯୋଗେ ଜଳ ଯୋଗାଇବାକୁ ଜିଦ୍ ଧରିଥିବାରୁ ଠିକାଦାର ଅଧାରୁ କାମ ବନ୍ଦ କରିଦେଇଛନ୍ତି। ଫଳରେ ଏଭଳି ସମସ୍ୟା ଉପୁଜିଛି। ଲୋକଙ୍କୁ କେବେ ପାନୀୟ ଜଳ ଯୋଗାଇ ଦିଆଯିବ ପଚାରିବାରୁ ସେ କୌଣସି ଉତ୍ତର ଦେଇ ନ ଥିଲେ। ଖୁବ୍ଶୀଘ୍ର ଏହି ସମସ୍ୟାର ସମାଧାନ ନ ହେଲେ ଜଳ କ୍ଲିଷ୍ଟ ଲୋକମାନେ ମାଠିଆ ଗରା ଧରି ରାଜରାସ୍ତାରେ ଆନ୍ଦୋଳନ କରିବେ ବୋଲି ୫ନଂ.ୱାର୍ଡ଼ର ଅଧିବାସୀ ସୁବାସ ସାହୁ କହିଛନ୍ତି।
