ଭୁବନେଶ୍ୱର, ୧୮।୯ (ବ୍ୟୁରୋ): ସାଧାରଣ ମଧ୍ୟବିତ୍ତ ପରିବାର। ସବୁ ପରିବାର ପରି ଏଠାରେ ମଧ୍ୟ ସୁଖ, ଦୁଃଖ, ହସ ଲୁହ ରହିଛି। ସବୁକିଛି ଠିକ୍ ଠାକ ଚାଲିଥିବାବେଳେ ହଠାତ୍ ପରିବାରର ମୁଖ୍ୟ କରୋନାରେ ଆକ୍ରାନ୍ତ ହୁଅନ୍ତି। ଚିକିତ୍ସା ପାଇଁ ତାଙ୍କୁ ଏକ ହସ୍ପିଟାଲରେ ଭର୍ତ୍ତି କରାଯାଏ। ସ୍ବାସ୍ଥ୍ୟରେ ଅବନତି ଆସିବା ପରେ ତାଙ୍କୁ ଆଇସିୟୁରେ ରଖାଯାଏ। ମାତ୍ର ଅବସ୍ଥା ସଙ୍କଟାପନ୍ନ ହୁଏ। ଡାକ୍ତରଙ୍କ ଅକ୍ଳାନ୍ତ ପରିଶ୍ରମ ପରେ ବି କୌଣସି ସୁଫଳ ନ ମିଳିବାରୁ ଶେଷରେ ଡାକ୍ତର ମଧ୍ୟ ହାତ ଟେକି ଦିଅନ୍ତି। କରୋନାରେ ଆକ୍ରାନ୍ତ ସ୍ବାମୀ ଶେଷଥର ପାଇଁ ଡାକ୍ତରଙ୍କଠାରୁ ମୋବାଇଲ୍ ଫୋନ୍ ନେଇ ସ୍ତ୍ରୀ ସରିତାଙ୍କ ସହ କଥା ହୁଅନ୍ତି। କିଛି ସମୟର ବାର୍ତ୍ତାଳାପ ପରେ ଡାକ୍ତର ଲକ୍ଷ୍ୟ କରୁଛନ୍ତି କିପରି ଏହି ବାର୍ତ୍ତାଳାପ ସ୍ବାମୀଙ୍କୁ ମାନସିକ ସ୍ତରରେ ଦୃଢ କରୁଛି। ଏହାପରେ ସ୍ତ୍ରୀଙ୍କ ସହ କଥା ହେବା ପାଇଁ ଡାକ୍ତର ତାଙ୍କୁ ବାରମ୍ବାର ଫୋନ ଦେଉଛନ୍ତି। ସ୍ବାମୀ ସ୍ତ୍ରୀଙ୍କ କଥାବାର୍ତ୍ତା କିପରି ମାନସିକ ସ୍ତରରେ ଶକ୍ତି ସାମର୍ଥ୍ୟ ଏବଂ ସକାରାତ୍ମକ ଚିନ୍ତାଧାରା ଜୁଟେଇ ଶେଷରେ ସ୍ବାମୀଙ୍କୁ ବଞ୍ଚେଇ ପାରିଛି ଏହାକୁ ନେଇ ପ୍ରସ୍ତୁତ ହୋଇଛି କ୍ଷୁଦ୍ର ଚଳଚ୍ଚିତ୍ର ‘ଦି ହିଲିଂ ଟଚ୍’। ନୀଳ ମହାପାତ୍ରଙ୍କ ସୋସିଆଲ ଇମେଜ୍ ବ୍ୟାନରରେ ନିର୍ମିତ ଏହି କ୍ଷୁଦ୍ର ଚଳଚ୍ଚିତ୍ରରେ ଅଭିନେତ୍ରୀ ଗାର୍ଗୀ ମହାନ୍ତି ସରିତାର ଭୂମିକା ତୁଲାଇଥିବାବେଳେ ଗଜେନ୍ଦ୍ର ପାଢୀ ତାଙ୍କ ସ୍ବାମୀଙ୍କ ଚରିତ୍ର ତୁଲାଇଛନ୍ତି। ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ଡ. ଶ୍ୱେତ କୁମାର ଦାସ ଓ ଏଡିଟିଂ କରିଛନ୍ତି ଅମ୍ବିକେଶ କୁନାଲ ହୋତା। କରୋନା ଭୂତାଣୁଠାରୁ ନକାରାତ୍ମକ ଚିନ୍ତାଧାରା, ଭୟ ଓ ମାନସିକ ସ୍ତରରେ ଦୁର୍ବଳ ହେବା ଆକ୍ରାନ୍ତଙ୍କ ପାଇଁ ଅଧିକ କ୍ଷତି କରୁଛି। ତେଣୁ ମାନସିକ ସ୍ତରରେ ଦୃଢତା ରଖିବା, ଆତ୍ମବିଶ୍ୱାସ ବୃଦ୍ଧି କରିବା ଓ ସକାରାତ୍ମକ ଚିନ୍ତାଧାରା ଦ୍ୱାରା ଇମ୍ୟୁନିଟି ବୃଦ୍ଧି କରୋନାକୁ ପ୍ରତିହତ କରିବାରେ ସହାୟକ ହୋଇଥାଏ ବୋଲି ଏହି ଚଳଚ୍ଚିତ୍ରଟି ବାର୍ତ୍ତା ଦେଉଛି। ଶୁକ୍ରବାର ସ୍ଥାନୀୟ ଓୟୁଜେ ଭବନଠାରେ ଏହି ଚଳଚ୍ଚିତ୍ରର ଉନ୍ମୋଚନ କରାଯାଇଥିବାବେଳେ ଅଭିନେତ୍ରୀ ଗାର୍ଗୀ ମହାନ୍ତି, ଅଭିନେତା ଗଜେନ୍ଦ୍ର ପାଢୀ, ଏମ୍ପି ତଥା ଅଭିନେତା ମୁନ୍ନା ଖାଁ, ସିନେ ସମୀକ୍ଷକ ଅଶୋକ ପାଲିତ ଉପସ୍ଥିତ ଥିଲେ।
